సోలార్ రూఫ్ టాప్ ప్రియస్ సెడాన్ ఆవిష్కరించిన టయోటా మోటార్స్

ఇలాంటి మోడల్ మొదటి సారిగా చూస్తున్నారు కదా... అతి త్వరలో సోలార్ రూఫ్ టాపుతో టయోటా తమ ప్రియస్ సెడాన్‌ను విపణిలోకి ప్రవేశపెట్టనుంది.

By Anil

Published: Saturday, March 4, 2017, 14:47 [IST]

ఎలక్ట్రానిక్ ఉపకరణాల తయారీ సంస్థ ప్యానాసోనిక్ టయోటా ప్రియస్ కోసం ప్రత్యేక సోలార్ రూఫ్ టాప్‌ను అభివృద్ది చేసింది. ఇది గరిష్టంగా 180వాట్స్ వరకు విద్యుత్ ఉత్పత్తి చేయగలదు. ఇప్పటికే ఇలాంటి నమూనాలు చాలా వరకు ముందుకు వచ్చాయి. అయితే కార్యరూపం దాల్చడంలో విఫలం చెందుతున్నాయి.

అయితే పానాసోనిక్ మరియు టయోటా భాగస్వామ్యంతో వచ్చిన ఈ సోలార్ రూఫ్ టాప్ ప్రియస్ విడుదలవుతుందా... లేదా అని చాలా మంది వేచి చూస్తున్నారు. దీని గురించి పూర్తి వివరాలు...

పానాసోనిక్ ఎలక్ట్రానిక్ ఉపకరణాల తయారీ సంస్థ కార్ల మీద సోలార్ రూఫ్ టాప్‌లను అభివృద్ది చేయడం నిమగ్నమయ్యింది. ఇప్పటికే పలు దశలలో అభివృద్ది చేస్తూ వచ్చిన రూఫ్ టాప్ ను టయోటా ప్రియస్ జపాన్ వెర్షన్ మీద ప్రయోగాత్మకంగా అందించింది.

ఇరు సంస్థలు భాగస్వామ్యంతో అభివృద్ది చేసిన సోలార్ రూఫ్ టాప్ సుమారుగా 180 వాట్ల విద్యుత్‌ను ఉత్పత్తి చేయగలదని వెల్లడైంది.

ప్లగ్-ఇన్ హైబ్రిడ్ సోలార్ రూఫ్ ప్రియస్ కారును బయట పార్క్ చేసినప్పుడు ఉత్పత్తయ్యే విద్యుత్‌తో గరిష్టంగా 5.95కిలోమీటర్ల వరకు ప్రయాణించవచ్చు. ప్రియస్ హైబ్రిడ్ వేరియంట్ యొక్క ఏరోడైనమిక్ రూఫ్ టాప్‌ను పోలి ఉండే విధంగా ఈ సోలార్ ప్యానెల్ తయారు చేయడం జరిగింది.

ఈ టయోటా ప్రియస్ ప్రైమ్ వేరియంట్లో 1.8-లీటర్ సామర్థ్యం గల నాలుగు సిలిండర్ల వివిటి ఇంజన్ ఎలక్ట్రిక్ మోటార్ల అనుసంధానంతో అందుబాటులో ఉంది.

ఇందులోని పెట్రోల్ ఇంజన్ 94బిహెచ్‌పి పవర్ మరియు 142ఎన్ఎమ్ గరిష్ట టార్క్ అదే విధంగా ఎలక్ట్రిక్ మోటార్ అనుసంధానం మొత్తం 120బిహెచ్‌పి పవర్ ఉత్పత్తి చేయగలదు.