25 లక్షల ఉత్పత్తి మార్కును దాటిన మారుతి కె-సిరీస్ ఇంజన్స్

భారతదేశపు అగ్రగామి ప్యాసింజర్ కార్ల తయారీ సంస్థ మారుతి సుజుకి ఇండియా, దేశీయ విపణిలో విక్రయిస్తున్న కార్లలో పెట్రోల్ వెర్షన్ కార్లే అధికంగా ఉన్న సంగతి మనందరికీ తెలిసినదే. ఈ పెట్రోల్ వెర్షన్ కార్లలో కంపెనీ పరిచయం చేసిన అధునాతన కె-సిరీస్ ఇంజన్లను అతి తక్కువ సమయంలోనే అత్యం పాపులారిటీని దక్కించుకున్నాయి.

మారుతి సుజుకి ఇండియా ఇప్పటి వరకు 25 లక్షల కె-సిరీస్ పెట్రోల్ ఇంజన్లను ఉత్పత్తి చేసింది. ప్రస్తుతం మారుతి విక్రయిస్తున్న ఆల్టో కె10, వ్యాగన్ఆర్, సెలెరియో, స్విఫ్ట్, డిజైర్ మొదలైన మోడళ్లలో ఈ కె-సిరీస్ పెట్రోల్ ఇంజన్లను ఉపయోగిస్తున్నారు.

మారుతి సుజుకి తొలిసారిగా తమ కె-సిరీస్ పెట్రోల్ ఇంజన్‌ను 2008లో ఏ-స్టార్ కారులో పరిచయం చేసింది. ఆ తర్వాత అనేక మోడళ్లలో (ఎర్టిగా ఎమ్‌పివిలో కూడా) ఈ పెట్రోల్ వెర్షన్ కె-సిరీస్ ఇంజన్లను ఉపయోగించడం ప్రారంభించారు.

మరికొద్ది రోజుల్లో మారుతి సుజుకి విడుదల చేయనున్న సియాజ్ సెడాన్‌లో కూడా కె-సిరీస్ పెట్రోల్ ఇంజన్‌ను ఉపయోగించనున్నారు. మారుతి సుజుకి ఎర్టిగాలో ఉపయోగిస్తున్న 1.4 లీటర్ కె-సిరీస్ ఇంజన్‌నే ఈ కొత్త సుజుకి సియాజ్ సెడాన్‌లో ఉపయోగించవచ్చని అంచనా.