క్లిష్టమైన ఆర్మీ పరీక్షలను పాసైన మహీంద్రా స్కార్పియో, టాటా సఫారీ

భారత సైన్యం తమ వాహనాలను అప్‌గ్రేడ్ చేసుకోవాలని చూస్తోందా..? తాజా పరిణామాలు చూస్తుంటే అవుననే అనిపిస్తోంది. ప్రస్తుతం మారుతి సుజుకి జిప్సీ వాహనాలను అధికంగా ఉపయోగిస్తున్న ఇండియన్ ఆర్మీ, తాజాగా మహీంద్రా, టాటా అందిస్తున్న వానాలను పరీక్షిస్తోంది.

ఆర్మీ నిర్వహించిన కీలక పరీక్షలలో మహీంద్రా స్కార్పియో, టాటా సఫారీ స్టోర్మ్ మోడళ్లు పాసైనట్లు సమాచారం. ఆర్మీ కోసం వాహనాలు తయారు చేయటానికి అనేక కంపెనీలు ఆసక్తి చూపినప్పటికీ, భారత సైన్యం మాత్రం మహీంద్రా, టాటా మోటార్స్ వాహనాలనే విశ్వసిస్తున్నట్లు తెలుస్తోంది.

ఆర్మీ ఉపయోగానికి అనువుగా ఉండేలా మహీంద్రా, టాటా తమ వాహనాలను మరింత ధృడంగా, అనేక ఆఫ్-రోడింగ్ ఫీచర్లతో వీటిని తయారు చేయనున్నాయి. టైర్లు మొదలుకొని ఇంజన్ పెర్ఫార్మెన్స్‌ వరకూ వివిధ అంశాలను ట్యూన్ చేసే అవకాశం ఉంది.