కార్ల విక్రయాల్లో హోండా ను వెనక్కి నెట్టిన టాటా

దేశీయంగా ప్యాసింజర్ కార్ల విక్రయాలు మే 2017 లో 8.963 శాతం వరకు పెరిగాయి. అయితే ఏప్రిల్ 2017లో నమోదైన విక్రయాలు 14.68 శాతముతో పోల్చుకుంటే ప్యాసింజర్ కార్ల విక్రయాలు తగ్గుముఖం పట్టినట్లు సియామ్ వెల్లడించింది.

టాటా మరియు హోండా కార్ల విక్రయాల్లో ఊహించని మార్పులు చోటు చేసుకున్నాయి. తాజాగా టాటా విడుదల చేసిన టియాగో, టిగోర్ మరియు హెక్సాలకు పెరుగుతున్న డిమాండ్ కారణంగా హోండా మోటార్స్‌ను విక్రయాల పరంగా వెనక్కినెట్టి నాలుగవ స్థానాన్ని కైవసం చేసుకుంది.

సేల్స్ గణాంకాల మేరకు, గడిచిన మే 2017 లో టాటా మోటార్స్ 12,499 యూనిట్లను విక్రయించింది. అయితే ఇదే మాసంలో హోండా 11,278 యూనిట్లను విక్రయించింది. భారత దేశపు టాప్ 10 సెల్లింగ్ కార్ల తయారీ సంస్థల జాబితాలో హోండాను ఐదవ స్థానంలోకి నెట్టేసి, నాలుగవ స్థానాన్ని కైవసం చేసుకుంది టాటా.

ఈ ఏడాది హోండా సరికొత్త ఫేస్‌లిప్ట్ సిటి సెడాన్ మరియు డబ్ల్యూఆర్-వి క్రాసోవర్ కార్లను అందుబాటులోకి తెచ్చినప్పటికీ ఆశించిన మేర విక్రయాలు సాధించలేకపోయింది. భవిష్యత్తులో ప్రీమియమ్ ఉత్పత్తుల అభివృద్ది మరియు తయారీ మీద దృష్టి పెడతామని హోండా ఓ ప్రకటనలో పేర్కొంది.

జపాన్ దిగ్గజం హోండా మోటార్స్ సిటి మీద 33,000 బుకింగ్స్ మరియు డబ్ల్యూఆర్-వి మీద 18,000 ల యూనిట్ల బుకింగ్స్ నమోదు చేసుకుంది. ఈ రెండు మోడళ్ల మీద వెయిటింగ్ పీరియడ్ రెండు నెలలుగా ఉంది.

హోండా మోటార్స్ ఫలితాలను గమనించిన తరువాత దేశీయ ప్యాసింజర్ కార్ల పరిశ్రమలో కొద్ది కొద్దిగా పట్టును కోల్పోతున్నట్లు కనబడుతోంది. డబ్ల్యూఆర్-వి మరియు సిటి సెడాన్‌లను మినహాయిస్తే మరే ఇతర మోడళ్లకు ఆశించిన డిమాండ్ లభించడం లేదు.

టాటా మోటార్స్ విషయానికి వస్తే, ప్యాసింజర్ కార్ల పరిశ్రమలో రాణించేందుకు ప్రణాళికలు పూర్తిగా మార్చేసింది. ఇంపాక్ట్ అనే డిజైన్ ఫిలాసఫీ ఆధారంగా అభివృద్ది చేసిన కొత్త ఉత్పత్తులకు మంచి ఆదరణ లభిస్తోంది. మరియు ఇంపాక్ట్ డిజైన్ లక్షణాలతో ఉన్న కార్లకు డిమాండ్ అధికమవుతోంది.

టాటా మోటార్స్ మొత్తం విజయంలో టియాగో హ్యాచ్‌బ్యాక్‌దే ఎక్కువ వాటా. టియాగో విడుదలతో మార్కెట్ చూపు టాటా మోటార్స్ పై పడింది. దీనికి తోడు అరియా ఎమ్‌పీవీని రీడిజైన్ చేసి ఎమ్‌పివి మరియు ఆఫ్ రోడింగ్ లక్షణాలు మరియు అద్బుతమైన ఫీచర్లతో హెక్సా ను విడుదల చేసింది. హెక్సా కూడా స్థిరమైన ఫలితాలు సాధిస్తోంది.

టాటా మోటార్స్ చివరగా విడుదల చేసిన ఉత్పత్తి టాటా టిగోర్ సబ్ కాంపాక్ట్ సెడాన్. దేశీయ మార్కెట్లో సబ్ కాంపాక్ట్ సెడాన్ సెగ్మెంట్లో విడుదల చేయడానికన్నా విభిన్నమైన డిజైన్ లక్షణాలతో అభివృద్ది చేయడం మీద దృష్టిసారించి స్టైల్ బ్యాక్ ట్యాగ్ లైన్‌తో విడుదల చేసింది.

టియాగో, హెక్సా మరియు టిగోర్ రాకతో టాటా మోటార్స్ మంచి ఫలితాలను అందుకుంటోంది. పోటీ మార్కెట్లో మరింత నిలదొక్కుకునేందుకు ఇదే తరహా ఉత్పత్తులను తీసుకురావాలనే ఆలోచనలో ఉంది.

దేశీయ ప్యాసింజర్ కార్ల పరిశ్రమలో చక్కగా రాణిస్తున్న సెగ్మెంట్ కాంపాక్ట్ ఎస్‌యూవీ. ఈ సెగ్మెంట్లో ప్రస్తుతం ఉన్న మారుతి సుజుకి వితారా బ్రిజా మరియు ఫోర్డ్ ఎకోస్పోర్ట్ మరియు మహీంద్రా టియువి300 లకు పోటీగా నెక్సాన్ అనే కాంపాక్ట్ ఎస్‌యూవీని అతి త్వరలో మార్కెట్లోకి విడుదల చేయనుంది.

చిన్న కార్లు, ప్రీమియమ్ మరియు పెద్ద పరిమాణంలో ఉన్న ప్యాసింజర్ అన్ని వాహన సెగ్మెంట్లలో తమ ఉత్పత్తులను సమిష్టిగా తీసుకురావడంలో టాటా విజయం సాధించింది. హోండా మోటార్స్ విషయానికి వస్తే, చిన్న కార్ల సెగ్మెంట్‌ను ప్రక్కనపెట్టి ప్రీమియమ్ కార్ల మీద ఎక్కువ శ్రద్ద చూపుతోంది.