జనవరి 2014 నుంచి పెరగనున్న నిస్సాన్ కార్ల ధరలు

జనవరి 2014 నుంచి ధరలను పెంచనున్న కార్ల జాబితాలో తాజాగా నిస్సాన్ మోటార్ ఇండియా వచ్చి చేరింది. వచ్చే ఏడాది ఆరంభం నుంచి తమ ఉత్పత్తుల ధరలను మోడల్‌ను బట్టి 2 నుంచి 4 శాతం మేర ధరలు పెంచుతామని కంపెనీ ప్రకటించింది.

రూపాయి విలువ క్షీణత, పెరుగుతున్న ఉత్పాదక వ్యయాలను దృష్టిలో ఉంచుకొని ఈ ధరల పెంపు నిర్ణయం తీసుకున్నామని కంపెనీ ఓ ప్రకటనలో పేర్కొంది. పెరిగిన ధరలు జనవరి 2014 నుంచి అమల్లోకి వస్తాయని నిస్సాన్ మోటార్ ఇండియా తెలిపింది.

నిస్సాన్ తీసుకున్న తాజా నిర్ణయంతో, మైక్రా మరియు మైక్రా యాక్టివ్ హ్యాచ్‌బ్యాక్స్, మిడ్-సైజ్ సెడాన్ సన్నీ, మల్టీ పర్సప్ వెహికల్ ఇవాలియా, కాంపాక్ట్ ఎస్‌యూవీ టెర్రానో ధరలు మరింత ప్రియం కానున్నాయి.

ఇదిలా ఉండగా, జనవరి 2014 మారుతి సుజుకి, టాటా మోటార్స్, హ్యుందాయ్ మోటార్ ఇండియా కంపెనీలు కూడా తమ ఉత్పత్తుల ధరలను పెంచనున్నట్లు ప్రకటించాయి. కేవలం ప్యాసింజర్ కార్ల తయారీ కంపెనీలే కాకుండా, బిఎమ్‌డబ్ల్యూ, ఆడి, మెర్సిడెస్ బెంజ్ వంటి లగ్జరీ కార్ కంపెనీలు కూడా కొత్త సంవత్సరంలో ధరలను పెంచనున్నాయి.