ఎయిర్‌బ్యాగ్ సమస్యతో హ్యుందాయ్ ఎస్‌యూవీల రీకాల్

కొరియన్ ఆటోమొబైల్ దిగ్గజం హ్యుందాయ్‌ మోటార్స్‌ అమెరికాతో పాటు పోర్టారికోలలో విక్రయించిన 1,40,000 ఎస్‌యువీలను రీకాల్‌ చేస్తున్నట్లు ప్రకటించింది. ఎయిర్‌బ్యాగ్ సమస్య కారణంగా వీటిని రీకాల్ చేస్తున్నట్లు కంపెనీ వివరించింది. అమెరికా ఆటో భద్రతా నియంత్రణా సంస్థకు ఆదేశం మేరకు హ్యుందాయ్‌ ఈ రీకాల్ చేసింది.

కాగా.. ఇప్పటి వరకు ఎయిర్‌బ్యాగ్‌ లోపం వల్ల ఎవరు గాయపడినట్లు సమాచారం లేదని హ్యుందాయ్ తెలిపింది. డ్రైవర్‌ స్టీరింగ్‌ కాలమ్ వద్ద ఉండే బోల్టులకు సంబంధించిన లోపాలను గుర్తించామని, తాము విక్రయించిన హ్యుందాయ్ టక్సన్ కాంపాక్ట్‌ స్పోర్ట్స్ యుటిలిటీ వెహికల్‌లో ఈ సమస్యను గుర్తించామని కంపెనీ పేర్కొంది.

అమెరికాలో విక్రయించిన 1,37,500 యూనిట్లు మరియు పోర్టారికోలో విక్రయించిన 3,500 యూనిట్ల టక్సన్ వాహనాలను ఈ రీకాల్‌‌కు వర్తిస్తాయి. వాస్తవానికి ఈ విషయం హ్యుందాయ్‌ దృష్టికి 2013 డిసెంబర్‌లో వచ్చింది. కారు యజమానులు తమ సమీపంలోని డీలర్ల వద్దకు కారును చూపించుకోవాలని యజమానులను కోరింది.