టాటా గ్రావిటాస్ ఇంటీరియర్ లీక్స్; స్పై పిక్స్ మరియు లేటెస్ట్ డీటేల్స్

తాజాగా కార్‌వాలే విడుదల చేసిన స్పై చిత్రాలలో, టాటా గ్రావిటాస్ ఇంటీరియర్స్ లీక్ అయ్యాయి. ఆటో ఎక్స్‌పోలో టాటా మోటార్స్ ప్రదర్శించిన గ్రావిటాస్ కాన్సెప్ట్‌కు ప్రొడక్షన్‌కు సిద్ధంగా ఉన్న గ్రావిటాస్‌కు అనేక పోలికలు ఉన్నాయి. ఇందులో డాష్‌బోర్డ్ మధ్యలో పెద్ద ఫ్లోటింగ్ టచ్‌స్క్రీన్ డిస్‌ప్లే యూనిట్ ఉంటుంది.

ప్రస్తుతం టాటా మోటార్స్ అందిస్తున్న హారియర్ ఎస్‌యూవీకి ఎక్స్‌టెండెడ్ వెర్షన్‌గా గ్రావిటాస్ మార్కెట్లోకి రానుంది. ఈ నేపథ్యంలో, హారియర్ మరియు గ్రావిటాస్ మోడళ్లలో ఉపయోగించే టెక్నాలజీ, పరికరాలు దాదాపు ఒకేలా ఉండే అవకాశం ఉంది. కాకపోతే, టాటా గ్రావిటాస్ ఎస్‌యూవీ త్రీ రో సీటింగ్ కాన్ఫిగరేషన్‌తో విభిన్న సీటింగ్ లేఅవుట్లలో అందుబాటులోకి వచ్చే అవకాశం ఉంది.

టాటా గ్రావిటాస్ టెస్టింగ్ వాహనంలోని ఇంటీరియర్స్‌లో మౌంటెడ్ కంట్రోల్స్‌తో కూడిన మల్టీఫంక్షనల్ స్టీరింగ్, ఇరువైపులా అనలాగ్ డయల్స్‌తో కూడిన మల్టీ-ఇన్ఫర్మేషన్ డిస్‌ప్లే, క్లైమేట్ కంట్రోల్ స్టాక్ మరియు డ్రైవ్ మోడ్ సెలక్షన్ కోసం రోటరీ డయల్ వంటి ఫీచర్లను గమనించవచ్చు.

అయితే, హారియర్‌లో కనిపించిన మాన్యువల్ పార్కింగ్ బ్రేక్ గ్రావిటాస్ కోల్పోయినట్లుగా కనిపిస్తోంది. టాటా గ్రావిటాస్‌లోని మ్యాన్యువల్ పార్కింగ్ బ్రేక్‌నుఆటో-హోల్డ్ ఫంక్షన్‌తో కూడిన ఎలక్ట్రానిక్ పార్కింగ్ బ్రేక్‌తో భర్తీ చేసినట్లు తెలుస్తోంది. అలాగే, ఇందులో సన్‌రూఫ్ కూడా లేదని తెలుస్తోంది. బహుశా టాప్-ఎండ్ వేరియంట్లలో ఆఫర్ చేసే అవకాశం ఉంది.

మూడవ వరుసలోని ప్రయాణీకులకు మరింత హెడ్‌రూమ్ ఉండేలా వెనుక డిజైన్‌లో మార్పులు చేశారు. టాటా గ్రావిటాస్ ఎస్‌యూవీ స్టాండర్డ్ టాటా హారియర్ ఎస్‌యూవీ కంటే 62 మి.మీ పొడవుగా ఉంటుంది. ఫలితంగా, వెనుక వరుసలో ఎక్కువ స్థలం లభిస్తుంది.

ఫ్రంట్ అండ్ రియర్ బంపర్ డిజైన్‌లో కూడా స్వల్ప మార్పులు ఉండే అవకాశం ఉంది. ఇందులో స్ప్లిట్-హెడ్‌ల్యాంప్ సెటప్‌తో సహా పలు ఇతర ఫీచర్లను హారియర్ ఎస్‌యూవీ నుండి గ్రహించనున్నారు. అయితే, దీని టెయిల్-ల్యాంప్స్ డిజైన్ మాత్రం రివైజ్ చేసినట్లుగా అనిపిస్తుంది.

ఇకపోతే గ్రావిటాస్‌లోని ఇంజన్ మరియు ట్రాన్స్‌మిషన్ ఆప్షన్లను కూడా హారియర్ ఎస్‌యూవీ నుండి తీసుకోబడతాయి. ఇందులోని బిఎస్6 కంప్లైంట్ 2.0-లీటర్, ఫోర్ సిలిండర్, ‘క్రయోటెక్' డీజిల్ ఇంజన్ గరిష్టంగా 168 బిహెచ్‌పి పవర్‌ను మరియు 350 ఎన్ఎమ్ టార్క్ ఉత్పత్తి చేస్తుంది.

ఇది ఆప్షనల్ సిక్స్-స్పీడ్ ఆటోమేటిక్ లేదా స్టాండర్డ్ సిక్స్-స్పీడ్ మాన్యువల్ గేర్‌బాక్స్ ఆప్షన్లతో లభిస్తుంది. ఎస్‌యూవీని పొడగించిన కారణంగా పెరిగిన అదనపు బరువుకు తోడ్పడేందుకు వీలుగా గ్రావిటాస్‌లోని ఇంజన్‌ను కొంచెం ఎక్కువ స్టేట్ ట్యూన్‌తో ఆఫర్ చేయవచ్చని అంచనా.

టాటా గ్రావిటాస్ ఇంటీరియర్ స్పై చిత్రాలపై డ్రైవ్‌స్పార్క్ అభిప్రాయం.

టాటా గ్రావిటాస్ ఎస్‌యూవీ టెస్టింగ్‌ను కంపెనీ విస్తృతం చేయడాన్ని చూస్తుంటే, అతి త్వరలోనే ఇది భారత మార్కెట్లో విడుదల కావచ్చని తెలుస్తోంది. గ్రావిటాస్ మార్కెట్లో విడుదలైతే, ఇది ఈ విభాగంలో మహీంద్రా ఎక్స్‌యువి500 మరియు ఇటీవలే మార్కెట్లో విడుదలైన ఎమ్‌జి హెక్టర్ ప్లస్‌ వంటి మోడళ్లకు పోటీగా నిలుస్తుంది.

Source: Carwale