బజాజ్ ఆర్ఈ60 ప్రొడక్షన్ వెర్షన్ ఆవిష్కరణ; వివరాలు

భారత సర్కార్ ఇటీవలే క్వాడ్రిసైకిళ్లకు అనమతి ప్రకటించిన నేపథ్యంలో, బజాజ్ ఆటో తమ ఆర్ఈ60 క్వాడ్రిసైకిల్‌ను వాణిజ్య పరంగా విడుదల చేసేందుకు సన్నాహాలు ముమ్మరం చేస్తోంది. ఈ దిశలో భాగంగానే, ప్రస్తుతం గ్రేటర్ నోయిడాలో జరుగుతున్న 2014 ఢిల్లీ ఆటో ఎక్స్‌పోలో కంపెనీ తమ బజాజ్ ఆర్ఈ60 ప్రొడక్షన్ వెర్షన్‌ను ఆవిష్కరించింది.

వివిధ రంగులు మరియు విభిన్నమైన బాడీ గ్రాఫిక్స్‌తో తయారు చేసిన సరికొత్త ఆర్ఈ60 క్వాడ్రిసైకిల్‌ను కంపెనీ ప్రదర్శనకు ఉంచింది. అంతేకాకుండా, ఈ ప్రొడక్షన్ వెర్షన్‌కు సంబంధించిన మరిన్ని వివరాలను కూడా కంపెనీ వెల్లడి చేసింది.

బజాజ్ ఆర్ఈ60 గరిష్ట వేగం గంటకు 70 కిలోమీటర్లు. ఇది మూడు విభిన్న ఇంజన్ వేరియంట్లలో (రెగ్యులర్ పెట్రోల్ యూనిట్, ఎల్‌పిజి యూనిట్ మరియు సిఎన్‌జి యూనిట్) లభ్యం కానుంది. ఇది లీటరుకు 37 కిలోమీటర్ల మైలేజీనిస్తుందని కంపెనీ పేర్కొంది. ఇది ప్రతి కిలోమీటరుకు 60 గ్రాముల కర్భన ఉద్ఘారాలను విడుదల చేస్తుంది.