డీలర్‌షిప్‌ చేరుకున్న Skoda Slavia: త్వరలోనే టెస్ట్ డ్రైవ్స్

స్కోడా స్లావియా చాలా అద్భుతమైన మోడల్. ప్రస్తుతం డీలర్‌షిప్‌లకి దాని డిస్‌ప్లే మోడల్‌లను చేర్చారు. ఇప్పటికి అందిన సమాచారం ప్రకారం స్లావియా యొక్క ఉత్పత్తి కూడా ప్రారంభమైంది. కావున డెలివరీలు 2022 మార్చి నెలలో ప్రారంభమయ్యే అవకాశం ఉంటుంది.

డీలర్‌షిప్‌కి చేరిన స్కోడా స్లావియా కొత్త కలర్ లో కనిపిస్తుంది. ఈ కలర్ ఇప్పుడు మొదటిసారిగా కనిపిస్తోంది. ఇది చూడటానికి కూడా చాలా ఆకర్షణీయంగా ఉంది. ఇప్పుడు కంపెనీ డీలర్‌షిప్‌లో స్కోడా స్లావియాను రూ. 11,000 చెల్లింది బుక్ చేసుకోవచ్చని, సీఈవో జాక్ హోలిస్ తెలిపారు. అదే సమయంలో దీని ధర మార్చి 2022 మొదటి భాగంలో వెల్లడవుతుందని కూడా తెలిపారు.

స్కోడా స్లావియా కంపెనీ యొక్క ఉత్పత్తి అయిన రాపిడ్ స్థానంలో తీసుకురాబడుతోంది, అయితే ఇది పూర్తిగా కొత్త మోడల్, ఇటీవల కంపెనీ తన వెబ్‌సైట్ నుండి రాపిడ్‌ను తొలగించింది. స్కోడా రాపిడ్ కంపెనీ యొక్క బెస్ట్ మోడల్. అయితే ఇది ఇప్పుడు తొలగించబడింది.

ఇదివరకు చెప్పుకున్నట్లుగా స్కోడా స్లావియా అనేది కంపెనీ యొక్క కొత్త మోడల్. కొత్త స్కోడా స్లావియా మొత్తం 5 కలర్ అప్సన్స్ లో అందించనుంది. అవి కాండీ వైట్, బ్రిలియంట్ సిల్వర్, కార్బన్ స్టీల్, టోర్నాడో రెడ్ మరియు క్రిస్టల్ బ్లూ కలర్స్.

స్కోడా స్లావియా MQB A0 IN ప్లాట్‌ఫారమ్‌పై ఆధారపడిన సెడాన్. దీని డిజైన్ ఇటీవల అప్‌డేట్ చేయబడిన ఆక్టావియా వంటి సెడాన్‌ల నుండి ప్రేరణ పొందింది. కొత్త స్కోడా స్లావియా కంపెనీ ప్రస్తుత ర్యాపిడ్ మోడల్ కంటే పెద్దదిగా ఉంటుంది. కావున దీని కొలతల విషయానికి వస్తే, దీని పొడవు 4,541 మి.మీ, వెడల్పు 1,752 మి.మీ మరియు 1,487 మి.మీ ఎత్తును కలిగి ఉంటుంది. దీని వీల్‌బేస్ పరిమాణం కూడా 2,651 మి.మీ వరకు ఉంటుంది.

ఈ సెడాన్ చూడటానికి చాలా ఆకర్షనీయంగా ఉంటుంది. ఈ సెడాన్‌లో కంపెనీ సిగ్నేచర్ బటర్‌ఫ్లై ఆకారపు ఫ్రంట్ గ్రిల్ మరియు పెద్ద రేడియేటర్ గ్రిల్ అందించింది. అంతే కాకుండా ఇందులో ఎల్-షేప్ ప్రొజెక్టర్ హెడ్‌లైట్లు, 16 ఇంచెస్ అల్లాయ్ వీల్స్, షార్క్ ఫిన్ యాంటెన్నా మరియు బూట్-మౌంటెడ్ నంబర్ ప్లేట్ రీసెస్‌ను కూడా పొందుతుంది. ఈ కారు యొక్క ORVMలపై టర్న్ ఇండికేటర్లను మరియు సైడ్ బాడీలో లైనింగ్‌ను పొందుతుంది.

