డీలర్‌షిప్‌లో ప్రత్యక్షమైన కొత్త 2021టాటా టియాగో స్పెషల్ ఎడిషన్

టాటా టియాగో ఫేస్‌లిఫ్ట్ మోడల్‌ను మార్కెట్లో ప్రవేశపెట్టి దాదాపు ఒక సంవత్సరం పూర్తి కావస్తున్న నేపథ్యంలో, కంపెనీ ఇందులో ఓ స్పెషల్ ఎడిషన్ మోడల్‌ను ప్లాన్ చేస్తోంది. టాటా టియాగో ఎక్స్‌టి వేరియంట్‌ను ఆధారంగా చేసుకొని ఈ లిమిటెడ్ ఎడిషన్‌ను తయారు చేస్తున్నారు.

ప్రస్తుతం మార్కెట్లో టాటా టియాగో ఎక్స్‌టి వేరియంట్ ధర రూ.5.49 లక్షలుగా ఉండగా, ఈ స్పెషల్ ఎడిషన్ టియాగో ధర రూ.5.79 లక్షలుగా ఉంది. అంటే, స్టాండర్డ్ ఎక్స్‌టి వేరియంట్ కంటే ఈ స్పెషల్ ఎడిషన్ వేరియంట్ ధర రూ.30,000 అధికంగా ఉంది.

టాటా మోటార్స్ ఈ స్పెషల్ ఎడిషన్ టియాగో ఉత్పత్తిని కేవలం 2,000 యూనిట్లకు మాత్రమే పరిమితం చేసింది. అదనపు ధరకు తగినట్లుగానే, ఈ కొత్త స్పెషల్ ఎడిషన్ టియాగో మోడల్‌లో కంపెనీ కొన్ని అదనపు ఫీచర్లను కూడా జోడించింది.

ఈ స్పెషల్ ఎడిషన్ మోడల్ డేటోనా గ్రే, పెరల్ వైట్ మరియు ఫ్లేమ్ రెడ్ అనే మూడు కొత్త సింగిల్ టోన్ కలర్లలో లభిస్తుంది. స్టాండర్డ్ ఎక్స్‌టి వేరియంట్లో స్టీల్ వీల్స్ లభిస్తుండగా, ఈ స్పెషల్ ఎడిషన్‌లో 14 ఇంచ్ బ్లాక్ అల్లాయ్ వీల్స్‌ను ఆఫర్ చేస్తున్నారు.

ఇంటీరియర్స్‌లో అదనంగా అందిస్తున్న ఫీచర్లలో వాయిస్ కమాండ్‌తో కూడిన 5 ఇంచ్ టచ్‌స్క్రీన్ ఇన్ఫోటైన్‌మెంట్, 4 స్పీకర్ హార్మన్ ఆడియో సిస్టమ్, ఆన్-బోర్డ్ నావిగేషన్ సిస్టమ్ మరియు రియర్ పార్సిల్ ట్రే మొదలైనవి ఉన్నాయి.

టియాగో లిమిటెడ్ ఎడిషన్ మోడల్‌ను ఎక్స్‌టి వేరియంట్‌పై ఆధారపడి చేసిన నేపథ్యంలో, ఎక్స్‌టి వేరియంట్‌లో లభించే పవర్ విండోస్, కీలెస్ ఎంట్రీ, ఫాలో-మీ-హోమ్ హెడ్‌ల్యాంప్స్, డ్యూయల్ ఎయిర్‌బ్యాగులు, మల్టీ-ఫంక్షనల్ స్టీరింగ్ వీల్ మరియు ఎలక్ట్రికల్లీ అడ్జస్టబల్ సైడ్ మిర్రర్స్ వంటి ఫీచర్లు ఈ కొత్త వేరియంట్‌లో కూడా లభిస్తాయి.

ఇంజన్ పరంగా ఈ లిమిటెడ్ ఎడిషన్ వేరియంట్‌లో ఎలాంటి మార్పులు లేవు. ఇది 1.2 లీటర్, 3-సిలిండర్, న్యాచురల్లీ ఆస్పైర్డ్ పెట్రోల్ ఇంజన్‌తో లభిస్తుంది. ఈ ఇంజన్ గరిష్టంగా 86 పిఎస్‌ల శక్తిని మరియు 113 ఎన్ఎమ్‌ల టార్క్‌ని ఉత్పత్తి చేస్తుంది. ఈ ఇంజన్ 5-స్పీడ్ మాన్యువల్ గేర్‌బాక్స్‌తో మాత్రమే లభిస్తుంది.