9 రంగుల్లో మరింత కలర్‌ఫుల్‌గా మారుతి సుజుకి స్విఫ్ట్‌.. టూ వీలర్లకు పోటీగా లీటర్‌కు 40 కి.మీ మైలేజ్‌.!!

జపాన్‌ తయారీదారు మారుతి సుజుకి కార్లకు దేశంలో విపరీతమైన డిమాండ్‌ ఉంది. మారుతి నుంచి పలు మోడళ్లలో అధునాతన కార్లు అందుబాటులో ఉన్నప్పటికీ.. దేశంలో అత్యధికంగా అమ్ముడవుతున్న మోడళ్లలో స్విఫ్ట్‌(Swift) ఒకటిగా నిలిచింది. అత్యంత ప్రజాదరణ పొందిన మారుతి సుజుకి స్విఫ్ట్ కారు మొదటిసారిగా 2005లో భారత మార్కెట్లో విడుదలై సేల్స్‌లో దూసుకుపోతోంది.

ప్రస్తుతం భారత మార్కెట్లో అందుబాటులో ఉన్న మారుతి స్విఫ్ట్‌ను 2018 ఆటో ఎక్స్‌పోలో ప్రవేశపెట్టారు. ఈ నేపథ్యంలో స్విఫ్ట్‌ విక్రయాల్లో మారుతీ సుజుకి మరింత వృద్ధిని సాధించేందుకు ప్రయత్నిస్తోంది. మారుతి సుజుకి న్యూ జెన్‌ స్విఫ్ట్‌ను విడుదల చేయడానికి సన్నాహాలు చేస్తోంది. ఈ క్రమంలో నాల్గవ తరం మారుతి స్విఫ్ట్‌ను 2023 జపాన్ మొబిలిటీ షోలో కాన్సెప్ట్ కారుగా ప్రదర్శించారు.

దీని ప్రకారం 2024 సుజుకి స్విఫ్ట్ ఆకర్షణీయమైన 9 కొత్త కలర్‌ ఆప్షన్లలో అందుబాటులోకి రానుంది. కాగా ప్రస్తుతం, స్విఫ్ట్ భారతదేశంలో 7 సింగిల్-టోన్ కలర్స్‌, 3 డ్యూయల్-టోన్ కలర్ ఆప్షన్‌లలో లభిస్తోంది. ఇక రానున్న మారుతి సుజుకి స్విఫ్ట్‌ 2024 కలర్స్ విషయానికొస్తే..

కారవాన్ ఐవరీ పెర్ల్ మెటాలిక్, ప్యూర్‌ వైట్‌ పెర్ల్, ప్రీమియం సిల్వర్ మోటాలిక్‌, స్టార్‌ సిల్వర్‌ మెటాలిక్‌, సూపర్‌ బ్లాక్‌ పెర్ల్‌, బర్నింగ్ రెడ్ పెర్ల్ మెటాలిక్, ఫ్లేమ్ ఆరెంజ్ పెర్ల్ మెటాలిక్, కూల్ ఎల్లో మెటాలిక్, ఫ్రాంటియర్ బ్లూ మెటాలిక్ వంటి ఆకర్షణీయమైన కలర్స్‌లో అందుబాటులోకి రానున్నట్లు మారుతి సంస్థ వెల్లడించింది.

కొత్త స్విఫ్ట్ 2024 చాలా స్పోర్టివ్‌గా కనిపించనుంది. ప్రీమియం లుక్‌ కోసం గ్లోస్ బ్లాక్ ఫినిషింగ్‌తో రీడిజైన్ చేయబడిన ఫ్రంట్ గ్రిల్‌ని కలిగి ఉంటుంది. ప్రస్తుత మోడల్‌తో పోలిస్తే, కొత్త మోడల్ ప్రొజెక్టర్ LED హెడ్‌ల్యాంప్‌లు మరియు LED DRLలతో చాలా సొగసైన-కనిపించే హెడ్‌ల్యాంప్‌తో రానుంది.

కొత్త సుజుకి స్విఫ్ట్‌లో DRL విషయానికొస్తే ఇది ఇప్పటికే ఉన్న వెర్షన్ నుంచి భిన్నంగా ఉంటుంది. బంపర్‌ మరింత ఆకర్షణీయంగా ఉండటంతో మొత్తం స్పోర్టీ క్యారెక్టర్ లేదా కారు డిజైన్‌కి బాగా సరిపోతుందనే చెప్పవచ్చు. స్విఫ్ట్ ఫాగ్ ల్యాంప్స్‌ను బంపర్‌లో చూడవచ్చు.

స్విఫ్ట్‌ 2024 బోనెట్ డిజైన్ ప్రస్తుత వెర్షన్ కంటే భిన్నంగా ఉండనుంది. ఇక సైడ్ ప్రొఫైల్ విషయానికి వస్తే, కొత్త అల్లాయ్ వీల్స్‌ గురించి చెప్పుకోవాలి. అంతేకాకుండా, కారు వెనుక డోర్లను రీడిజైన్‌ చేశారు. ఇది ఇకపై సి-పిల్లర్‌లో డోర్ హ్యాండిల్‌ను ఉండదని తెలుస్తోంది. కారు వెనుక భాగంలో సరికొత్త స్విఫ్ట్ రీడిజైన్ చేయబడిన టెయిల్ ల్యాంప్‌ను కలిగి ఉంది.

కొత్త క్లియర్ లెన్స్ LED టెయిల్ లైట్‌తో మరింత ప్రీమియం లుక్‌తో ఉంటుంది. ఇంకా ఇది C-ఆకారపు బ్రేక్ ల్యాంప్‌లతో రూపొందించారు. అయితే మారుతి సుజుకి వెల్లడించిన కొత్త స్విఫ్ట్‌ కలర్స్‌లో భారత్‌లోకి అందుబాటులోకి వస్తాయా అనే దానిపై స్పష్టమైన సమాచారం అందుబాటులో లేదు.

న్యూ జెన్‌ స్విఫ్ట్ Z12 కోడ్‌నేమ్‌తో కూడిన 1.2 లీటర్ 3-సిలిండర్ ఇంజిన్‌తో పనిచేస్తుంది. ప్రస్తుతం ఉన్న 1.2 లీటర్ 4- సిలిండర్ K-సిరీస్ మోటర్‌ను ఇందులోనూ ఉపయోగించారు. స్విఫ్ట్ యొక్క G-సిరీస్ ఇంజిన్ అత్యంత ముఖ్యమైన లక్షణం దాని 3-సిలిండర్ కాన్ఫిగరేషన్. ఇది మునుపటి 4-సిలిండర్ సెటప్‌ను భర్తీ చేస్తుంది. కాగా ఈ కారు అత్యధికంగా 40 కి.మీ మైలేజీ ఇస్తుందని కంపెనీ తెలిపింది.