నిస్సాన్ మైక్రా, రెనో పల్స్ ప్లాట్‌ఫామ్‌పై కాంపాక్ట్ సెడాన్

ఇటీవల బడ్జెట్‌లో సవరించబడిన ఎక్సైజ్ డ్యూటీ కార్ల తయారీదారులకు శాపంగా మారింది. నాలుగు మీటర్ల కన్నా పొడవు కలిగిన కార్లను పెద్ద కార్లుగా పరిగణించి, వాటిపై అధనపు ఎక్సైజ్ సుంకాలను వసూలు చేస్తుండటంతో తయారీదారులు కొత్త మార్గాలను ఎంచుకుంటున్నారు. ఇందులో భాగంగానే, నాలుగు మీటర్ల కన్నా తక్కువ పొడవు కలిగిన కాంపాక్ట్ సెడాన్లను తయారు చేస్తున్నారు.

ఈ సెగ్మెంట్లో ఇప్పటికే ఎంట్రీ ఇచ్చిన మారుతి సుజుకి స్విఫ్ట్ డిజైర్, హోండా అమేజ్‌లో తమ కాంపాక్ట్ సెడాన్లతో మంచి సక్సెస్‌ను సాధించిన సంగతి తెలిసినదే. ఈ సక్సెస్‌ను టెంప్ట్ అయిన జపాన్-ఫ్రెంచ్ భాగస్వామ్య కంపెనీ నిస్సాన్-రెనో ఓ కాంపాక్ట్ సెడాన్‌ను అభివృద్ధి చేసేందుకు సన్నాహాలు చేస్తుంది. ఈ రెండు సంస్థలు అందిస్తున్న మైక్రా, పల్స్ హ్యాచ్‌బ్యాక్‌ల ప్లాట్‌ఫామ్‌ను ఆధారంగా చేసుకొని ఓ కొత్త కాంపాక్ట్ సెడాన్‌ను తీసుకురానున్నారు.

వాస్తవానికి నిస్సాన్-రెనో కంపెనీలకు కాంపాక్ట్ సెడాన్ చక్కగా పనిచేస్తుంది. ప్రస్తుతం మైక్రా, పల్స్ హ్యాచ్‌బ్యాక్‌ల తర్వాత కేవలం సన్నీ, స్కాలా సెడాన్లు మాత్రమే అందుబాటులో ఉన్నాయి. ఈ నేపథ్యంలో, నిస్సాన్-రెనో సరసమైన ధరకే కాంపాక్ట్ సెడాన్‌ను ప్రవేశపెడితే, అది మంచి సక్సెస్‌ను సాధించడం ఖాయం. మీరేమంటారు..?