Maruti Fronx CNG కొత్త మారుతి సుజుకి ఫ్రాంక్స్‌ CNG కారు విడుదల.. ధర రూ. 8.41 లక్షలు

భారత మార్కెట్‌లో మారుతి సుజుకి అత్యంత ప్రజాదరణ పొందిన కార్ల తయారీదారుగా గుర్తింపు పొందింది. వాహనదారుల అభిరుచికి అనుగుణంగా ఎప్పటికప్పుడు కొత్త మోడల్‌ కార్లను పరిచయం చేస్తూ మార్కెట్‌లో సత్తా చాటుతోంది. తాజాగా మారుతి సుజుకి నుంచి కొత్త ఫ్రాంక్స్‌ సీఎన్‌జీ మోడల్‌ను విడుదల అయింది. పూర్తి సమాచారం ఈ కథనంలో..

మారుతి సుజుకి కొత్త ఫ్రాంక్స్‌(Fronx) S CNG ను భారత మార్కెట్లో విడుదల చేసింది. రూ. 8.41 లక్షల (ఎక్స్‌షో రూమ్‌) ప్రారంభ ధరతో నేడు విడుదల అయింది. Fronx S-CNGని మారుతి సుజుకి సబ్‌స్క్రైబ్ ఆప్షన్‌ ద్వారా కేవలం రూ. 23,248 చెల్లించి నెలవారీ సబ్‌స్క్రిప్షన్ ఫీజుతో కూడా సొంతం చేసుకోవచ్చు. ఇక ఫీచర్లు, ఇంజిన్‌ పనితీరును పరిశీలిస్తే..

ఫీచర్లు: మారుతి సుజుకి ఫ్రాంక్స్‌ సీఎన్‌జీ కారు 5-స్పీడ్ మాన్యువల్ ట్రాన్స్‌మిషన్‌తో జతచేయబడింది. ఇది అద్భుతమైన బాడీ కలర్ ఆప్షన్‌లతో అందుబాటులో ఉంది. డ్యూయల్ ఫ్రంట్ ఎయిర్‌బ్యాగ్‌లు, రివర్స్ పార్కింగ్ సెన్సార్లు మరియు స్మార్ట్‌ప్లే ప్రో ఇన్ఫోటైన్‌మెంట్ సిస్టమ్ వంటి అధునాతన ఫీచర్లతో ఆకర్షిస్తోంది. పర్యావరణ అనుకూల డ్రైవింగ్ అనుభవాన్ని ఆస్వాదించేలా ఈ కారు రూపొందించబడింది.

ఇంజిన్‌: మారుతి సుజుకి ఫ్రాంక్స్‌ సీఎన్‌జీ 1.2L K- సిరీస్ డ్యూయల్‌జెట్, డ్యూయల్ VVT పెట్రోల్ ఇంజిన్‌తో ఆధారితమై CNG కిట్‌తో పనిచేస్తుంది. ఇంజిన్ 6,000 rpm వద్ద 76 bhp పవర్ అవుట్‌పుట్ మరియు CNG మోడ్‌లో 4,300 rpm వద్ద 98.5 Nm టార్క్‌ను ఉత్పత్తి చేస్తుంది. ఫ్రాంక్స్ CNG లీటరుకు 28.51 కి.మీ మైలేజీని ఇస్తుంది.

మారుతి సుజుకి ఫ్రాంక్స్ S-CNG సిగ్మా మరియు డెల్టా అనే రెండు వేరియంట్లలో కొనుగోలు చేయవచ్చు. సిగ్మా వేరియంట్‌ ఎక్స్‌షోరూమ్‌లో రూ. 8.41 లక్షల ధరతో అందుబాటులో ఉంది. డెల్టా వేరియంట్‌ రూ. 9.27 లక్షల ధరతో వినియోగదారులు కొనుగోలు చేయవచ్చు. ఈ కొత్త లాంచ్‌తో, మారుతి ఇప్పుడు మొత్తం 15 CNG మోడల్‌లను విక్రయిస్తోంది.

మారుతీ సుజుకి ఇండియా లిమిటెడ్ మార్కెటింగ్ & సేల్స్ సీనియర్ ఎగ్జిక్యూటివ్ ఆఫీసర్ శశాంక్ శ్రీవాస్తవ ఫ్రాంక్స్‌ ఎస్‌- సీఎన్‌జీని పరిచయం చేస్తూ " న్యూ జెన్‌ Fronx S-CNG డైనమిక్ రోడ్ ప్రెజెన్స్‌తో ట్రయల్‌బ్లేజర్లుగా ఉన్న కస్టమర్లను లక్ష్యంగా చేసుకుంది. ఈ సంవత్సరం ఆటో ఎక్స్‌పోలో ప్రవేశపెట్టినప్పటి నుంచి, ఫ్రాంక్స్‌ దాని స్పోర్టీ డిజైన్ లాంగ్వేజ్, అధునాతన పవర్‌ట్రెయిన్ మరియు ప్రీమియం టెక్నాలజీ కారణంగా విపరీతమైన స్పందనను పొందింది.'

"2010లో, మేము మా మొదటి CNG అనుకూలమైన మోడల్‌ను పరిచయం చేశాం. అప్పటి నుంచి, మేము దేశంలో 1.4 మిలియన్ల కంటే ఎక్కువ S-CNG వాహనాలను విక్రయించాం. ఇది మా సాంకేతికతపై మా కస్టమర్ల విశ్వాసం, నమ్మకానికి నిజమైన నిదర్శనం. FRONX S-CNG మా మొత్తం అమ్మకాలలో S-CNG కార్ల వాటాను పెంచుతుందని ఆశిస్తున్నాం. గ్రీన్ మొబిలిటీ పోర్ట్‌ఫోలియోను మరింత బలోపేతం చేస్తుందని విశ్వసిస్తున్నాం" అని అన్నారు.

మారుతి సుజుకి సబ్‌స్క్రిప్షన్‌ అనేది కొత్త కారును ఇంటికి తీసుకురావడానికి అనుకూలమైన మార్గం. పూర్తి రిజిస్ట్రేషన్, సర్వీస్ & మెయింటెనెన్స్, ఇన్సూరెన్స్ మరియు రోడ్‌సైడ్ అసిస్టెన్స్ ఖర్చును సమగ్రంగా కవర్ చేసే అన్నింటినీ కలుపుకొని నెలవారీ సబ్‌స్క్రిప్షన్ ఫీజును చెల్లించడం ద్వారా, కొత్త కారును స్వంతం చేసుకోకుండానే ఉపయోగించడానికి వినియోగదారునికి అనుమతి లభిస్తుంది.