మొదటిసారి రోడ్డెక్కిన కియా గ్రాండ్ కార్నివాల్: ఇన్నోవా క్రిస్టాకు ఇక చుక్కలే

తొలిసారిగా పరీక్షల కోసం రోడ్డెక్కిన ఈ కియా గ్రాండ్ కార్నివాల్ 11 సీటర్ ప్రస్తుతం మార్కెట్లో ఉన్న టయోటా ఇన్నోవా క్రిస్టా ఎమ్‌పీవీకి సరాసరి పోటీనిస్తుంది. దీని గురించి మరిన్ని వివరాలు ఇవాళ్టి కథనంలో చూద్దాం రండి...

తాజాగా అందిన రిపోర్ట్స్ మేరకు, కియా మోటార్స్ ఇండియన్ ఎమ్‌పీవీ మార్కెట్లోకి కియా గ్రాండ్ కార్నివాల్ మరియు క్రాసోవర్ మార్కెట్లోకి స్టోనిక్ కార్లను దేశీయ మార్కెట్ కోసం ఖరారు చేసింది. అందులో గ్రాండ్ కార్నివాల్ మోడల్‌కు రహదారి పరీక్షలు నిర్వహింస్తుండగా మీడియా కంటబడింది.

తొలిసారి పట్టుబడిన కియా గ్రాండ్ కార్నివాల్ 11 సీటర్ పూర్తిగా తెలుపు రంగులో పట్టుబడింది. అదే విధంగా ముందు మరియు వెనుక వైపున ఉన్న తాత్కాలిక రిజిస్ట్రేషన్ నెంబర్ ప్లేటును గుర్తించవచ్చు. ఈ మోడల్ ఆటో ఎక్స్ పో 2018లో ఆవిష్కరించిన మోడల్‌నే పోలి ఉంది.

కియా గ్రాండ్ కార్నివాల్ ఒక లగ్జరీ ఎమ్‌పీవీ, ఉత్తర అమెరికా మార్కెట్లో దీనిని సెడోనా అని పిలుస్తారు. కియా గ్రాండ్ కార్నివాల్ 5-డోర్ ఎమ్‌పీవీ మరియు అంతర్జాతీయ మార్కెట్లో ఇది 7, 8 మరియు 11-సీటింగ్ లేఔట్లో లభ్యమవుతుంది. అయితే, ఇండియన్ మార్కెట్లోకి 11-సీటర్ వెర్షన్ లాంచ్ చేసే అవకాశం ఉంది.

కియా గ్రాండ్ కార్నివాల్ ఎమ్‌పీవీలో అత్యంత విలాసవంతమైన లగ్జరీ ఫీచర్లు ఉన్నాయి. అందులో, డ్యూయల్-సన్‌రూఫ్, పవర్ స్లైడింగ్ రియర్ డోర్లు మరియు త్రీ-జోన్ ఎయిర్ కండీషనింగ్ వంటి ఫీచర్లు ఉన్నాయి.

డిజైన్ పరంగా గ్రాండ్ కార్నివాల్ ఫ్రంట్ డిజైన్‌లో టైగర్ నోస్ సిగ్నేచర్ ఫ్రంట్ గ్రిల్ ఉంది. ఎక్ట్సీరియర్ ఓవరాల్ డిజైన్ లగ్జరీగా కనిపిస్తుంది మరియు ఎమ్‌పీవీలో స్టైలిష్ అల్లాయ్ వీల్స్ ఉన్నాయి. దీనిని తక్కువ ధరలో అందించేందుకు పూర్తి స్థాయిలో ఇండియాలోనే తయారు చేయనుంది.

సాంకేతికంగా కియా గ్రాండ్ కార్నివాల్ ఎమ్‌పీవీలో 2.2-లీటర్ కెపాసిటి గల డీజల్ ఇంజన్ కలదు. 6-స్పీడ్ ఆటోమేటిక్ ట్రాన్స్‌మిషన్‌తో లభించే ఇది గరిష్టంగా 200బిహెచ్‌పి పవర్ ప్రొడ్యూస్ చేస్తుంది.

కియా గ్రాండ్ కార్నివాల్ ఎమ్‌పీవీ ఒక్కసారి పూర్తి స్థాయిలో విపణిలోకి లాంచ్ అయితే, మార్కెట్లో ఉన్న సెగ్మెంట్-లీడర్ టయోటా ఇన్నోవా క్రిస్టా ఎమ్‌పీవీకి గట్టి పోటీనివ్వనుంది. గ్రాండ్ కార్నివాల్ ఎమ్‌పీవీలోని మూడవ వరుస సీటింగ్ అత్యంత విశాలంగా, సౌకర్యవంతంగా ఉండవచ్చు.

కియా మోటార్స్ గ్రాండ్ కార్నివాల్‌తో పాటు స్టోనిక్ క్రాసోవర్ కారును కూడా ఖరారు చేసింది. అదే విధంగా ఇటీవల బెంగళూరులో సెరాటో ప్రమియం సెడాన్ కారును రహస్యంగా పరీక్షిస్తుండగా డ్రైవ్‍స్పార్క్ బృందం గుర్తించింది. 2019 కోసం పలు విభిన్న మోడళ్లను సిద్దం చేసుకుంటున్నట్లు తెలుస్తోంది.

డ్రైవ్‌స్పార్క్ తెలుగు అభిప్రాయం!

కియా గ్రాండ్ కార్నివాల్ ఖచ్చితంగా టయోటా ఇన్నోవా క్రిస్టా స్థానాన్ని భర్తీ చేస్తుంది. పలు రకాల సీటింగ్ ఆప్షన్స్ దీనిని సక్సెస్‌కు బాగా కలిసిరానుంది. అయితే, ధరలను మాత్రం ఇన్నోవా క్రిస్టా పోటీగా అత్యంత చాకచక్యంగా నిర్ణయించాల్సి ఉంటుంది. కియా గ్రాండ్ కార్నివాల్ ధరల శ్రేణి రూ. 18 లక్షల నుండి రూ. 25 లక్షల మధ్య ఉండే అవకాశం ఉంది.