మహీంద్రా రేవా కొత్త ఎలక్ట్రిక్ కారు పేరేంటో తెలుసా..?

మహీంద్రా గ్రూపుకు చెందిన ఎలక్ట్రిక్ వాహనాల తయారీ సంస్థ మహీంద్రా రేవా తమ నెక్స్ట్ జనరేషన్, ఫ్యూచర్ రెడీ, ఎలక్ట్రిక్ కారుకు 'మహీంద్రా ఈ2ఓ' (Mahindra e2o) అనే పేరును ఖరారు చేస్తున్న ఓ ప్రకటనలో పేర్కొంది. మహీంద్రా ఈ2ఓ (ఈ టూ ఓ అని పలకాలి)ను క్లీన్, కన్వీనెంట్, కనెక్టెడ్, క్లెవల్, కాస్ట్ ఎఫెక్టివ్ అనే ఐదు సూత్రాలను ఆధారంగా చేసుకొని కంపెనీ అభివృద్ధి చేసింది. వివిధ దశల్లో టెస్టింగ్‌ను పూర్తి చేసుకున్న మహీంద్రా ఈ2ఓ విడుదలకు సిద్ధంగా ఉంది.

ఈ కారును మహీంద్రా బెంగుళూరులో తాజాగా ఏర్పాటు చేసిన అధునాతన ప్లాంటులో ఉత్పత్తి చేస్తున్నారు. భారతదేశంలో మొట్టమొదటిసారిగా ప్లాటినం సర్టిఫికెట్ పొందిన ఈ ఆటోమొబైల్ ప్లాంటులో ఏటా సుమారు 30,000 ఎలక్ట్రిక్ కార్లు ఉత్పత్తి కానున్నాయి. ప్రకృతి ఏవిధంగాను హాని కలిగించని రీతిలో ఈ ఎకో ఫ్రెండ్లీ కారును మహీంద్రా రేవా తయారు చేసింది. మహీంద్రా ఈ2ఓ పేరులో ఈ అనే అక్షరం సూర్యుని శక్తిని, 2 (టూ) కారులో కనెక్ట్ చేయబడిన టెక్నాలజీని, ఓ అనే అక్షరం ఆక్సిజన్‌ను ప్రతిభింభింపజేస్తుంది.