ప్రపంచంలో కెల్లా అత్యంత ఖరీదైన కారు: ధర రూ.321 కోట్లు!

ఈ 1963 ఫెరారీ 250 జిటిఓ రేస్ కారు 1962-1964 మధ్య కాలంలో ఉత్పత్తిన కేవలం 39 కార్లలో ఒకటి. రేసింగ్ కార్యక్రమాల్లో పాల్గొనేందుకు అప్పట్లో ఈ కార్లను తయారు చేశారు.

గతంలో ఇంత అధిక ధర పలికి రికార్డు సృష్టించిన కారు కూడా ఫెరారీ 250 జిటిఓ రేస్ కారే (అయితే, అది గ్రీన్ కలర్ కారు). ఆ కారును అప్పట్లో స్టెర్లింగ్ మోస్ నడిపారు. వేలంలో ఆ కారు ధర 35 మిలియన్ డాలర్లు పలికింది.

ఈ ఫెరారీ 250 జిటిఓ కార్లను గియోట్టో బిజారినీ నేతృత్వంలోని బృందం సృష్టించింది. ఈ రేసింగ్ కార్లను రోడ్ వెర్షన్ 250 జిటి ఎస్‌డబ్ల్యూబి మోడల్‌ను ఆధారంగా చేసుకొని తయారు చేశారు.

ఫెరారీ 250 జిటిఓ రేస్ కారులో 300 హార్స్ పవర్‌ల శక్తిని ఉత్పత్తి చేసే వి12 ఇంజన్‌ను ఉపయోగించారు. ఇదే ఇంజన్‌ను 250 టెస్టా రోస్సాస్ కారులో కూడా ఉపయోగించారు. 5-స్పీడ్ మ్యాన్యువల్ గేర్ బాక్సుతో జతచేయబడి ఉండే ఈ కారు గరిష్టంగా గంటకు 280 కి.మీ. వేగంతో పరుగులు తీస్తుంది.

ఫెరారీ 250 జిటిఓ కార్లకు అభిమానులు భారీ మొత్తంలో డబ్బులు చెల్లించడాన్ని చూసిన నిపుణులు, వీటిని మోనాలీసా కార్లని పిలుస్తున్నారు.

వాస్తవానికి 1950-60 కాలానికి చెందిన అరుదైన, క్లాసిక్ ఫెరారీ కార్ల వెల ఏడాదికేడాది సగటున 15 శాతానికి పైగా పెరుగుతోంది.

ఇలాంటి ఓ కారుకు 52 మిలియన్ డాలర్లకు మించి అయినా చెల్లింపు చేయగల సామర్థ్యం కలిగిన ధనికులు ఉన్నారని, అయితే ఇలాంటి లావాదేవీలన్నీ ప్రైవేట్‌గా జరిపోతుంటాయి కాబట్టి, వీరు వెలుగులోకి రారని నిపుణులు అంటున్నారు.