కంపెనీ ఇంతకుముందే ఈ స్లావియా సెడాన్ యొక్క ఇంటీరియర్‌ను కూడా అప్‌డేట్ చేసింది. ఇది ఆధునిక ఫీచర్స్ పొందుతుంది. ఇందులోని క్యాబిన్‌ను డ్యూయల్-టోన్ ఫినిషింగ్‌తో పరిచయం చేసింది, ఇది చాలా ప్రీమియంగా కనిపిస్తుంది. డ్యాష్‌బోర్డ్ మరియు అపోల్స్ట్రే కూడా డ్యూయల్-టోన్‌లో ఉంచబడ్డాయి.

అంతే కాకుండా డ్యాష్‌బోర్డ్‌కి డ్యూయల్-టోన్ ఫినిషింగ్‌తో బ్లాక్ పియానో ​​ఫినిషింగ్ కూడా ఇవ్వబడింది, కావున ఇది మరింత ప్రీమియంగా కనిపిస్తుంది. ఇందులో డ్యూయల్-స్పోక్ స్టీరింగ్ వీల్, స్టీరింగ్ వీల్ మౌంట్ కంట్రోల్స్, ఆటోమేటిక్ క్లైమేట్ కంట్రోల్, 25.4 సెం.మీ టచ్‌స్క్రీన్ ఇన్ఫోటైన్‌మెంట్ సిస్టమ్ మరియు 20.32 సెం.మీ డిజిటల్ కాక్‌పిట్ వంటి ఫీచర్లను పొందుతుంది.

సేఫ్టీ విషయానికి వస్తే, ఈ కారులో 6 ఎయిర్‌బ్యాగ్‌లు, EBS తో కూడిన ABS, ESC, ISOFIX మౌంట్‌లు, రియర్ పార్కింగ్ కెమెరా మరియు రియర్ పార్కింగ్ సెన్సార్‌లు ఉన్నాయి.

కంపెనీ యొక్క ఈ కొత్త స్కోడా స్లావియా రెండు ఇంజన్ ఆప్షన్లతో అందుబాటులో ఉండే అవకాశం ఉంటుంది. ఇందులో ఒకటి 1.0-లీటర్ టిఎస్ఐ 3 సిలిండర్ కాగా, మరొకటి 1.5-లీటర్ టిఎస్ఐ 4 సిలిండర్ టర్బోచార్జ్డ్ పెట్రోల్ ఇంజన్.

ఇందులోని 1.0-లీటర్ టిఎస్ఐ 3-సిలిండర్ ఇంజన్ 115 బిహెచ్‌పి పవర్ మరియు 178 ఎన్ఎమ్ గరిష్ట టార్క్‌ను ఉత్పత్తి చేయగలదు. ఇంజిన్ 6-స్పీడ్ మాన్యువల్ గేర్‌బాక్స్ మరియు 6-స్పీడ్ ఆటోమేటిక్ టార్క్‌తో అందించబడుతుంది. ఇక 1.5-లీటర్ ఇంజన్ 150 బిహెచ్‌పి పవర్ మరియు 250 ఎన్ఎమ్ గరిష్ట టార్క్‌ను ఉత్పత్తి చేయగలదు. ఇంజిన్ 6-స్పీడ్ మాన్యువల్ గేర్‌బాక్స్ మరియు 7-స్పీడ్ DSG ఆటోమేటిక్ గేర్‌బాక్స్‌తో జత చేయబడింది.

భారతీయ మార్కెట్లో విడుదల కానున్న కొత్త స్లావియా హోండా సిటీ, హ్యుందాయ్ వెర్నా మరియు మారుతి సుజుకి సియాజ్ వంటి వాటికి ప్రత్యర్థిగా ఉంటుంది. దేశీయ మార్కెట్లో విడుదల కానున్న ఈ కొత్త సెడాన్ మంచి ఆదరణ పొందుతుందని భావిస్తున్నాము. ఎందుకంటే కంపెనీ యొక్క స్కోడా కుషాక్ కూడా అతి తక్కువ కాలంలోనే అత్యంత ప్రజాదరణ పొందిన SUV గా అవతరించింది.

Image Courtesy:Shirun Kumar