పూర్తి చార్జ్‌పై 400 కిలోమీటర్లకు పైగా రేంజ్ ఆఫర్ చేసే 2022 Tata Nexon EV; త్వరలోనే లాంచ్!

ఇటీవలి నివేదిక ప్రకారం, టాటా మోటార్స్ వచ్చే ఏడాది ప్రారంభంలో నెక్సాన్ ఈవీకి పెద్ద అప్‌గ్రేడ్ ఇవ్వడానికి సిద్ధమవుతోంది. ఇది పెద్ద బ్యాటరీ మరియు పెరిగిన రేంజ్‌ని కలిగి ఉంటుందని కొత్త నివేదికలు సూచిస్తున్నాయి.పెద్ద 40kWh బ్యాటరీతో వస్తుందని భావిస్తున్న కొత్త నెక్సాన్ ఈవీ మోడల్, ప్రస్తుతం మార్కెట్లో ఉన్న Nexon EVతో పాటు విక్రయించబడుతుందని మరియు ఇది భారతదేశంలో కొత్త EV విప్లవానికి నాంది పలుకుతుందని కంపెనీ భావిస్తోంది.

ప్రస్తుతం, టాటా మోటార్స్ భారతదేశంలోని మొత్తం ఎలక్ట్రిక్ కార్లలో 60 శాతం మార్కెట్ వాటాను కలిగి ఉంది. నెక్సాన్ ప్రస్తుతం దేశంలో అత్యధికంగా అమ్ముడవుతున్న ప్యాసింజర్ ఎలక్ట్రిక్ ఎస్‌యూవీగా ఉంది. అప్‌డేట్ చేయబడిన కొత్త 2022 మోడల్ నెక్సాన్ ఈవీ వచ్చే ఏడాది ప్రారంభంలో విడుదల చేయబడుతుందని భావిస్తున్నారు. కంపెనీ ప్రస్తుతం విక్రయిస్తున్న నెక్సాన్ ఈవీ రేంజ్ ని ఒక పెద్ద శ్రేణి బ్యాటరీ ప్యాక్‌గా విస్తరించాలని లక్ష్యంగా పెట్టుకుంది.

ప్రస్తుత Nexon EV విజయానికి ప్రధాన కారణం 'ధర-శ్రేణి' (ప్రైస్ మరియు బ్యాటరీ రేంజ్) నిష్పత్తి, ఇది కొనుగోలుదారులలో మరింత ప్రజాదరణ పొందేలా చేసింది. ప్రస్తుత నెక్సాన్ ఎలక్ట్రిక్ కారు ఈ విభాగంలో దాని పోటీదారులతో పోలిస్తే అతి చిన్న బ్యాటరీ (30.2kWh) మరియు అత్యల్ప రేంజ్ ను కలిగి ఉన్నప్పటికీ, ఇది చాలా తక్కువ ధర కలిగిన మోడల్. అయితే, చాలా మంది కొనుగోలుదారులకు, ధర కంటే కూడా రేంజ్ కే ఎక్కువ ప్రాధాన్యత ఇస్తున్నారు.

ఈ నేపథ్యంలో, టాటా నెక్సాన్ ఈవీ 2022 మోడల్ మునుపటి కన్నా మరింత మెరుగైన సామర్థ్యాలతో విస్తృత శ్రేణి వినియోగదారులను ఆకర్షించగలదని కంపెనీ భావిస్తోంది. ఫేస్‌లిఫ్టెడ్ ICE (ఇంటర్నల్ కంబషన్ ఇంజన్) ఆధారిత నెక్సాన్ ఆధారంగా రూపొందనున్న ఈ ఐదు-సీట్ల నెక్సాన్ ఈవీ మోడల్, భారతదేశంలో మొత్తం జీరో-ఎమిషన్ వాహనాల అమ్మకాలలో 60 శాతం వాటాను కలిగి ఉంది.

అదనంగా, టాటా మోటార్స్ ఇటీవల సిప్ట్రాన్ టెక్నాలజీ ఆధారంగా అప్‌డేట్ చేయబడిన టిగోర్‌ను కూడా విడుదల చేసింది. నెక్సాన్ ఈవీ యొక్క ప్రస్తుత వెర్షన్ ఎక్స్-షోరూమ్ ధర రూ. 14.24 లక్షల నుండి రూ. 16.85 లక్షల (ఎక్స్-షోరూమ్) వరకూ ఉంటోంది. ఇది ఈ విభాగంలో ఎమ్‌జి జెడ్ఎస్ ఈవీ మరియు హ్యుందాయ్ కోనా వంటి ఎలక్ట్రిక్‌ కార్లతో పోటీ పడుతుంది. అయితే, ఈ మోడళ్లతో పోలిస్తే ఇది తక్కువ రేంజ్ ను కలిగి ఉన్నప్పటికీ, తక్కువ ధర కారణంగా ఈ వాహనం మంచి ప్రజాదరణ పొందింది.

