వరుసగా రెండవసారి తగ్గిన పెట్రోల్, డీజిల్ ధరలు; ఎన్నికలప్పుడే ఎందుకిలా..?

గడచిన సంవత్సరం ఇదే సమయంలో కరోనా నేపథ్యంలో అస్సలు పెరగని పెట్రోల్, డీజిల్ ధరలు, అదే ఏడాది చివరి నుండి స్లోపాయిజన్ మాదిరిగా నిత్యం పెరుగుతూనే వచ్చాయి. ఈ ధరలు ఎంతలా పెరిగాయంటే ఒక్క ఏడాది కాలంలో లీటరు పెట్రోల్‌పై రూ.21.58 మరియు లీటరు డీజిల్‌పై 19.18 మేర పెరిగాయి.

పెరిగిన పెట్రోల్ మరియు డీజిల్ ధరలు కేవలం వాహనదారులపై మాత్రమే కాకుండా, మిగిలిన అన్ని వర్గాల ప్రజలపై కూడా అదనపు భారాన్ని మోపుతున్నాయి. పెరిగిన ఇంధన ధరల కారణంగా సరుకు రవాణా ఖర్చులు పెరగాయి. ఫలితంగా, నిత్యావసరాల ధరలు కూడా గణనీయంగా పెరిగాయి.

దేశంలో చముర ధరలపై ప్రభుత్వ నియంత్రణలు ఎత్తివేయటంతో దేశీయ చమురు కంపెనీలు ఇష్టారాజ్యంగా ఇంధన ధరలను పెంచేశాయి. అయితే, తాజాగా ఈ ఏడాది వరుసగా రెండవ సారి పెట్రోల్, డీజిల్ ధరలు స్వల్పంగా తగ్గుముఖం పట్టాయి.

అంతర్జాతీయ మార్కెట్లలో చమురు ధరలు గణనీయంగా తగ్గిన నేపథ్యంలో ఈ ఏడాది వరుసగా రెండోసారి పెట్రోల్, డీజిల్ ధరలు తగ్గించారు. ప్రభుత్వ చమురు మార్కెటింగ్ సంస్థలు (ఒఎమ్‌సి) గురువారం పెట్రోల్, డీజిల్ ధరలను లీటరుపై వరుసగా 21 పైసలు, 20 పైసలు చొప్పున తగ్గించాయి.

తాజా తగ్గింపు తర్వాత ఐఓసి డేటా ప్రకారం, ఢిల్లీలో ఒక లీటరు పెట్రోల్ ధర రూ.90.99 నుండి రూ.90.78 కి తగ్గింది. దేశంలోని ఇతర ప్రధాన నగరాల్లో పెట్రోల్ ధరను గమనిస్తే, కోల్‌కతాలో రూ.90.98, ముంబైలో రూ.97.19, చెన్నైలో రూ.92.770, బెంగళూరులో రూ.93.28, జైపూర్‌లో రూ.97.31 మరియు హైదరాబాద్‌లో రూ.94.39గా ఉన్నాయి.

అలాగే, డీజిల్ ధరలను గమనిస్తే, ఢిల్లీలో లీటరు డీజిల్ ధర రూ.81.30 నుండి రూ.81.10 కి తగ్గింది. కోల్‌కతాలో రూ.83.98, ముంబైలో రూ.88.20, చెన్నై రూ.86.10, జైపూర్‌లో రూ.89.60, బెంగళూరులో రూ.85.99 మరియు హైదరాబాద్‌లో రూ.88.45గా ఉన్నాయి.

ఇటీవల పెరిగిన ధరలతో పోలిస్తే తాజాగా తగ్గిన ధరలు అత్యల్పమే అయినప్పటికీ, అంతర్జాతీయ మార్కెట్లలో ముడి చమురు ధరలు తగ్గిన తరువాత ప్రభుత్వ రంగ చమురు కంపెనీలు కూడా దేశీయ మార్కెట్లో రేట్లు తగ్గించడం ఓ సానుకూల పరిణామంగా చెప్పుకోవచ్చు.

రానున్న రోజుల్లో మరింత ధరల తగ్గుదలను ఇది సూచిస్తోంది. ఐదు రాష్ట్రాల్లో జరగబోయే ఎన్నికలే ఇంధన ధరల తగ్గింపు వెనుక ఉన్న ప్రధాన కారణమని విశ్లేషకులు చెబుతున్నారు.