సెకండ్ హ్యాండ్ కార్ల వ్యాపారం ప్రారంభించిన మెర్సిడెస్ బెంజ్

జర్మన్ లగ్జరీ కార్ కంపెనీ మెర్సిడెస్ బెంజ్ ఇండియా, దేశీయ విపణిలో సెకండ్ హ్యాండ్ కార్ వ్యాపారాన్ని ప్రారంభించింది. 'మెర్సిడెస్ బెంజ్ సర్టిఫైడ్' బ్రాండ్ క్రింద కంపెనీ ప్రీ-ఓన్డ్ (సెకండ్ హ్యాండ్) లగ్జరీ కార్లను విక్రయించనుంది.

ఈ సందర్భంగా మెర్సిడెస్ బెంజ్ ఇండియా మేనేజింగ్ డైరెక్టర్, ఛీఫ్ ఎగ్జిక్యూటివ్ ఎబర్‌హార్డ్ కెర్న్ మాట్లాడుతూ.. సెకండ్ హ్యాండ్ మెర్సిడెస్ బెంజ్ కార్లకు గిరాకీ పెరుగుతోందని, మెర్సిడెస్ బెంజ్ సర్టిఫైడ్ ద్వారా ఈ డిమాండ్‌ను తీర్చుతామని చెప్పారు.

ముంబై, బెంగుళూరు, పూనే, ఢిల్లీ, మొహాలీ, ఛండీఘడ్, కొచ్చి, చెన్నై మరియు హైదరాబాద్‌లలో కంపెనీ మొత్తం 12 మెర్సిడెస్ బెంజ్ సర్టిఫైడ్ ప్రీ-ఓన్డ్ కార్ షోరూమ్‌లను ప్రారంభించింది. వీటితో పాటుగా 150 డిస్‌ప్లే బేలను కూడా కంపెనీ ప్రారంభించింది, ఈ సంఖ్యను 2015 చివరి నాటికి 250కు పెంచనున్నారు.

మెర్సిడెస్ బెంజ్ సర్టిఫైడ్ ప్రీ-ఓన్డ్ కార్ బ్రాండ్‌ను ప్రత్యేకించి ఇండియన్ మార్కెట్ కోసం తయారు చేశామని, ఎవరైనా పాత మెర్సిడెస్ బెంజ్ కారును కొనుగోలు చేసి, ఐదు రోజులు ఉపయోగించిన తర్వాత, వారు ఆ కారుతో సంతృప్తి చెందకపోయినట్లయితే, కారును తిరిగి వెనక్కి ఇచ్చేయవచ్చని, అయితే ఈ సౌకర్యం కేవలం ఐదేళ్లు కన్నా తక్కువ వయస్సు కలిగిన కార్లకు మాత్రమే వర్తిస్తుందని కంపెనీ తెలిపింది.