మార్చి 2న హ్యుందాయ్ బేయోన్ క్రాసోవర్ ఆవిష్కరణ - వివరాలు

హ్యుందాయ్ బేయోన్ అత్యంత సరసమైన బి-సెగ్మెంట్ క్రాసోవర్ (లేదా ఎస్‌యూవీ)గా ఉంటుందని కంపెనీ పేర్కొంది. ఇది ఆసియా మార్కెట్లలో ఎంట్రీ లెవల్ ఎస్‌యూవీగా మంచి పాపులారిటీని దక్కించుకుంటుందని కంపెనీ ధీమాగా ఉంది.

ఇటీవల హ్యుందాయ్ విడుదల చేసిన బేయోన్ టీజర్ ఫొటోలను బట్టి చూస్తే, ఈ కారును పూర్తిగా సరికొత్త డిజైన్ లాంగ్వేజ్‌తో రూపొందించినట్లుగా తెలుస్తోంది. ఇందులోని షార్ప్ ఫ్రంట్ అండ్ రియర్ ప్రొఫైల్స్ ఈ కారుకి మంచి స్పోర్టీ రూపాన్ని ఇవ్వటంలో సహకరిస్తాయి.

బేయోన్ ముందు భాగంలో సన్నటి ఎల్ఈడి డిఆర్ఎల్ వెనుక భాగంలో బూమరాంగ్ ఆకారంలో ఉండే ఎల్ఈడి టెయిల్ ల్యాంప్స్ డిజైన్‌ను ఈ టీజర్ ఫొటోలలో చూడొచ్చు. ఫ్రంట్ బంపర్‌లో అమర్చిన స్ప్లిట్ ఎల్‌ఇడి హెడ్‌లైట్, దాని పై భాగంలో సన్నటి ఎల్‌ఈడీ డీఆర్ఎల్ లైట్స్ మరియు కారు ముందు భాగంలో గ్రిల్ మధ్యలో ఉంచిన పెద్ద ఎయిర్ ఇంటేక్ వంటి డిజైన్ వివరాలను ఇందులో గమనించవచ్చు.

హ్యుందాయ్ బేయోన్ క్రాసోవర్ 2021 మొదటి అర్ధభాగంలో యూరోపియన్ మార్కెట్లను తాకే అవకాశం ఉంది. ఆ తర్వాతి, కాలంలో ఇది భారత్ వంటి మార్కెట్లలో కూడా విడుదల కావచ్చని అంచనా. గతేడాది నవంబర్ నెలలోనే హ్యుందాయ్ తమ బేయోన్ పేరును ఆవిష్కరించింది. పేరును ఆవిష్కరించిన కొద్ది నెలల్లోనే కంపెనీ దీని ప్రోటోటైప్‌ను కూడా సిద్ధం చేయటం విశేషం.

హ్యుందాయ్ బేయోన్‌కు ఈ పేరును నైరుతి ఫ్రాన్స్‌లో ఉన్న బేయోన్ నగరం నుండి స్పూర్తి పొంది పెట్టారు. ఈ నగరం సెయిలింగ్ మరియు హైకింగ్ చాలా ప్రసిద్ధి చెందినవి. ఈ రెండు అంశాలను ప్రతిభింభింపజేసేలా హ్యుందాయ్ తమ సరికొత్త బేయోన్ ఎస్‌యూవీని డిజైన్ చేసినట్లుగా చెబుతోంది.

ఈ కారులో చాలా వరకూ యూరోపియన్ డిజైన్ ఎలిమెంట్స్ కనిపించే అవకాశం ఉంది. హ్యుందాయ్ తమ కార్లకు కొన్ని ప్రముఖ నగరాల పేర్లను పెట్టడం ఇదే మొదటిసారి కాదు. ప్రస్తుతం హ్యుందాయ్ విక్రయిస్తున్న టక్సన్ మరియు శాంటాఫే మోడళ్లకు కూడా అమెరికాలోని అరిజోనా మరియు న్యూ మెక్సికో రాష్ట్రాల్లోని నగరాల నుండి స్పూర్తి పొంది ఆ పేర్లను పెట్టారు.

హ్యుందాయ్ బేయోన్ ఎలక్ట్రిక్ కారులో ప్రస్తుత తరం ఐ20 కారులో ఉపయోగిస్తున్న ఇంజన్ ఆప్షన్లనే ఉపయోగించవచ్చని సమాచారం. ప్రస్తుతానికి హ్యుందాయ్ ఈ సరికొత్త ఎస్‌యూవీకి సంబంధించిన స్పెసిఫికేషన్లు మరియు ఇతర వివరాలను ఇంకా వెల్లడించలేదు. మార్చి 2న మరిన్ని వివరాలు తెలిసే అవకాశం ఉంది.