100 కార్లు గుద్దుకున్నాయ్.. ఇద్దరు మృతి, 60 మందికి గాయాలు

దక్షిణ కొరియా రాజధాని సియోల్‌లో బుధవారం ఉదయం భారీ రోడ్డు ప్రమాదం జరిగింది. ఈ ప్రమాదంలో దాదాపు వందకు పైగా కార్లు ఇతర వాహనాలు నుజ్జునుజ్జయ్యాయి. ఇంచెయాన్ అంతర్జాతీయ విమానాశ్రయానికి సమీపంలో ఉన్న ఇయోంగ్‌జాంగ్ వంతెనపై వాహనాలను ఒకదాని వెనుక మరొకటి గుద్దుకుంటూ దాదాపు 4 కిలోమీటర్ల వందకు పైగా వాహనాలు ప్రమాదానికి గురయ్యాయి.

ఈ ప్రమాదంలో ఇద్దరు స్పాట్‌లోనే చనిపోగా దాదాపు 60 మందికి పైగా వ్యక్తులు తీవ్ర గాయాలపాలయ్యారు. వీరిలో కొందరి పరిస్థితి విషమంగా ఉన్నట్లు సమాచారం. దట్టమైన పొగమంచు కారణంగా రోడ్డు కనిపించక పోవటం వల్లనే ఈ ప్రమాదం జరిగినట్లు సమాచారం. గాయపడిన విదేశీయులు కూడా ఉన్నట్లు తెలుస్తోంది.

సముద్రంపై నిర్మించిన ఈ వంతెన ఎయిర్‌పోర్ట్ నుండి సియోల్‌కు కలుపబడి ఉంటుంది. దీని మొత్తం పొడవు 4,400 మీటర్లు. ఈ వంతెనపై డ్యామేజైన కార్లను పోలీసులు తొలగిస్తున్నారు. దట్టమైన పొగమంచు, తడిసిన రోడ్డు కారణంగానే ప్రమాద తీవ్రత ఎక్కువగా ఉన్నట్లు అధికారులు చెబుతున్నారు.

పొగమంచు కారణంగా దాదాపు 18 విమానాల టేకాఫ్ జాప్యం కాగా, సుమారు 7 విమానాల ల్యాండింగ్ ఆలస్యమైనట్లు సమాచారం. కాగా.. గతంలో 2006లో కూడా దక్షిణ కొరియాలో మరొక సీ-క్రాస్ బ్రిడ్జ్‌పై ఇలాంటి ప్రమాదమే జరగగా అందులో 11 మంది మృతి చెందగా, సుమారు 50 మందికి పైగా వ్యక్తులు గాయపడ్డారు.