హోండా కార్స్ ఇండియాలో కొత్తగా 1000 కొలువులు

జపాన్‌కు చెందిన ప్రముఖ ఆటోమొబైల్ దిగ్గజం హోండ మోటర్స్‌ కంపెనీ ఈ ఆర్థిక సంవత్సరం చివరి నాటికి భారత్‌లో 1,000 మందికి కొత్తగా ఉపాధి అవకాశాలు కల్పించాలని నిర్ణయించింది. రాజస్థాన్‌లోని తపుకరా ప్లాంట్‌లో హోండా ఈ ఆర్థిక సంవత్సరంలో ముగిసే నాటికి సెకండ్ షిఫ్టులో ఉత్పత్తి ప్రారంభించనుంది.

జపనీస్ హోండా మోటార్‌ కంపెనీకి చెందిన పూర్తి భారతీయ అనుబంధ సంస్థ అయిన హోండా కార్స్‌ ఇండియా లిమిటెడ్‌ (హెచ్‌సిఐఎల్‌) 2014-15 ఆర్థిక సంవత్సరంలో అమ్మకాలు 50 శాతం పెంచుకుని, 2 లక్షల యూనిట్లను చేరుకోవాలనే లక్ష్యంతో ముందుకు సాగిపోతోంది.

రాజస్థాన్‌లోని తపుకారా ప్లాంట్‌లో ఉత్పత్తి సామర్థ్యాన్ని విస్తరించడానికి పెద్ద ఎత్తున మానవ వనరులు అవసరం అవుతుంది. తమ అంచనా ప్రకారం ఈ ఆర్థికసంవత్సరం ముగిసే నాటికి సుమారు 800 - 1000 మందిని ఈ ప్లాంట్ కోసం రిక్రూట్‌మెంట్‌ చేసుకుంటామని హెచ్‌సిఐఎల్‌ సీనియర్‌ వైస్‌ ప్రెసిడెంట్‌ (మార్కెటింగ్‌ అండ్‌ సేల్స్‌) జ్ఞానేశ్వర్‌ సేన్‌ వెల్లడించారు.

ఈ ప్లాంట్‌లో రెండవ షిఫ్టును ప్రారంభించడం ద్వారా కంపెనీ ఉత్పత్తి సామర్థ్యాన్ని 1.20 లక్షల యూనిట్లకు పెంచనుంది. అలాగే 2016-17 నాటికి ఈ సామర్థ్యాన్ని 3 లక్షల యూనిట్లకు తీసుకువెళ్లాలని హోండా సన్నాహాలు చేస్తోంది. తపుకరా ప్లాంట్‌ కోసం సుమారు రూ.3,526 కోట్ల వరకు పెట్టుబడులను వెచ్చించామని ఆయన తెలిపారు.