ఎక్సైజ్ డ్యూటీ రాయితీ గడువును పొడగించనున్న సర్కార్!

గతంలో కాంగ్రెస్ ప్రభుత్వం ప్రవేశపెట్టిన మధ్యంతర బడ్జెట్‌లో ఆటోమొబైల్ వాహనాలపై తగ్గించిన ఎక్సైజ్ సుంకాలను, బిజెపి సర్కారు ఈ ఏడాది డిసెంబర్ వరకూ పొడగించిన సంగతి తెలిసినదే. అయితే, ఈ ఎక్సైజ్ రాయితీలను వచ్చే ఏడాది మార్చ్ వరకూ పొడగించేందుకు ప్రభుత్వం యోచిస్తున్నట్లు తెలుస్తోంది.

ఈ మేరకు, ఎక్సైజ్ రాయితీలను మార్చ్ 2015 వరకూ పొడగించాలని కోరుతూ కేంద్ర ఆర్థిక మంత్రిత్వ శాఖకు భారీ పరిశ్రమల మంత్రిత్వ శాఖ ఓ ప్రతిపాదనను పంపించనుంది. వాహనాల తయారీ సంస్థలకు ఊరట కలిగించేలా, ఈ రాయితీలను పొడగించే అంశంపై చర్చలు జరుపుతున్నామని భారీ పరిశ్రమల శాఖా మంత్రి అనంత్ గీతె తెలిపారు.

మధ్యంతరో బడ్జెట్‌లో చిన్న కార్లు, ద్విచక్ర వాహనాలు మరియు వాణిజ్య వాహనాలపై 12 శాతం ఉన్న ఎక్సైజ్ డ్యూటీని 8 శాతానికి తగ్గించారు (మొత్తం 4 శాతం తగ్గింపు విధించారు). అలాగే, మిడ్-సైజ్ సెడాన్లపై సుంకాన్ని 24 శాతం నుంచి 20 శాతానికి తగ్గించారు (4 శాతం తగ్గింపు). ఎస్‌యూవీలపై సుంకాన్ని 30 శాతం నుంచి 24 శాతానికి తగ్గించిన (6 శాతం తగ్గింపు) విషయం తెలిసినదే. ప్రస్తుత ఎక్సైజ్ డ్యూటీ రేట్లు ఈ ఏడాది చివరి వరకు అమల్లో ఉంటాయి.