కొత్త ఫీచర్లు, మెరుగైన కనెక్టివిటీతో రానున్న కొత్త హ్యుందాయ్ క్రెటా!

కాగా, కంపెనీ ఇప్పుడు క్రెటా అమ్మకాలను మరింత పెంచుకునేందుకు ఇందులో మరిన్ని కొత్త ఫీచర్లను మరియు మెరుగైన కనెక్టివిటీ టెక్నాలజీని ఆఫర్ చేసేందుకు సిద్ధమవుతున్నట్లు సమాచారం. ఈ మేరకు కంపెనీ హ్యుందాయ్ క్రెటా లైనప్‌లో కొన్ని సవరణలు చేసే అవకాశం ఉంది.

హ్యుందాయ్ క్రెటా ధరలను అందుబాటులో ఉంచేందుకు కంపెనీ తం ఎంట్రీ లెవల్ ఈ వేరియంట్‌లో కొన్ని ఫీచర్లను తొలగించనుంది. అదే సమయంలో ఇతర వేరియంట్లలో కొన్ని అదనపు ఫీచర్లను జోడించనుంది. ఆ వివరాలేంటో తెలుసుకుందాం రండి.

తాజాగా, లీకైన సమాచారం ప్రకారం, హ్యుందాయ్ క్రెటా యొక్క టాప్-ఎండ్ ఎస్ఎక్స్ మరియు ఎస్ఎక్స్ (ఓ) వేరియంట్లలోని ఇన్ఫోటైన్‌మెంట్ సిస్టమ్ మరియు కొత్త వాయిస్ కమాండ్స్ కోసం ఓవర్-ది-ఎయిర్ (ఓడిఎ) కనెక్షన్‌ను కలిగి ఉంటాయి.

ఈ ఖరీదైన వేరియంట్లులో రిమోట్ ఇంజన్ స్టార్ట్, డాష్‌బోర్డ్‌లో మృదువైన పెయింట్ ఫినిషింగ్ మరియు కొత్త స్మార్ట్ కీని కలిగి ఉంటాయి. అలాగే, మిడ్-రేంజ్ ఎక్స్ మరియు ఎస్ వేరియంట్లు వైర్‌లెస్ ఆండ్రాయిడ్ ఆటో మరియు ఆపిల్ కార్‌ప్లే ఫీచర్లను పొందుతాయి.

ఇప్పటి వరకూ ఈ ఎస్‌యూవీలో ఆండ్రాయిడ్ ఆటో మరియు ఆపిల్ కార్‌ప్లే ఫీచర్లను వైర్‌ ద్వారా స్మార్ట్‌ఫోన్‌ను కారుకు కనెక్ట్ చేయడం ద్వారా మాత్రమే యాక్సెస్ చేసుకునే వెసలుబాటు ఉండేది. ఇకపై వైర్ లేకుండా ఈ ఫీచర్లను యాక్సెస్ చేయవచ్చు.

ఇక ఎంట్రీ లెవల్ క్రెటా ఈ వేరియంట్లో ఎలక్ట్రికల్‌గా సర్దుబాటు చేయగల సైడ్ మిర్రర్‌లు తొలగించబడతాయి. అంతేకాకుండా, ఈ వేరియంట్ లగేజ్ కంపార్ట్మెంట్ అందించిన లైటింగ్ మరియు ప్యాసింజర్ సీటు వెనుక భాగంలో అందించిన సీట్ పాకెట్‌ను కూడా కోల్పోనుంది. ఈ వేరియంట్లో సైడ్ మిర్రర్‌లపై అందించిన టర్న్-ఇండికేటర్లను ఫ్రంట్ ఫెండర్‌లపైకి మార్చనున్నారు.

ఇదిలా ఉంటే, గడచిన ఏప్రిల్ నెలలో హ్యుందాయ్ తమ క్రెటా డీజిల్ వెర్షన్ ధరలను రూ.19,600 మేర పెంచగాపెట్రోల్ వెర్షన్ ధరలు రూ.13,600 మేర పెంచిన సంగతి తెలిసినదే. అయితే, క్రెటా బేస్ పెట్రోల్ ఈ వేరియంట్ ధరలో మాత్రం ఎలాంటి మార్పు లేదు. ఇది మునుపటి మాదిరిగానే రూ.9.99 లక్షల ఎక్స్-షోరూమ్ ధరకు లభిస్తుంది.

హ్యుందాయ్ క్రెటా మూడు ఇంజన్ ఆప్షన్లలో అందుబాటులో ఉంది. వీటిలో 1.5-లీటర్ పెట్రోల్ మరియు 1.5 లీటర్ డీజిల్ ఇంజన్లు వరుసగా 115 బిహెచ్‌పిల శక్తిని మరియు 144 ఎన్ఎమ్ మరియు 250 ఎన్ఎమ్‌ల గరిష్ట టార్క్‌ను అందిస్తాయి. టాప్-ఎండ్ వేరియంట్లలో 1.4 లీటర్ టర్బో పెట్రోల్ ఇంజన్‌ను ఆఫర్ చేస్తోంది. ఈ ఇంజన్ గరిష్టంగా 140 బిహెచ్‌పిల శక్తిని ఉత్పత్తి చేస్తుంది.

ఈ మూడు ఇంజన్ ఆప్షన్లు కూడా స్టాండర్డ్ 6-స్పీడ్ మాన్యువల్ గేర్‌బాక్స్‌తో లభిస్తాయి. అయితే, ఇందులో ఆటోమేటిక్ గేర్‌బాక్స్ కావాలనుకునే వారి కోసం కంపెనీ 1.5 లీటర్ పెట్రోల్ ఇంజన్ 6-స్పీడ్ సివిటి, 1.5 లీటర్ డీజిల్ ఇంజన్ టార్క్-కన్వర్టర్ ఆటోమేటిక్ మరియు 1.4-లీటర్ టర్బో పెట్రోల్ ఇంజన్ 7-స్పీడ్ డిసిటి ఆప్షన్లను అందిస్తోంది.

Source: Rushlane