మీ వద్ద ఎస్‌యూవీ ఉంటే, ఇసుజు పికప్ ట్రక్కుపై రూ.1.50 లక్షల భారీ డిస్కౌంట్!

అయితే, ఈ ఆఫర్‌ను పొందాలంటే, ఖచ్చితంగా మీ వద్ద ఇప్పటికే ఓ ఎస్‌యూవీ ఉండాలి. మీ వద్ద ఇప్పటికే మారుతి విటారా బ్రెజ్జా నుండి టొయోటా ఫార్చ్యూనర్ వరకు ఏదైనా ఒక ఎస్‌యూవీ ఉన్నట్లయితే, కొత్తగా కొనుగోలు చేయబోయే ఇసుజు డి-మ్యాక్స్ పికప్ ట్రక్కుపై ఈ భారీ తగ్గింపును పొందవచ్చు.

గుర్తుంచుకోండి, ఇది ఎక్స్ఛేంజ్ ఆఫర్ కాదు, ఫ్లాట్ డిస్కౌంట్. సింపుల్‌గా చెప్పాలంటే, మీరు ఇప్పటికే ఓ ఎస్‌యూవీని కలిగి ఉండి, కొత్తగా ఇసుజు పికప్ వాహనాన్ని కొనుగోలు చేయటానికి చూస్తుంటే, మీరు కొనుగోలు చేయబోయే ఇసుజు పికప్ ట్రక్ మీద కంపెనీ ఈ అదనపు తగ్గింపును అందిస్తుంది.

అయితే, ఇది ప్రమోషనల్ ఆఫర్ మాత్రమేనని, దీనికి నిర్దిష్ట గడువు లేకుండా, మొదటి లాట్ బుకింగ్‌లకు మాత్రమే వర్తిస్తుందని కంపెనీ పేర్కొంది. కాబట్టి, మీరు నిజంగా ఇసుజు హై-లాండర్ పట్ల ఆసక్తి కలిగి ఉండి, మీ వద్ద ఓ ఎస్‌యూవీ కూడా ఉన్నట్లయితే మీకు ఈ ఆఫర్ వర్తిస్తుంది.

ఇసుజు మోటార్స్ లిమిటెడ్, భారతదేశంలో బిఎస్6 కాలుష్య నిబంధనల నేపథ్యంలో తమ డి-మ్యాక్స్ పికప్ ట్రక్కును సుమారు ఒక ఏడాది కాలం పాటు తాత్కాలికంగా నిలిపివేసిన తర్వాత కొత్త 2021 డి-మ్యాక్స్‌ను విడుదల చేసింది.

ఇసుజు డి-మాక్స్ వి-క్రాస్ అనే ప్రీమియం వేరియంట్ మరియు హై-లాండర్ అనే బేస్ వేరియంట్లలో లభిస్తుంది. మార్కెట్లో వీటి ధరలు రూ.16.98 లక్షల నుండి 24.49 లక్షల మధ్యలో ఉన్నాయి. (పరిచయ ధరలు, ఎక్స్-షోరూమ్ చెన్నై).

ఇసుజు వి-క్రాస్‌లోని కొన్ని ముఖ్యమైన ఫీచర్లను గమనిస్తే, ఈ లైఫ్-స్టైల్ పికప్ ట్రక్కులో ఆరు ఎయిర్‌బ్యాగులు, 7.0 ఇంచ్ టచ్‌స్క్రీన్ ఇన్ఫోటైన్‌మెంట్ సిస్టమ్, ఆండ్రాయిడ్ ఆటో మరియు ఆపిల్ కార్‌ప్లే సపోర్ట్, స్టీరింగ్ మౌంటెడ్ ఆడియో కంట్రోల్, 6-వే అడ్జస్టబల్ డ్రైవర్ సీట్, ఆటోమేటిక్ క్లైమేట్ కంట్రోల్ మరియు ఎలక్ట్రానిక్ స్టెబిలిటీ కంట్రోల్ మొదలైనవి ఉన్నాయి.

అయితే, బేస్ వేరియంట్ అయిన హై-లాండర్‌లో కంపెనీ ఎలాంటి ఇన్ఫోటైన్‌మెంట్ సిస్టమ్‌ను ఆఫర్ చేయడం లేదు. ఇందులో కేవలం రెండు ఫ్రంట్ ఎయిర్‌బ్యాగులు మాత్రమే లభిస్తాయి. కాగా, వి-క్రాస్ హై-లాండర్ కోసం కంపెనీ అనేక రకాల యాక్ససరీలను కూడా అందిస్తోంది. ఇంజన్ పరంగా ఈ రెండు మోడళ్లు ఒకేరకమైన ఇంజన్‌ను కలిగి ఉంటాయి.

వీటిలో బిఎస్ 6-కంప్లైంట్ 1.9-లీటర్ టర్బో డీజిల్ ఇంజన్‌ను ఉపయోగించారు. ఈ ఇంజన్ 163 హెచ్‌పి పవర్‌ను మరియు 360 న్యూటన్ మీటర్ టార్క్‌ను అందిస్తుంది. హై-లాండర్ 6-స్పీడ్ మాన్యువల్ మరియు 2-వీల్ డ్రైవ్ సిస్టమ్స్‌లో మాత్రమే అందుబాటులో ఉంది. అదే సమయంలో, వి-క్రాస్ 6-స్పీడ్ ఆటోమేటిక్ మరియు 4-వీల్ డ్రైవ్ సిస్టమ్‌తో లభిస్తుంది.