సేఫ్టీకి పెద్ద పీట.. క్రాష్ టెస్టులో ఫైవ్ స్టార్ రేటింగ్ సాధించిన ఎలక్ట్రిక్ కార్లు ఇవే..టాటా నుంచి మహీంద్రా వ

ఇటీవల కాలంలో కొత్తగా వాహనం కొనేవారు చూసే ప్రధాన అంశం సేఫ్టీ. ముఖ్యంగా కారు క్రాష్ టెస్ట్‌లో ఎన్ని స్టార్ రేటింగ్ వచ్చిందనే దానిపై వినియోగదారులు దృష్టి సారిస్తున్నారు. ఈ క్రమంలో ఎలక్ట్రిక్ వాహనాలకు కూడా సేఫ్టీ విషయంలో అత్యధిక ప్రాధాన్యత ఇస్తున్నారు. దేశీయంగా నిర్వహించే సేఫ్టీ టెస్ట్ సంస్థ భారత్ ఎన్‌క్యాప్ (Bharat NCAP) క్రాష్ టెస్ట్‌లో అత్యధిక ఫైవ్ స్టార్ సేఫ్టీ రేటింగ్‌ను పొందిన ఎలక్ట్రిక్ వాహనాల వివరాలు ఇప్పుడు చూద్దాం. ఈ లిస్ట్‌లో ముఖ్యంగా టాటా మోటార్స్ (Tata Motors), మహీంద్రా (Mahindra) కంపెనీల నుంచి వచ్చిన మోడళ్లు ఉన్నాయి.

1. టాటా పంచ్ ఈవి (Tata Punch EV)
మొదటగా టాటా చిన్న కారు పంచ్ ఈవి (Punch EV)తో ప్రారంభిద్దాం. ఇది టాటా మోటార్స్ ఎంట్రీ లెవల్ మోడల్. భారత్ ఎన్‌క్యాప్‌లో ప్రయాణీకుల సేఫ్టీలో 32కి గాను 31.46 పాయింట్లు సాధించింది. అంతేకాకుండా, పిల్లల భద్రతలో 49కి గాను 45.00 పాయింట్లు సాధించి, కాంపాక్ట్ ఎలక్ట్రిక్ ఎస్‌యూవీగా నిరూపించుకుంది. అన్ని వేరియంట్లలో ఆరు ఎయిర్‌బ్యాగ్‌లు, యాంటీలాక్ బ్రేకింగ్ సిస్టమ్, ఎలక్ట్రానిక్ స్టెబిలిటీ కంట్రోల్ వంటి సేఫ్టీ ఫీచర్‌లను టాటా పంచ్ ఈవి అందిస్తుంది.

టాటా పంచ్ ఈవి గురించి చెప్పాలంటే.. ఇది బ్రాండ్ జెన్ 2 ఈవి ఆర్కిటెక్చర్ లేదా ఆక్టి డాట్ ఈవి ప్లాట్‌ఫామ్‌లో మొదటి మోడల్. ఇది స్మార్ట్, స్మార్ట్ ప్లస్, అడ్వెంచర్, ఎంపవర్‌డ్, ఎంపవర్‌డ్ ప్లస్ అనే ఐదు వేరియంట్‌లలో అందుబాటులో ఉంది. ఐదు కలర్ ఆప్షన్లలో.. మిడ్ రేంజ్, లాంగ్ రేంజ్ అనే రెండు వెర్షన్లలో ఈ వాహనాన్ని కొనుగోలు చేయవచ్చు.

లాంగ్ రేంజ్ వెర్షన్‌లో 421 కిలోమీటర్ల వరకు రేంజ్ అందించగల 35 kWh బ్యాటరీ ప్యాక్ ఉంది. లాంగ్ రేంజ్ వేరియంట్లలో 122 bhp పవర్, 190 Nm టార్క్ అందించే మోటార్ ఉంటుంది. సాధారణ వేరియంట్లలో 81 bhp పవర్, 114 Nm పీక్ టార్క్ అందించగల ఎలక్ట్రిక్ మోటార్ ముందు చక్రాలకు పవర్‌ను పంపుతుంది.

2. టాటా హారియర్ ఈవి
ఈ జాబితాలో తర్వాతి స్థానంలో టాటా పెద్ద కొడుకు హారియర్ ఈవి ఉంది. పెద్దల భద్రతలో హారియర్ ఈవి 32కి గాను 32 పాయింట్లు, పిల్లల భద్రతలో 49కి గాను 45 పాయింట్లు సాధించింది. ఫ్రంటల్ ఆఫ్‌సెట్ డిఫార్మబుల్ బారియర్ టెస్ట్, సైడ్ మూవబుల్ డిఫార్మబుల్ బారియర్ టెస్ట్‌లలో 16కి గాను 16 పాయింట్లు సాధించి టాటా మోటార్స్ ఎలక్ట్రిక్ ఎస్‌యూవీ సేఫ్టీలో తన సత్తాను చాటింది.

టాటా హారియర్ ఈవిలో రెండు బ్యాటరీ ప్యాక్ ఆప్షన్లు, రెండు మోటార్ కాన్ఫిగరేషన్ ఆప్షన్లను టాటా అందిస్తుంది. ఎలక్ట్రిక్ ఎస్‌యూవీ తక్కువ వేరియంట్లలో 65 kWh బ్యాటరీ ప్యాక్ ఉపయోగించగా, టాప్ వేరియంట్లలో 75 kWh బ్యాటరీ ప్యాక్ అమర్చబడింది. ఈ బ్యాటరీ ప్యాక్ ఆప్షన్‌లో RWD, QWD అనే రెండు మోటార్ కాన్ఫిగరేషన్‌లు ఉన్నాయి.

3. మహీంద్రా BE6, XEV9E
తరువాత మహీంద్రా ఈవి మోడల్స్ BE6, XEV9E ఉన్నాయి. మహీంద్రా XEV 9e క్రాష్ టెస్ట్‌లలో పెద్దల రక్షణకు 32 పాయింట్లకు గాను 32 పాయింట్లు సాధించింది. భారత్ NCAP క్రాష్ టెస్ట్‌లో పెద్దల ప్రయాణీకుల సేఫ్టీలో లోకల్ బిల్డ్ కారు సాధించిన అత్యధిక స్కోరు ఇది. అదే సమయంలో పిల్లల రక్షణ విషయంలో 49కి గాను 45 పాయింట్లు సాధించింది.

తక్కువ ధరలో లభించే మహీంద్రా BE 6 ఎలక్ట్రిక్ ఎస్‌యూవీ కూడా క్రాష్ టెస్ట్‌లో A+ రేటింగ్ పొందింది. దీనితో ఇది భారతదేశంలో అత్యంత సురక్షితమైన ఎలక్ట్రిక్ కార్లలో ఒకటిగా మారింది. పెద్దల ప్రయాణీకుల సేఫ్టీలో మహీంద్రా BR 6 ఎస్‌యూవీ 32 పాయింట్లకు గాను 31.97 పాయింట్లు సాధించింది. AOP టెస్ట్‌లో మహీంద్రా XEV 9e మోడల్ తర్వాత అత్యధిక స్కోరు సాధించిన మోడల్ BE 6.