చిన్న కారును అభివృద్ధి చేస్తున్న నిస్సాన్, హిందూజా

వాహనాల తయారీ విషయంలో హిందూజా గ్రూపుకు, నిస్సాన్ మోటార్ కంపెనీకు ఒప్పందం ఉన్న సంగతి తెలిసినదే. ఈ నేపథ్యంలో హిందూజా గ్రూపుకు చెందిన ఇంజనీరింగ్ సర్వీసెస్స విభాగం 'డిఫియన్స్ టెక్నాలజీస్' (Defiance Technologies) నిస్సాన్‌తో కలిసి ఓ చిన్నకారును అభివృద్ధి చేసేందుకు పనిచేస్తున్నట్లు అశోక్ లేలాండ్ ఛైర్మన్ ధీరజ్ జి హిందూజా వెల్లడించారు.

అయితే, ఈ చిన్న కారు అభివృద్ధి విషయంలో అశోక్ లేలాండ్‌ (వాణిజ్య వాహనాల తయారీ యూనిట్)కు ఎలాంటి ప్రత్యక్ష సంబంధం లేదని, అది నిస్సాన్ డొమైన్‌లోనే ఉంటుందని హిందూజా స్పష్టం చేశారు. నిస్సాన్ సహకారంతో అశోక్ లేలాండ్ ప్రస్తుత వాణిజ్య వాహనాల వ్యాపారాన్ని అభివృద్ధి పరచుకుంటూ, విస్తరించుకునే దిశగా ముందుకు సాగుతామని ఆయన తెలిపారు.

తాము అభివృద్ధి చేస్తున్న చిన్న కారుకు సంబంధించి అంతకు మించిన వివరాలను ఆయన వెల్లడించలేదు. కాగా.. అశోక్ లేలాండ్ ఇటీవలే నిస్సాన్ ఇవాలియా ప్లాట్‌ఫామ్‌ను ఆధారంగా చేసుకొని అభివృద్ధి చేసిన బహుళ ప్రయోజనం వాహనం (ఎమ్‌పివి) స్టైల్‌ను భారత మార్కెట్లో ఆవిష్కరించిన సంగతి తెలిసినదే. ఈ ఏడాది పండుగ సీజన్‌లో ఈ వాహనాన్ని వాణిజ్యపరంగా అందుబాటులోకి తీసుకువస్తామని కంపెనీ తెలిపింది.