రైతులకు శుభవార్త..! మహీంద్రా నుంచి పొట్టి ట్రాక్టర్ విడుదల.. ప్రారంభ ధర రూ.5.64 లక్షలు మాత్రమే

దేశీయ ట్రాక్టర్ వ్యాపారంలో మహీంద్రా గ్రూప్ పెద్ద వ్యాపారాన్ని కలిగి ఉందనడంలో సందేహం లేదు. నమ్మకానికి, మెరుగైన పనితీరుకు ఇవి పెట్టిన పేరుగా అన్నదాతల్లో నమ్మకం సంపాదించింది. కఠినమైన వ్యవసాయ భూముల్లో సైతం ఈ ట్రాక్టర్లు బాగా పనిచేస్తాయని రైతుల నమ్మకం.

కాగా స్వాతంత్ర్య దినోత్సవం సందర్భంగా మహీంద్రా గ్రూప్ సరికొత్త ఆవిష్కరణతో ముందుకొచ్చింది. దక్షిణ ఆఫ్రికాలోని కేప్ టౌన్‌లో జరిగిన ఒక ఈవెంట్‌లో ఫ్యూచర్‌స్కేప్‌లో 'ఫ్యూచర్-రెడీ' ట్రాక్టర్ల శ్రేణిని మహీంద్రా ట్రాక్టర్స్ ఆవిష్కరించింది. వీటికి మహీంద్రా ఓజా (Mahindra OJA) అని పేరుపెట్టింది.

ప్రముఖ ఆటోమొబైల్ తయారీదారుగా గుర్తింపు పొందిన మహీంద్రా.. భారత్‌లోనే కాకుండా విదేశాల్లో కూడా మంచి ఆదరణ పొందుతోంది. తాజాగా ఆవిష్కరించిన మహీంద్రా ఓజా ట్రాక్టర్లు.. నాలుగు చక్రాలతో నడిచే లైట్ వెయిట్ ట్రాక్టర్లు. డిజైన్ & ఇంజినీరింగ్‌లో ట్రాన్స్‌ఫార్మేటివ్ మార్పును తీసుకొస్తూ.. ట్రాక్టర్ టెక్నాలజీలో కొత్త ఆవిష్కరణను తీసుకొస్తోంది.

ఓజా ట్రాక్టర్లు మరింత శక్తివంతమైనవని కంపెనీ తెలిపింది. మహీంద్రా ఓజా 27 హెచ్‌పి ట్రాక్టర్ ధర రూ.5.64 లక్షలు, ఓజా 40 హెచ్‌పి ట్రాక్టర్ ధర రూ.7.35 లక్షలు (ఎక్స్-షోరూమ్, పూణే). ప్రస్తుతం మహీంద్రా కంపెనీ దేశీయ ట్రాక్టర్ మార్కెట్‌లో 42 శాతం మార్కెట్ వాటాను కలిగి ఉంది. కాగా గతేడాది కంపెనీ 9.45 లక్షల యూనిట్ల ట్రాక్టర్లను విక్రయించింది.

కొత్త మహీంద్రా ట్రాక్టర్లు 3-ఓజా సబ్-కాంపాక్ట్, కాంపాక్ట్ మరియు చిన్న యుటిలిటీ ప్లాట్‌ఫారంపై ఆధారపడి ఉంటాయి. 4WD (ఫోర్ వీల్ డ్రైవ్) టెక్నాలజీతో రూపొందించారు. సబ్-కాంపాక్ట్ ప్లాట్‌ఫారమ్‌తో కూడిన ట్రాక్టర్‌లు USAలో అమ్మకాలకు అనుగుణంగా తయారు చేశారు. చిన్న యుటిలిటీ ప్లాట్‌ఫారమ్‌తో కూడిన ట్రాక్టర్లు USA, భారత్ మరియు ఆసియా మార్కెట్‌లలో విక్రయాలకు అనుగుణంగా రూపొందించారు.

