2-5 ఏళ్లలో అందుబాటులోకి రానున్న గూగుల్ డ్రైవర్‌లెస్ కార్లు

అంతర్జాల దిగ్గజం గూగుల్ ఈ ఏడాది మే నెలలో ఆవిష్కరించిన తమ డ్రైవర్ రహిత (డ్రైవర్‌లెస్ లేదా సెల్ఫ్ డ్రైవింగ్) ప్రోటోటైప్ కారును ప్రస్తుతం కాలిఫోర్నియాలోని పబ్లిక్ రోడ్లపై టెస్టింగ్ చేస్తున్న సంగతి తెలిసినదే. ఈ అటానమస్ కార్లను మరో 2 నుంచి 5 ఏళ్లలోపు అందుబాటులోకి తీసుకువస్తామని గూగుల్ ప్రకటించింది.

ప్రస్తుతం తమ సెల్ఫ్ డ్రైవింగ్ కారు టెస్టింగ్ దశలో ఉందని, రోడ్డు సంకేతాలను గుర్తించేందుకు కొత్త సెన్సార్లను అభివృద్ధి చేస్తున్నామని గూగుల్ సెల్ఫ్ డ్రైవింగ్ కార్స్ హెడ్ క్రిస్ ఉర్మ్‌సన్ తెలిపారు. రోడ్డుపై వెళ్లే ఇతర కార్లు, పాదచారుల విషయంలో తమ సెల్ఫ్ డ్రైవింగ్ కారు ఎలా స్పందిస్తుందో అధ్యయనం చేసిన తర్వాత వీటిని అందుబాటులోకి తెస్తామని ఆయన తెలిపారు.

గూగుల్ తయారు చేసిన ఈ సెల్ఫ్ డ్రైవింగ్ కారులో స్టీరింగ్ వీల్, బ్రేక్స్, యాక్సిలరేటర్ ఉండవు. ఇవన్నీ కూడా కారులో ఉండే సాఫ్ట్‌వేర్, మెకానిక్స్ ద్వారా కంట్రోల్ చేయబడుతాయి. కారు పైభాగంలో మరియు ముందు వెనుక భాగాల్లో సెన్సార్లు, హెచ్‌డి సరౌండ్ కెమెరాలను ఇందులో ఉపయోగించారు. వీటితో పాటుగా మ్యాప్స్ సాయంతో కారు దానంతట అదే దిశానిర్దేశం చేసుకుంటుంది.

కారు ఏ రూట్లో వెళ్తుందో తెలిపేందుకు ఓ పెద్ద స్క్రీన్ ఉంటుంది. ప్రారంభ దశ కావటంతో ఈ డ్రైవర్ రహిత కారును వేగాన్ని గంటకు గరిష్టం 25 మైళ్ల (40 కెఎమ్‌పిహెచ్)కు మాత్రమే పరిమితం చేశారు. అయితే, గూగుల్ కో-ఫౌండర్ సెర్గీ బ్రిన్ తెలిపిన సమాచారం ప్రకారం, భవిష్యత్తులో ప్రొడక్షన్ మోడల్‌ను గరిష్టంగా గంటకు 100 మైళ్ల (160 కెఎమ్‌పిహెచ్) వేగంతో పరుగులు తీసేలా అభివృద్ధి చేయనున్నారు.

ప్రస్తుతం గూగుల్ డ్రైవర్‌లెస్ కారు టెస్టింగ్ దశలో ఉంది. గూగుల్ త్వరలోనే ఇలాంటి 100 ప్రోటోటైప్ కార్లను తయారు చేయనుంది. టెస్టింగ్ దశ విజయవంతంగా పూర్తయ్యి, అన్ని సెక్యూరిటీ సమస్యలు పరిష్కరించబడినట్లయితే, మరో రెండేళ్లలోనే ఇవి మనకు అందుబాటులోకి వస్తాయి.