టాటా నానో అత్యంత విశ్వసనీయమైన కార్ బ్రాండ్

ప్రపంచంలో కెల్లా అత్యంత చవకైన కారుగా రికార్డుకెక్కిన 'టాటా నానో', ఇప్పుడు మరో అరుదైన రికార్డును సొంతం చేసుకుంది. ఇది భారతదేశంలో కెల్లా అత్యంత విశ్వసనీయమైన కారుగా గుర్తింపు తెచ్చుకుంది. 'బ్రాండ్ ట్రస్ట్ రిపోర్ట్' ద్వారా వెల్లడించబడిన నివేదికలో టాటా నానో హ్యాచ్‌బ్యాక్ విభాగంలో భారతదేశంలో కెల్లా అత్యంత విశ్వసనీయమైన ఆటోమొబైల్ బ్రాండ్‌‌గా గుర్తింపు పొందింది.

గడచిన సంవత్సరంతో పోల్చుకుంటే, ఈ ఏడాది టాటా నానో మరో 50 ర్యాంకులు అధికంగా సంపాధించుకుంది. టాటా నానో తన విశ్వనీయతా సూచీని మరింత పెంచుకుని, వరుసగా రెండవ సంవత్సరం కూడా అగ్రస్థానంలో నిలవడం గమనార్హం. కామ్నిసీంట్ గ్రూప్ కంపెనీ అయిన టిఆర్ఏ ఈ బ్రాండ్ ట్రస్ట్ రిపోర్ట్, ఇండియా స్టడీ 2014ను ప్రచురించింది.

ఇకపోతే ఎస్‌యూవీ/ఎమ్‌యూవీ విభాగంలో గడచిన సంవత్సరంలో అగ్రస్థానంలో ఉన్న టాటా సఫారీని ఈ ఏడాది మహీంద్రా స్కార్పియో ఆక్రమించుకుంది. మొత్తం 26 బ్రాండ్లలో 10 హ్యాచ్‌బ్యాక్ విభాగానికి చెందినవి కాగా, 9 ఎస్‌యూవీ లేదా ఎమ్‌యూవీ విభాగానికి చెందినవి మరియు మిగిలిన 7 సెడాన్ విభాగానికి చెందినవి. ఇందులో ఏడు బ్రాండ్‌లు పూర్తిగా కొత్తవి (2014లో జాబితాలో తొలిసారిగా ప్రవేశించినవి).