మీ కారుకు టైర్ ప్రెజర్ మోనిటరింగ్ సిస్టమ్ కావాలా.. అయితే ఇదిగో..

కార్ ఇన్ఫోటైన్‌మెంట్ సిస్టమ్‌ల తయారీలో ప్రసిద్ధి చెందిన బ్లావ్‌పంక్ట్, భారత్‌లోని కార్ల కోసం ఓ సరికొత్త టైర్ ప్రెజర్ మోనిటరింగ్ (టిపిఎమ్ఎస్) సిస్టమ్‌ను పరిచయం చేసింది. సాధారణంగా, విలాసవంతమైన కార్లలో ఈ ఫీచర్ స్టాండర్డ్‌గా లభిస్తుంటుంది. కానీ బేసిక్ కార్లలో ఈ ఫీచర్ అందుబాటులో ఉండదు.

ఈ నేపథ్యంలో, బేసిక్ కార్లలో సైతం టైర్ ప్రెజర్‌ను ఆటోమేటిక్‌గా పర్యవేక్షించేందుకు వీలుగా బ్లావ్‌పంక్ట్ ఈ సరికొత్త సిస్టమ్‌ను పరిచయం చేసింది. బ్లావ్‌పంక్ట్ టిపిఎమ్ఎస్ కిట్‌లో ఓ డిజిటల్ డిస్‌ప్లే యూనిట్ మరియు నాలుగు వైర్‌లెస్ సెన్సార్లు ఉంటాయి. ఈ నాలుగు సెన్సార్లను నాలుగు టైర్ వాల్వ్‌లకు క్యాప్‌ల మాదిరిగా అమర్చుకోవాలి.

బ్లావ్‌పంక్ట్ టిపిఎమ్ఎస్ వలన మీ కారుకు సంబంధించి ఏ టైరులో ఎంత మోతాదులో గాలి ఉందో తెలుసుకోవటం కూడా చాలా సులువు అవుతుంది. అంతేకాకుండా.. ఈ సిస్టమ్ వలన టైర్లలో గాలిని ఎప్పటికప్పుడు సులువుగా చెక్ చేసుకుంటూ తద్వారా టైర్లపై పడే అదనపు భారాన్ని తగ్గించడం ద్వారా టైరు జీవితకాలాన్ని కూడా పెంచుకోవటంలో ఈ సిస్టమ్ సహకరిస్తుంది.