మరోసారి పెరిగిన హ్యుందాయ్ గ్రాండ్ ఐ10 నియోస్ ధరలు - వివరాలు

హ్యుందాయ్ గ్రాండ్ ఐ10 నియోస్ యొక్క పెట్రోల్ ఇంజన్ వేరియంట్ల ధరలు రూ.2,000 నుండి రూ.5,000 మధ్యలో పెరగగా, సిఎన్‌జి వేరియంట్ల ధరలు రూ.5,000 మేర పెరిగాయి. కాగా, ఇందులో 'మాగ్నా' వేరియంట్ ధరలో మాత్రం ఎలాంటి మార్పు లేదు.

ఇక ఇందులో డీజిల్ వేరియంట్ల ధరల విషయానికొస్తే, ఇందులో 'మాగ్నా కార్పొరేట్ ఎడిషన్' ధరలో ఎలాంటి మార్పు లేదు. అయితే, మిగిలిన అన్ని డీజిల్ వేరియంట్ల ధరలను రూ.4 ,000 మేర పెంచారు.

తాజా ధరల పెరుగుదల అనంతరం మార్కెట్లో హ్యుందాయ్ గ్రాండ్ ఐ10 నియోస్ ధరలు రూ.5.23 లక్షల నుంచి రూ.8.45 లక్షల (ఎక్స్-షోరూమ్) మధ్యలో ఉన్నాయి.

భారత మార్కెట్లో, హ్యుందాయ్ గ్రాండ్ ఐ10 నియోస్ మూడు ఇంజన్ ఆప్షన్లలో అందుబాటులో ఉంది. ఇందులో మొదటిది 1.2 లీటర్ పెట్రోల్ ఇంజన్, ఇది 83 బిహెచ్‌పి గరిష్ట శక్తిని మరియు 114 ఎన్ఎమ్ గరిష్ట టార్క్ ఉత్పత్తి చేస్తుంది. ఈ ఇంజన్ 5-స్పీడ్ మాన్యువల్ మరియు 5-స్పీడ్ ఏఎమ్‌టి గేర్‌బాక్స్ ఆప్షన్లతో అందుబాటులో ఉంటుంది.

ఇకపోతే, రెండవది 1.2 లీటర్ టర్బో-డీజిల్ ఇంజన్, ఇది గరిష్టంగా 75 బిహెచ్‌పి శక్తిని మరియు 190 ఎన్ఎమ్ టార్క్‌ను ఉత్పత్తి చేస్తుంది. ఈ ఇంజన్ కూడా రెండు గేర్‌బాక్స్ ఆప్షన్లలో లభిస్తుంది. వీటిలో 5-స్పీడ్ మాన్యువల్ మరియు 5-స్పీడ్ ఏఎమ్‌టి గేర్‌బాక్స్ ఆప్షన్లు ఉన్నాయి.

ఇక ఇందులో చివరి ఇంజన్ ఆప్షన్ 1.0-లీటర్ టర్బో-పెట్రోల్ ఇంజన్. ఈ ఇంజన్ గరిష్టంగా 100 బిహెచ్‌పి శక్తిని మరియు 172 ఎన్ఎమ్ టార్క్‌ను ఉత్పత్తి చేస్తుంది. ఇది కేవలం 5-స్పీడ్ మాన్యువల్ ట్రాన్స్‌మిషన్‌తో మాత్రమే లభిస్తుంది.

హ్యుందాయ్ గ్రాండ్ ఐ10 నియోస్ హ్యాచ్‌బ్యాక్‌లో కంపెనీ పెట్రోల్, డీజిల్ ఇంజన్ ఆప్షన్లతో పాటుగా సిఎన్‌జి ఫ్యూయెల్ ఆప్షన్‌ను కూడా అందిస్తోంది. ఇది ఫ్యాక్టరీ ఫిట్టెడ్ సిఎన్‌జి కిట్‌తో 1.2-లీటర్ పెట్రోల్ ఇంజన్‌ రూపంలో లభిస్తుంది.

తక్కువ ధరలో మెరుగైన డ్రైవింగ్ అనుభూతిని కోరుకునే కస్టమర్లకు హ్యుందాయ్ గ్రాండ్ ఐ10 నియోస్ ఓ చక్కటి ఆప్షన్‌గా ఉంటుంది. ప్రీమియం ఫీచర్లను కలిగి ఉండే గ్రాండ్ ఐ10 నియోస్ హ్యాచ్‌బ్యాక్, ఈ విభాగంలో మారుతి స్విఫ్ట్, టాటా టిగోర్ మరియు ఫోర్డ్ ఫిగో వంటి మోడళ్లకు పోటీగా నిలుస్తుంది.