టాటా నెక్సాన్ ఎలక్ట్రిక్ కారులో 95 కిలోవాట్ల ఎలక్ట్రిక్ మోటార్ ఉంటుంది. ఈ మోటార్‌ను ఫ్రంట్ యాక్సిల్‌లో అమర్చబడి ఉంటుంది. ఇది 30.2 కిలోవాట్ల లిథియం-అయాన్ బ్యాటరీ ప్యాక్‌తో పనిచేస్తుంది. ఈ మోటర్ గరిష్టంగా 129 బిహెచ్‌పి పవర్‌ను మరియు 245 ఎన్ఎమ్ టార్క్‌ను ఉత్పత్తి చేస్తుంది. కంపెనీ పేర్కొన్న ప్రకారం, నెక్సాన్ ఈవి ఎలక్ట్రిక్ ఎస్‌యూవీ పూర్తి ఛార్జీపై 312 కిలోమీటర్ల డ్రైవింగ్ రేంజ్‌ను ఆఫర్ చేస్తుంది.

రియల్ టైమ్ రేంజ్ ను పరిశీలిస్తే, దేశంలోని ప్రస్తుత డ్రైవింగ్ పరిస్థితులను బట్టి, టాటా నెక్సాన్ ఈవీ వాస్తవ ప్రపంచ పరిధిలో దాదాపు 200 కి.మీ పరిధిని కలిగి ఉంది, ఇది పట్టణ వినియోగదారులకు ఆదర్శంగా నిలిచింది. అయితే, కొత్త 2022 టాటా నెక్సాన్ ఈవీలో ఇది మారే అవకాశం ఉంది. ఎందుకంటే ఇది పెద్ద 40 kWh బ్యాటరీ ప్యాక్‌ను పొందే అవకాశం ఉంది. దీని వలన కారు బరువు దాదాపు 100 కిలోలు పెరిగే అవకాశం ఉంది మరియు దానికి అనుగుణంగాఫ్లోర్ పాన్ కూడా సవరించబడనుంది.

కొత్త 2022 మోడల్ టాటా నెక్సాన్ ఈవీ దాదాపు 30 శాతం పెద్ద బ్యాటరీ ప్యాక్ ను కలిగి ఉండటం వలన దాని బూట్ స్పేస్‌ కూడా ప్రభావితం అయ్యే అవకాశం ఇంది. అప్‌డేట్ చేయబడిన Nexon EVE లోకల్ టెస్ట్ సైకిల్ లో ఒకే ఛార్జ్‌పై సుమారు 400 కిమీ కంటే ఎక్కువ రేంజ్ ను కలిగి ఉంటుంని, అయితే వాస్తవ ప్రపంచ పరిధి అది దాదాపు 300-320 కిమీ రేంజ్ ను ఆఫర్ చేస్తుందని అంచనా వేయబడింది.

టాటా నెక్సాన్ ఈవీ స్టాండర్డ్ మరియు ఫాస్ట్ చార్జింగ్ టెక్నాలజీలని సపోర్ట్ చేస్తుంది. హోమ్ ఛార్జర్ ద్వారా ఈ కారు పూర్తిగా ఛార్జ్ చేయటానికి సుమారు 7 నుండి 8 గంటల సమయం పడుతుంది. అదే ఫాస్ట్ ఛార్జర్ ద్వారా అయితే, కేవలం 60 నిమిషాల్లో బ్యాటరీని 0 నుండి 80 శాతం వరకు ఛార్జ్ చేసుకోవచ్చు. కొత్త నెక్సాన్ ఈవీకి మరొక ముఖ్యమైన జోడింపు ఏంటంటే, ఇందులో ఎంపిక చేయగల రీ-జెన్ మోడ్‌లు ఉండటం.

ఇది డ్రైవర్‌ను రీజెనరేటివ్ బ్రేకింగ్ తీవ్రతను సర్దుబాటు చేయడానికి అనుమతిస్తుంది, ఇది దాని ఓవరాల్ రేంజ్ ను మరింత మెరుగుపరుస్తుంది. ప్రస్తుత టాటా నెక్సాన్ లో ఈ సర్దుబాటు సౌకర్యం లేదు. కొత్త వెర్షన్‌లో ఇతర ముఖ్యమైన మార్పులు కొత్త అల్లాయ్ వీల్స్‌, ESP (ఎలక్ట్రానిక్ స్టెబిలిటీ ప్రోగ్రామ్) వంటి ఫీచర్లను ఆశించవచ్చు. అయితే, ఈ మార్పుల కారణంగా దాని ధర కూడా సుమారు రూ.3-4 లక్షల వరకు పెరగవచ్చని భావిస్తున్నారు.