నెక్స్ట్ జనరేషన్ ఆల్టా స్లీక్ టి-సిరీస్ ట్రక్కులను విడుదల చేసిన టాటా మోటార్స్

పట్టణ రవాణా అవసరాలను దృష్టిలో ఉంచుకొని టాటా మోటార్స్ ఈ ట్రక్కులను ప్రత్యేకంగా డిజైన్ చేసింది. ఆల్ట్రా స్లీక్ టి-సీరిస్ పేరుతో కంపెనీ వీటిని విడుదల చేసింది. ఇందులో టి6, టి7 మరియు టి9 మోడళ్లను కంపెనీ విక్రయిస్తోంది.

ఈ సరికొత్త టాటా టి-సిరీస్ ట్రక్కుల డెక్ పరిమాణం 10 అడుగుల నుండి 20 అడుగుల వరకు ఉంటుంది. ఈ ట్రక్కులు 1900 మిమీ వెడల్పు గల క్యాబిన్ కలిగివుంటాయి. ఫలితంగా, ట్రక్కు లోపల డ్రైవర్‌కు సౌకర్యవంతమైన మరియు విశాలవంతమైన క్యాబిన్ స్పేస్ లభిస్తుంది.

టాటా మోటార్స్ ఈ ట్రక్కుల యొక్క ఎన్‌విహెచ్ (నాయిస్, వైబ్రేషన్, హార్ష్‌నెస్) లెవల్స్ స్థాయిని కూడా మెరుగుపరిచింది. ఫలితంగా, ఇవి చాలా స్మూత్‌గా తక్కువ శబ్ధాన్ని కలిగించేలా ఉంటాయి. దీని కారణంగా, క్యాబిన్ లోపల ఇది డ్రైవర్‌కు సౌకర్యవంతమైన డ్రైవింగ్ అనుభూతిని కల్పిస్తుంది.

కంపెనీ ఈ ట్రక్కుల క్యాబిన్ యొక్క దృఢత్వాన్ని కూడా బాగా మెరుగుపరచింది. ఈ క్యాబిన్లను కొత్త భద్రతా నిబంధనల ప్రకారం నిర్మించినట్లు టాటా మోటార్స్ పేర్కొంది. ఈ ట్రక్కులలో డ్రైవర్‌కు సురక్షితమైన క్యాబిన్ అనుభూతిని కల్పిస్తామని కంపెనీ పేర్కొంది.

కఠినమైన రహదారుల్లో సైతం సురక్షితంగా మరియు సౌకర్యంగా ప్రయాణించేలా ఈ కొత్త తరం ట్రక్కులను రూపొందించినట్లు టాటా మోటార్స్ తెలిపింది. వీటిలో ఎత్తు సర్దుబాటు చేయగల డ్రైవర్ సీట్, టిల్ట్ అడ్జస్టబల్ స్టీరింగ్ వీల్, పవర్ స్టీరింగ్, డాష్‌బోర్డుకే అమర్చిన గేర్‌బాక్స్ మొదలైన ఫీచర్లు ఉన్నాయి.

అంతేకాకుండా, డ్రైవర్ వినోదం కోసం ఇన్‌బిల్ట్ మ్యూజిక్ సిస్టమ్, యుఎస్‌బి ఫాస్ట్ ఛార్జింగ్ పోర్ట్ మరియు స్టోరేజ్ స్పేస్ వంటి పలు అధునాతన ఫీచర్లతో దీనిని రూపొందించారు. వీటిలో కొత్త పారాబొలిక్ లీఫ్ సస్పెన్షన్ సిస్టమ్ మరియు ఎయిర్ బ్రేక్‌లను ఉపయోగించినట్లు కంపెనీ వివరించింది.

అధునాతన సస్పెన్షన్ సిస్టమ్ మరియు ధృడమైన బ్రేకులు ట్రక్కుపై మంచి కంట్రోల్‌ను ఆఫర్ చేస్తాయని, రాత్రివేళల్లో వెనుక నుంచి వచ్చే వాహనాల యొక్క విజిబిలిటీ కోసం ఇందులో ఎల్ఈడి ల్యాంప్స్‌ను ఉపయోగించామని టాటా మోటార్స్ తెలిపింది.

ఈ ట్రక్కుల పరిమాణం మరియు బరువు ప్రకారం, ఇవి 4 టైర్లు మరియు 6 టైర్ల రూపంలో లభ్యం కానున్నాయి. ఈ ట్రక్కులను నిర్మాణ పనులు, ఇ-కామర్స్ మరియు అనేక ఇతర పనులకు ఉపయోగించవచ్చు. ఈ ట్రక్కుల ద్వారా చల్లటి పదార్థాలను రవాణా చేసేందుకు ఇందులో ఎయిర్ కండిషన్డ్ కంటైనర్లను కూడా ఏర్పాటు చేసే సదుపాయాన్ని టాటా అందించింది.

టాటా మోటార్స్ ప్రవేశపెట్టిన ఈ లేటెస్ట్ టి-సిరీస్ ట్రక్కులలో బిఎస్6 డీజిల్ ఇంజన్‌‌ను ఉపయోగించారు. ఈ ఇంజన్ గరిష్టంగా 100 బిహెచ్‌పి పవర్‌ను 300 న్యూటన్ మీటర్ టార్క్‌ను ఉత్పత్తి చేస్తుంది. ఇవి ఈ విభాగంలోనే ఉత్తమై మైలేజీని ఆఫర్ చేస్తాయని కంపెనీ తెలిపింది.

మెరుగైన మైలేజీని అందించడానికి ట్రక్కులలో రేడియల్ టైర్లను ఉపయోగించారు. టాటా ఈ ట్రక్కులతో దేశవ్యాప్తంగా సర్వీస్ వారంటీ, సులభమైన ఫైనాన్సింగ్ ఆప్షన్స్ మరియు అధిక రీసేల్ వ్యాల్యూ వంటి వాటికి హామీ ఇస్తుంది. ఈ కొత్త ట్రక్ శ్రేణికి 3 సంవత్సరాల లేదా 3 లక్షల కిలోమీటర్ల వారంటీని కంపెనీ అందిస్తోంది.