జనవరి 2021లో బెస్ట్ ఎస్‌యూవీలు ఇవే.. వీటిలో మీ ఫేవరేట్ ఏది?

మార్కెట్లో ఇప్పటికే ఉన్న మోడళ్లతో పాటుగా ఇటీవలి రెండు మూడు నెలల కాలంలో కొత్తగా మరిన్ని ఎస్‌యూవీలు వచ్చాయి. మరికొద్ది నెలల్లో రెనో కైగర్, ఫోక్స్‌వ్యాగన్ టైగన్, స్కొడా కుషాక్ మొదలైన ఎస్‌యూవీలు కూడా మార్కెట్లోకి రాబోతున్నాయి.

గడచిన జనవరి 2021 నెల ఎస్‌యూవీ విభాగంలో అమ్మకాలు జోరుగా సాగాయి. నిస్సాన్ మాగ్నైట్, కియా సోనెట్ వంటి కొత్త మోడళ్ల రాకతో, ఈ సెగ్మెంట్‌లో అమ్మకాలు మెరుగుపడ్డాయి. గత నెలలో హ్యుందాయ్ క్రెటా అత్యధికంగా అమ్ముడైన ఎస్‌యూవీగా మొదటి స్థానంలో ఉంది. డిసెంబర్ 2020లో విడుదలైన నిస్సాన్ మాగ్నైట్ కూడా టాప్ 10 జాబితాలో చోటు దక్కించుకుంది.

జనవరి 2020లో సరికొత్త రూపంలో వచ్చిన హ్యుందాయ్ క్రెటా ఎస్‌యూవీ, కస్టమర్లను చక్కగా ఆకర్షిస్తోంది. జనవరి 2020లో 6,900 యూనిట్లను విక్రయించిన హ్యుందాయ్ జనవరి 2021లో 12,284 యూనిట్లను విక్రయించి 78 శాతం వృద్ధిని నమోదు చేసింది. టాప్-10 ఎస్‌యూవీలలో క్రెటా నెంబర్ వన్ స్థానంలో ఉంది.

క్రెటా తర్వాతి స్థానాన్ని హ్యుందాయ్ వెన్యూ ఆక్రమించింది. జనవరి 2021లో హ్యుందాయ వెన్యూ అమ్మకాలు 11,779 యూనిట్లుగా నమోదై, అంతకు ముందు సంవత్సరం ఇదే సమయంతో పోల్చుకుంటే 74 శాతం పెరుగుదలను నమోదు చేసింది. ఈ ఏడాది హ్యుందాయ్ వెన్యూ ఎస్‌యూవీ ఓ ఫేస్‌లిఫ్ట్ మోడల్ తీసుకురావచ్చని సమాచారం.

మారుతి సుజుకి అందిస్తున్న విటారా బ్రెజ్జా ఈ జాబితాలో 3వ స్థానానికి పడిపోయింది. గతేడాది జనవరిలో ఈ మోడల్ అమ్మకాలు 10,134 యూనిట్లుగా ఉంటే, ఈ ఏడాది జనవరిలో 10,623 యూనిట్లు అమ్ముడయ్యాయి. అమ్మకాల పరంగా ఈ మోడల్ 4 శాతం స్వల్ప పెరుగుదలను చూసింది.

కియా మోటార్స్ అందిస్తున్న మిడ్-సైజ్ ఎస్‌యూవీ సెల్టోస్, మార్కెట్లోకి వచ్చిన ప్రారంభ నెలల్లో అగ్రస్థానాల్లో నిలిచింది. అయితే, ఇప్పుడు ఈ మోడల్ అమ్మకాలు క్రమంగా తగ్గుతున్నాయి. జనవరి 2021లో సెల్టోస్ అమ్మకాలు 34 శాతం తగ్గి 9,869 యూనిట్లుగా నమోదయ్యాయి.

కియా మోటార్స్ అందిస్తున్న కాంపాక్ట్ ఎస్‌యూవీ సొనెట్ అమ్మకాలు జనవరి 2021లో 8,859 యూనిట్లుగా నమోదయ్యాయి. టాటా మోటార్స్ అందిస్తున్న పాపులర్ నెక్సాన్ ఎస్‌యూవీ, అమ్మకారల పరంగా గత కొన్ని నెలలుగా అద్భుతమైన పనితీరును చూపుతోంది.

జనవరి 2021లో టాటా నెక్సాన్ అమ్మకాలు 8,225 యూనిట్లుగా నమోదయ్యాయి. జనవరి 2020లో ఈ మోడల్ అమ్మకాలు 3,382 యూనిట్లుగా ఉన్నట్లు కంపెనీ ప్రకటించింది. ఈ సమయంలో టాటా నెక్సాన్ అమ్మకాలు 143 శాతం పెరిగాయి.

మహీంద్రా అందిస్తున్న కాంపాక్ట్ ఎస్‌యూవీ ఎక్స్‌యూవీ300 అమ్మకాలు గత నెలలో 4,612 యూనిట్లుగా నమోదై 37 వృద్ధిని సాధించాయి. ఇదే సమయంలో, కంపెనీ విక్రయిస్తున్న స్కార్పియో అమ్మకాలు 5,316 యూనిట్ల నుండి 4,081 యూనిట్లకు పడిపోయి, 23 శాతం క్షీణతను నమోదు చేశాయి.

జనవరి 2021లో టొయోటా అందిస్తున్న అర్బన్ క్రూయిజర్ అమ్మకాలు 3075 యూనిట్లుగా నమోదయ్యాయి. కాగా, ఈ సమయంలో నిస్సాన్ మాగ్నైట్ కాంపాక్ట్ ఎస్‌యూవీ అమ్మకాలు 3,011 యూనిట్లుగా ఉన్నాయి. త్వరలో ఈ సెగ్మెంట్‌లో రెనో కైగర్ మార్కెట్లోకి ప్రవేశించనుంది.