హోండా మొబిలియో 5800 బుకింగ్స్

హోండా కార్స్ ఇండియా భారత మార్కెట్లో విడుదల చేసిన తమ మొట్టమొదటి ఎమ్‌పివి (మల్టీ పర్సస్ వెహికల్) 'హోండా మొబిలియో' (Honda Mobilio) హాట్ కేకుల్లా అమ్ముడుపోతోంది. కేవలం రూ.6.49 లక్షల (పెట్రోల్ వెర్షన్, ఎక్స్-షోరూమ్. ఢిల్లీ) ప్రారంభ ధరకే విడుదలైన ఈ ఎమ్‌పివి డీజిల్ వెర్షన్‌లో కూడా లభ్యమవుతుండటంతో కొనుగోలుదారులు ఈ మోడల్‌పై ఆసక్తి కనబరుస్తున్నారు.

హోండా మొబిలియోకి ఇప్పటి వరకు 5,800 ఆర్డర్లు వచ్చినట్లు సమాచారం. జులై 8వ తేదీ నుంచే హోండా తమ మొబిలియో కోసం ప్రీ బుకింగ్స్‌ను స్వీకరించడం ప్రారంభించిన సంగతి తెలిసినదే. ఈ ట్రెండ్ చూస్తుంటే, హోండా మొబిలియో వెయిటింగ్ పీరియడ్ ఎక్కువయ్యే సూచనలు కనిపిస్తున్నాయి.

ఇక మొబిలియో విషయానికి వస్తే.. పెద్ద కుటుంబాలను టార్గెట్ చేసుకొని హోండా ప్రవేశపెట్టిన ఈ ఫ్యామిలీ కారులో 7 సీట్లు (2+3+2) ఉంటాయి. ఇది పెట్రోల్ మరియు డీజిల్ వెర్షన్‌లో లభిస్తుంది. హోండా కార్స్ ఇండియాకు భారత్‌లో ఇది మూడవ డీజిల్ కారు.

హోండా మొబిలియోలో స్టయిలిష్ స్పోర్టీ వేరియంట్‌ను కోరుకునే వారి కోసం కంపెనీ ఇందులో మొబిలియో ఆర్ఎస్ పేరిట ఓ కొత్త వెర్షన్‌ను విడుదల చేయనుంది. ఈ వేరియంట్‌లో ప్రొజెక్టర్ ల్యాంప్స్, ఎల్ఈడి పొజిషనింగ్ ల్యాంప్స్ వంటి ప్రీమియం ఫీచర్లుంటాయి. ఇదికేవలం డీజిల్ వెర్షన్లో మాత్రమే లభ్యం కానుంది. అయితే, ఇది అందుబాటులోకి రావటానికి మరో 3 నెలల సమయం పడుతుంది. సెప్టెంబర్ 2014 నుంచి ఈ స్పోర్టీ వెర్షన్ మొబిలియో డెలివరీలు ప్రారంభమవుతాయని కంపెనీ తెలిపింది. మొబిలియో వేరియంట్లు ధరలు, ఇలా ఉన్నాయి:

పెట్రోల్ వెర్షన్ ధరలు
హోండా మొబిలియో ఈ - రూ.6.49 లక్షలు
హోండా మొబిలియో ఎస్ - రూ.7.50 లక్షలు
హోండా మొబిలియో వి - రూ.8.76 లక్షలు
(అన్ని ధరలు ఎక్స్-షోరూమ్, ఢిల్లీ)

డీజిల్ వెర్షన్ ధరలు
హోండా మొబిలియో ఈ - రూ.7.89 లక్షలు
హోండా మొబిలియో ఎస్ - రూ.8.60 లక్షలు
హోండా మొబిలియో వి - రూ.9.76 లక్షలు
హోండా మొబిలియో ఆర్ఎస్ - రూ.10.86 లక్షలు
(అన్ని ధరలు ఎక్స్-షోరూమ్, ఢిల్లీ)