టాటా నెక్సాన్ కారును తెగ కొనేస్తున్నారు, కారణమేంటో తెలుసా?

తాజాగా, టాటా మోటార్స్‌కి చెందిన పూణేలోని రంజాంగవ్ ప్లాంట్‌లో తయారైన 1,50,000వ టాటా నెక్సాన్ కారును కంపెనీ విడుదల చేసింది. కంపెనీ ఈ కాంపాక్ట్ ఎస్‌యూవీని తొలిసారిగా 2017లో విడుదల చేసింది. టాటా నెక్సాన్ మొదటి 50,000 యూనిట్ల ఉత్పత్తి మైలురాయిని సెప్టెంబర్ 2018లో చేరుకుంది.

ఆ తర్వాత రెండవ 50,000 ఉత్పత్తి మైలురాయి సెప్టెంబర్ 2019లో చేరుకుంది. కాగా, ఈ ఏడాది కోవిడ్-19 మహమ్మారి వలన ఏర్పడి పరిస్థితులు, లాక్‌డౌన్ వంటి సవాళ్లు ఉన్నప్పటికీ, నెక్సాన్ అమ్మకాలు మాత్రం ప్రభావితం కాలేదు. గడచిన అక్టోబర్ నెలలో టాటా నెక్సాన్ ఎస్‌యూవీ అత్యధిక అమ్మకాలను సాధించినట్లు కంపెనీ ప్రకటించింది.

ఈ సందర్భాన్ని పురస్కరించుకొని, టాటా మోటార్స్ తమ సోషల్ మీడియాలో #Nexlevel150K అనే కాంపిటీషన్‌ను కూడా ప్రారంభించింది. ఈ పోటీలో వినియోగదారులు తమ నెక్సాన్ కాంపాక్ట్ ఎస్‌యూవీతో తమ ప్రయాణాన్ని, అనుభవాలను పంచుకోవాలని కంపెనీ కోరుతోంది.

ఇందులోని బెస్ట్ ఎంట్రీ పొందిన వారికి, టాటా నెక్సన్ మోడల్‌కి బ్రాండ్ అంబాసిడర్‌గా వ్యవహరిస్తున్న భారత క్రికెట్ జట్టు ప్రముఖ బ్యాట్స్‌మాన్ మరియు వైస్ కెప్టెన్ కెఎల్ రాహుల్‌ను కలిసే అవకాశాన్ని కంపెనీ కల్పించనుంది. అదనంగా, విజేతలకు 1,50,000 రూపాయల నగదు బహుమతి, రాహుల్ సంతకం చేసిన వస్తువులతో పాటు వివిధ రకాల బహుమతి వోచర్లను కంపెనీ అందించనుంది.

ఇక టాటా నెక్సాన్ విషయానికి వస్తే, ఈ కారు మార్కెట్లో మంచి విజయం సాధించడానికి అనేక కారణాలు ఉన్నాయి. టాటా నెక్సాన్ 2018లో అంతర్జాతీయంగా ప్రఖ్యాతి చెందిన సేఫ్టీ అక్రెడిటేషన్ బాడీ అయిన గ్లోబల్ ఎన్‌సిఎపి క్రాష్ టెస్టులో పూర్తి 5 స్టార్ అడల్డ్ సేఫ్టీ రేటింగ్‌ను అందుకున్న మొదటి భారతీయ కారు కావటం విశేషం.

ఇంజన్ ఆప్షన్స్ విషయానికి వస్తే, టాటా నెక్సాన్ పెట్రోల్ మరియు డీజిల్ ఇంజన్ ఆప్షన్లతో లభిస్తోంది. ఇందులో 1.2-లీటర్ 3-సిలిండర్ టర్బో-పెట్రోల్ ఇంజన్ 108 బిహెచ్‌పి పవర్‌ను మరియు 170 ఎన్ఎమ్ టార్క్‌ను ఉత్పత్తి చేస్తుంది. ఇకపోతే 1.5-లీటర్ 4-సిలిండర్ టర్బో-డీజిల్ ఇంజన్ 108 బిహెచ్‌పి పవర్‌ని మరియు 260 ఎన్ఎమ్ టార్క్‌ను ఉత్పత్తి చేస్తుంది.

ఈ రెండు ఇంజన్లు స్టాండర్డ్ సిక్స్-స్పీడ్ మాన్యువల్ గేర్‌బాక్స్ లేదా సిక్స్-స్పీడ్ ఏఎమ్‌టి ఆటోమేటిక్ గేర్‌బాక్స్‌తో అందుబాటులో ఉన్నాయి. ఈ కాంపాక్ట్-ఎస్‌యూవీలో ‘ఎకో', ‘సిటీ' మరియు ‘స్పోర్ట్' అనే మూడు డ్రైవింగ్ మోడ్స్ కూడా ఉంటాయి.

ప్రస్తుతం మార్కెట్లో టాటా నెక్సాన్ ధరలు రూ.6.99 లక్షల నుంచి రూ.12.70 లక్షల మధ్యలో (ఎక్స్-షోరూమ్) ఉన్నాయి. టాటా నెక్సాన్ ఈ విభాగంలో హ్యుందాయ్ వెన్యూ, మహీంద్రా ఎక్స్‌యువి300, మారుతి సుజుకి విటారా బ్రెజ్జా, కియా సోనెట్, టయోటా అర్బన్ క్రూయిజర్ మరియు మరికొద్ది రోజుల్లోనే విడుదల కానున్న నిస్సాన్ మాగ్నైట్ వంటి మోడళ్లకు పోటీగా నిలుస్తుంది.

టాటా నెక్సాన్ ఉత్పత్తి మైలురాయిపై డ్రైవ్‌స్పార్క్ అభిప్రాయం.

గ్లోబల్ ఎన్‌సిపి క్రాష్ టెస్టులో ఫైవ్ స్టార్ రేటింగ్ తెచ్చుకున్న టాటా నెక్సాన్, భారత మార్కెట్లో వాహన భద్రత కోసం ఓ సరికొత్త బెంచ్‌మార్క్ కారుగా నిలిచింది. ఈ కాంపాక్ట్ ఎస్‌యూవీ ఆకర్షణీయమైన డిజైన్‌తో పాటుగా అనేక ఫీచర్లను కూడా కలిగి ఉండి, కొనుగోలుదారులను ఆకట్టుకుంటోంది.