ఈ బుజ్జి కారుకి 4 రోజుల్లో రూ.7.5 కోట్ల ఆర్డర్లు; ఇది ఎక్కడో కాదు మనదేశంలోనే..!

స్టోర్మ్ ఆర్3 ఒక ఆల్-ఎలక్ట్రిక్ పర్సనల్ మొబిలిటీ వెహికల్‌గా ఉంటుంది. ఇందులో రెండు డోర్లు, రెండు సీట్లు మరియు మూడు చక్రాలు మాత్రమే ఉంటాయి. ప్రత్యేకించి పట్టణ రవాణాను దృష్టిలో ఉంచుకొని ఈ ఎలక్ట్రిక్ వాహనాన్ని డిజైన్ చేశారు.

స్టోర్మ్ మోటార్స ఈ ఏడాది పరిమిత సంఖ్యలో ఉత్పత్తి ఆర్3 ఎలక్ట్రిక్ వాహనాలను చేయనుంది. ప్రస్తుతం ఈ వాహనం కోసం ప్రీ-బుకింగ్‌లను ముంబై, థానే, నేవీ ముంబై, న్యూఢిల్లీ, గుర్గావ్ మరియు నోయిడా ప్రాంతాల్లో మాత్రమే స్వీకరిస్తున్నారు. దీని ఎక్స్-షోరూమ్ ధర కేవలం రూ.4.50 లక్షలు మాత్రమే.

ఈ ప్రైస్ ట్యాగ్‌తో స్టోర్మ్ ఆర్3 భారతదేశంలో అత్యంత చవకైన ఎలక్ట్రిక్ వాహనంగా మారింది. ముంబై మరియు ఢిల్లీ-ఎన్‌సిఆర్ ప్రాంతాల్లోని కస్టమర్లు రూ.10,000 అడ్వాన్స్ చెల్లించి ఈ మోడల్‌ను ప్రీ-బుక్ చేసుకోవచ్చు. రాబోయే కొద్ది వారాల పాటు ఈ బుకింగ్‌లు తెరిచి ఉంటాయి.

అంతేకాకుండా, ఈ ఎలక్ట్రిక్ వాహనాన్ని ముందుగా బుక్ చేసుకునే ప్రారంభ కస్టమర్‌లకు కంపెనీ సుమారు రూ.50,000 విలువైన ప్రయోజనాలను కూడా అందించనుంది. ఇందులో కస్టమైజబల్ కలర్ ఆప్షన్స్, ప్రీమియం ఆడియో సిస్టమ్స్ మరియు మూడు సంవత్సరాల ఉచిత మెయింటినెన్స్ మొదలైనవి ఉన్నాయి.

స్టోర్మ్ మోటార్స్ తమ ఆర్3 ఎలక్ట్రిక్ వాహనం కోసం ఏఆర్ఏఐ సర్టిఫికేట్ మరియు దాని వెహికల్ కంట్రోల్ యూనిట్ (విసియూ) కోసం పేటెంట్లను దాఖలు చేసింది. ఈ ఎలక్ట్రిక్ వాహనంలో 48 వోల్ట్ బ్యాటరీ ప్యాక్ ఉంటుంది. కంపెనీ పేర్కొన్న సమాచారం ప్రకారం, ఈ బ్యాటరీ ప్యాక్ గరిష్టంగా 200 కిలోమీటర్ల రేంజ్‌ను ఆఫర్ చేస్తుంది.

స్టోర్మ్ ఆర్3 గరిష్ట వేగాన్ని గంటకు 80 కిలోమీటర్లకు పరిమితం చేశారు. ఇందులో పెద్ద సన్‌రూఫ్, ఆన్‌బోర్డ్ చార్జర్, గెశ్చర్ మరియు వాయిస్ కమాండ్స్‌తో కూడిన ట్రిపుల్ టచ్‌స్క్రీన్ డిస్‌ప్లే, మూడు డ్రైవింగ్ మోడ్స్ (ఎకో/నార్మల్/స్పోర్ట్స్) మరియు పూర్తి ఎయిర్ కండిషనింగ్ వంటి ఫీచర్లు ఇందులో ఉన్నాయి.

అంతేకాకుండా, ఇందులో 4జి-కనెక్ట్ డయాగ్నొస్టిక్ ఇంజన్ ఆన్‌బోర్డ్‌ను కూడా ఉంటుంది. దీని సాయంతో వాహన యజమానులు తమ వాహనం యొక్క స్థితి మరియు ఛార్జింగ్ స్థాయి మొదలైన వాటిని ట్రాక్ చేయవచ్చు. అలాగే బ్రేక్ ప్యాడ్‌లు, మోటార్లు మరియు ఎలక్ట్రానిక్స్ వంటి కొన్ని క్లిష్టమైన భాగాల యొక్క పూర్తి ఆరోగ్య నివేదికను కూడా పొందవచ్చు.

గత 2016లో స్థాపించబడిన స్టోర్మ్ మోటార్స్ తమ 'మేడ్ ఇన్ ఇండియా, మేడ్ ఫర్ ఇండియా' ప్లాన్‌లో భాగంగా ఈ ఎలక్ట్రిక్ వాహనాన్ని మూడు విభాగాలకు చెందిన ప్రజల కోసం డిజైన్ చేసింది. వీరిలో వర్కింగ్ ప్రొఫెషనల్స్, ఫ్లీట్ ఆపరేటర్స్ మరియు రద్దీగా ఉండే సిటీలో చిన్నపాటి దూరాలను చేరుకోవాలనుకునే కుటుంబాలు ఉన్నాయి.

స్టోర్మ్ ఆర్3 ఎలక్ట్రిక్ వాహనం ప్రస్తుతానికి కాన్సెప్ట్ మాత్రమే, ఇది వాస్తవ రూపం దాల్చి కస్టమర్లను చేరుకోవటానికి మరో ఏడాదికి పైగా సమయం పట్టొచ్చు. ఈ వాహనం యొక్క డెలివరీలు 2022 ఆరంభం నాటికి ప్రారంభమవుతాయని అంచనా.