కాంపాక్ట్ ప్లాట్‌ఫారమ్ ఆధారంగా రూపొందించిన ట్రాక్టర్లు అమెరికా మరియు ఆసియా మార్కెట్‌లలో అమ్మకానికి అనుగుణంగా ఉంటాయి. ముఖ్యంగా భారత మార్కెట్ కోసం, కాంపాక్ట్, చిన్న యుటిలిటీ ప్లాట్‌ఫారమ్ ఆధారంగా కంపెనీ 7 కొత్త ట్రాక్టర్ మోడళ్లను విడుదల చేసినట్లు మహీంద్రా ప్రకటించింది. వీటిని అనేక రకాల వ్యవసాయ పనులకు వినియోగించుకోవచ్చని మహీంద్రా గ్రూప్ వెల్లడించింది.

ఈ ట్రాక్టర్లన్నీ 4WD డ్రైవింగ్ టెక్నాలజీని కలిగి ఉన్నాయి. 20 hp - 40 hp (14.91kW - ​​29.82kW) పరిధిలో ఉన్నాయి. మహీంద్రా ఓజా శ్రేణి ట్రాక్టర్లు PROJA, MYOJA, ROBOJA మూడు టెక్నాలజీ ప్యాక్‌లను కలిగి ఉన్నాయి మరియు. ఇవన్నీ వ్యవసాయ ట్రాక్టర్లు అయినా ఇతర ఏ వాహనంలో లేని ఫీచర్లు ఇందులో ఉండటం ప్రత్యేకత.

PROJA టెక్నాలజీ ప్యాక్‌లో ట్రాక్టర్, ఫార్వర్డ్/రివర్స్ షటిల్ & క్రీపర్, టిల్ట్ మరియు టెలిస్కోపిక్ స్టీరింగ్, ఎలక్ట్రిక్ వెట్ PTO మరియు ప్రొజెక్టర్ హెడ్‌ల్యాంప్‌లతో పాటు సంతకం DRLలు ఉన్నాయి. MYOJA టెక్నాలజీతో కూడిన ట్రాక్టర్ సర్వీస్ అలర్ట్ & టెలిమాటిక్స్ ఫీచర్లతో వస్తుంది.

ROBOJA టెక్నాలజీ ప్యాక్‌తో కూడిన ట్రాక్టర్‌లో ఆటో PTO ఆన్/ఆఫ్ (టర్నింగ్ & రివర్స్), ఆటో బ్రేకింగ్, ఎలక్ట్రానిక్ డెప్త్ & డ్రాఫ్ట్ కంట్రోల్, ఎలక్ట్రానిక్ క్విక్ రైజ్ & లోయర్, మరియు ఆటో ఇంప్లిమెంట్ లిఫ్ట్ వంటి అనేక ఫీచర్లు ఉన్నాయి. మహీంద్రా ఓజా శ్రేణి ట్రాక్టర్లను తెలంగాణలోని జహీరాబాద్‌లోని తన తయారీ ప్లాంట్‌లో తయారుయాలని నిర్ణయించింది.

మహీంద్రా అండ్ మహీంద్రా లిమిటెడ్ ఫామ్ డివిజన్ సీఈఓ విక్రమ్ వా మాట్లాడుతూ, వచ్చే అక్టోబర్ నుంచి భారత్‌లోని వినియోగదారులకు ఈ ట్రాక్టర్లను డెలివరీ చేయనున్నట్లు తెలిపారు. అలాగే, మహీంద్రా ట్రాక్టర్లకు ఇప్పటికే దేశంలో భారీగా అభిమానులు ఉన్నారు. ఓజా శ్రేణి ట్రాక్టర్లు ఆకర్షణీయమైన ఫీచర్ల కారణంగా ఎక్కువ మంది వినియోగదారులను ఆకర్షించే అవకాశం ఉంది.

ప్రగతిశీల రైతులను లక్ష్యంగా చేసుకుని కొత్త కొత్త OJA ట్రాక్టర్ల శ్రేణిని మార్కెట్లోకి ప్రవేశపెడుతున్నట్లు మహీంద్రా & మహీంద్రా ఫార్మ్ ఎక్విప్‌మెంట్ సెక్టార్ ప్రెసిడెంట్ హేమంత్ సిక్కా వెల్లడించారు. ఇది నిజంగా ప్రపంచవ్యాప్తంగా వ్యవసాయంలో విప్లవాత్మక మార్పుల పట్ల తమ నిబద్ధతను ప్రతిబింబిస్తుందని ఆయన అన్నారు.