కొత్త వేరియంట్‌లో హ్యుందాయ్‌ వెన్యూ లాంచ్‌.. ధర రూ. 10 లక్షల లోపే.. వివరాలివే.!!

ప్రముఖ కార్ల తయారీ సంస్థ హ్యుందాయ్ మోటార్స్‌ త్వరలో.. తన క్రెటా కారు యొక్క కొత్త N లైన్‌ను భారతదేశంలో విడుదల చేయనుంది. భారీ అంచనాలతో క్రెటా ఎన్-లైన్ విడుదల కానుంది. ఈ క్రమంలో తాజాగా హ్యుందాయ్ భారత మార్కెట్లోని తన మరొక ప్రసిద్ధ SUV, వెన్యూ మోడల్‌లో కొత్త ప్రత్యేకమైన టర్బో వేరియంట్ ఎంపిక(Hyundai Venue Exclusive Turbo Variant Launch)ను విడుదల చేసింది.

గత కొన్ని రోజులుగా భారత్‌లో వరుసగా.. కొత్త రకాల కార్లు విడుదలవుతున్నాయి. ప్రముఖ దేశీ బ్రాండ్‌ టాటా మోటార్స్‌ కూడా దాని ప్రసిద్ధ నెక్సాన్, నెక్సాన్ EV, హారియర్ మరియు సఫారి కార్లలో డార్క్ ఎడిషన్‌ను విడుదల చేసింది. అదేవిధంగా, MG మోటార్ కంపెనీ కూడా తన హెక్టర్ కారులో రెండు కొత్త ప్రో వేరియంట్‌లను మార్కెట్లోకి తీసుకువచ్చింది.

ఇక కొత్త హ్యుందాయ్‌ వెన్యూ(Hyundai Venue Exclusive Turbo Variant) ఎక్స్‌క్లూజివ్ టర్బో వేరియంట్ ధర రూ. 9.99 లక్షలు, ఎక్స్-షోరూమ్‌గా ఉంది. యంగ్ జనరేషన్ కస్టమర్లను ఆకర్షించేందుకు ఇలాంటి వెన్యూ కారును ప్రవేశపెట్టినట్లు హ్యుందాయ్ మోటార్స్‌ ప్రకటించింది.

ఆసక్తి గల కస్టమర్‌లు ఈ కొత్త వెన్యూ ఎక్స్‌క్లూజివ్‌ టర్బో వేరియంట్‌ను ఆన్‌లైన్‌లో లేదా వారి సమీప డీలర్‌షిప్ ద్వారా బుక్ చేసుకునే సదుపాయం ఉంది. కొత్త వెన్యూ ఎక్స్‌క్లూజివ్‌ టర్బో వేరియంట్‌ కారు డెలివరీలు(Hyundai Venue Exclusive Turbo Variant Deliveries) త్వరలో ప్రారంభం కానున్నాయి.

వెన్యూ యొక్క కొత్త ఎక్స్‌క్లూజివ్‌ వేరియంట్ 1.0-లీటర్ టర్బో పెట్రోల్ ఇంజిన్‌తో మాత్రమే అందుబాటులో ఉంటుంది. ఐడియల్ స్టాప్ & గో (ISG) టెక్నాలజీని కలిగి ఉన్న ఈ ఇంజిన్ గరిష్టంగా 120 PS పవర్ మరియు 172 Nm టార్క్‌ని ఉత్పత్తి చేస్తుంది.ఈ ఇంజిన్‌ 6-స్పీడ్ మ్యాన్యువల్ గేర్‌బాక్స్‌తో జతచేయబడి ఉంటుంది.

ఇక డిజైన్‌ విషయానికొస్తే వెన్యూ ఎక్స్‌క్లూజివ్‌ టర్బో వేరియంట్‌ ఆకర్షణీయంగా ఉంటుంది. ఎక్స్‌టీరియర్‌ పరంగా 16-అంగుళాల వీల్స్‌, ముందు భాగంలో డార్క్ క్రోమ్ గ్రిల్, రూఫ్ రెయిల్‌లు, షార్క్ ఫిన్-ఆకారపు యాంటెన్నా మరియు టెయిల్‌గేట్‌పై 'ఎక్స్‌క్లూజివ్' బ్యాడ్జ్ వంటి వాటితో ఆకర్షణీయమైన లుక్‌ను కలిగి ఉంది.

ఫీచర్ల విషయానికొస్తే.. వెన్యూ ఎక్స్‌క్లూజివ్‌ టర్బో వేరియంట్‌ ఆపిల్‌ కార్‌ప్లే & ఆండ్రాయిడ్‌ ఆటో సపోర్ట్‌తో కూడిన 8-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వాయిస్ కంట్రోల్, డిజిటల్ ఇన్‌స్ట్రుమెంట్ క్లస్టర్, ఫ్రంట్‌ సీట్ల మధ్య స్టోరేజ్ ఏరియాతో కూడిన ఆర్మ్‌రెస్ట్, 2-స్టెప్ రిక్లైనింగ్ సీట్లు, అన్ని సీట్లలో సర్దుబాటు చేయగల హెడ్‌రెస్ట్‌లు వంటి వాటిని కలిగి ఉంది.

అయితే కొత్త ఎక్స్‌క్లూజివ్ టర్బో వేరియంట్‌తో పాటు, వెన్యూ కారు యొక్క S (Optional) టర్బో వేరియంట్ కూడా కొన్ని కొత్త ఫీచర్లతో మార్కెట్లోకి పరిచయం అయింది. వెన్యూ S (Optional) టర్బో వేరియంట్ డ్రైవర్ & ప్యాసింజర్ కోసం ఎలక్ట్రిక్ సన్‌రూఫ్ మరియు మ్యాప్ ల్యాంప్స్ వంటి కొత్త ఫీచర్లతో అందుబాటులో ఉంది.

భారతదేశంలోని ప్రముఖ సబ్-కాంపాక్ట్ SUVలలో హ్యుందాయ్ వెన్యూ ఒకటిగా ఉంది. అదే సమయంలో, ఈ హ్యుందాయ్ SUVకి మార్కెట్లో సేల్స్‌ పరంగా గట్టి పోటీని కలిగి ఉంది. ఈ క్రమంలో సేల్స్‌ను పెంచుకునేందుకు కస్టమర్లను ఆకర్షించే దిశగా.. కొత్త వేరియంట్లు, కొత్త ఫీచర్లతో తన ఎగ్జిస్టింగ్‌ మోడళ్లను విడుదల చేస్తోంది.