స్పీడ్‌గా డ్రైవ్ చేస్తున్నారా..? మీ పేరెంట్స్‌కి మెసేజ్ వెళ్తుంది జాగ్రత్త!

కుర్రాళ్లకి కారు చేతికందితే, వారికి వేగానికి బ్రేకులు సైతం పనిచేయవు. స్పీడ్ అంటే మోజుపడే యువత, ఆ స్పీడ్ కారణంగానే ప్రాణాపాయాన్ని కొనితెచ్చుకుంటున్న రోజులివి. వీరి వేగాన్ని వారించే వారు లేకపోవటం లేదా వేగంగా నడుపుతుండటాన్ని తమ తల్లిదండ్రులు గుర్తించకపోవటమే ఇందుకు ప్రధాణ కారణంగా తెలుస్తోంది.

అందుకే, టీనేజ్ డ్రైవర్ల వేగానికి అడ్డుకట్ట వేసేందుకు ఓ ప్రత్యేక అప్లికేషన్ పుట్టుకొచ్చింది. యూనివర్సిటీ ఆఫ్ మిన్నెసోటా ఈ అప్లికేషన్‌ను రూపొందించింది. ఈ అప్లికేషన్ వాహన వేగాన్ని గుర్తించి, వాహనం నిర్ధిష్ట వేగాన్ని దాటినట్లయితే, నేరుగా వారి తల్లిదండ్రులకు సందేశాన్ని పంపించేందుకు సహకరిస్తుంది.

అమెరికాలోని మిన్నెసోటా విశ్వవిద్యాలయం అధ్యయనం ప్రకారం, టీనేజర్లలో అత్యధిక మరణాలు రోడ్డు ప్రమాదాల వల్లే జరుగుతున్నట్లు తేలింది. అందుకే టీనేజర్ల స్పీడ్ డ్రైవింగ్‌‌కు చెక్ పెట్టేందుకు ఈ యాప్‌ను డిజైన్ చేశారు. మనదేశంలో కూడా ఇలాంటి అప్లికేషన్ అందుబాటులోకి వస్తే ఎంత బాగుంటుందో కదా..!