తక్కువ ధర, మైలేజీలో కింగ్.. అందుకే ఈ కారును దేశంలో 30లక్షల మంది, ప్రపంచంలో కోటి మంది వాడుతున్నారు

కారు మార్కెట్లో ఎన్నో రకాల మోడల్స్ ఉన్నప్పటికీ కొన్ని కార్లు మాత్రమే ప్రజల మనసులను గెలుచుకుంటాయి. అలాంటి వాటిలో ఒకటి మారుతి సుజుకి వాగన్ఆర్. ఈ మోడల్ ప్రపంచవ్యాప్తంగా ఏకంగా కోటి యూనిట్ల అమ్మకాల మైలురాయిని దాటి సరికొత్త రికార్డు సృష్టించింది. సుజుకి సంస్థకు ఇది ఒక చరిత్రాత్మక విజయం. 1993లో జపాన్‌లో ప్రారంభమైన ఈ కారు ఆ తర్వాత ఐరోపా, భారత్ వంటి మార్కెట్లలో తనదైన ముద్ర వేసింది.

ముఖ్యంగా భారతదేశంలో వాగన్ఆర్ సాధించిన విజయం అసాధారణం. 2024లో 1.90 లక్షలకు పైగా యూనిట్ల అమ్మకాలతో మారుతి సుజుకికి అత్యధికంగా అమ్ముడైన కారుగా వాగన్ఆర్ నిలిచింది. సుజుకి సంస్థ ఒక అధికారిక ప్రకటనలో వాగన్ఆర్ అభివృద్ధి గురించి వివరించింది. ఈ కారును సెమీ-బోనెట్-స్టైల్ మినీ వాగన్‌గా రూపొందించారు. డ్రైవర్‌కి ప్రాధాన్యత ఇస్తూ, సౌకర్యవంతంగా, సులభంగా ఉపయోగించుకునేలా దీని డిజైన్ ఉంటుంది.

ఈ కారు డిజైన్‌ను మారుతి టాల్ బాయ్ డిజైన్‌గా ప్రచారం చేసి వినియోగదారుల దృష్టిని ఆకర్షించింది. జపాన్ నుంచి ఎగుమతి చేయబడిన మోడల్స్‌తో పాటు, భారత్, హంగేరీ, ఇండోనేషియా వంటి దేశాలలో కూడా ఈ కార్లను ఉత్పత్తి చేస్తున్నారు. ఆయా దేశాల అవసరాలకు అనుగుణంగా మార్పులు చేసి, ఈ కారును అభివృద్ధి చేయడం దీని విజయానికి ఒక ప్రధాన కారణం.

ప్రపంచవ్యాప్తంగా వ్యాగన్‌ఆర్ అమ్మకాలలో భారత్ వాటా చాలా ఎక్కువ. ఇది భారతదేశంలో ఎల్లప్పుడూ బెస్ట్ సెల్లింగ్ కార్లలో ఒకటిగా నిలిచింది. గతేడాది భారతదేశంలో వ్యాగన్‌ఆర్ 25 సంవత్సరాలు పూర్తి చేసుకుంది. అప్పటికి దేశంలో 32 లక్షలకు పైగా యూనిట్లు అమ్ముడయ్యాయి.

భారతదేశంలో వ్యాగన్‌ఆర్‌ను ఇప్పటివరకు మూడుసార్లు అప్‌డేట్ చేశారు. చివరిసారిగా 2019లో దీనిని కొత్త అవతారంలో లాంచ్ చేశారు. ఈ కొత్త మోడల్‌లో 1.0-లీటర్ మరియు 1.2-లీటర్ ఇంజిన్ ఆప్షన్లు అందుబాటులో ఉన్నాయి. అంతేకాకుండా, సీఎన్‌జీ వేరియంట్ కూడా ప్రైవేట్, కమర్షియల్ కస్టమర్ల మధ్య బాగా ప్రాచుర్యం పొందింది. సుజుకి సంస్థ జపాన్, భారత్‌తో పాటు మొత్తం 75 దేశాల్లో వ్యాగన్‌ఆర్‌ను విక్రయిస్తుంది.

భారత మార్కెట్లో లభించే మారుతి సుజుకి వాగన్ఆర్ ఫీచర్ల విషయానికి వస్తే, ఇది అన్ని రకాలుగా వినియోగదారులను ఆకట్టుకుంటుంది. ఇందులో 7-అంగుళాల స్మార్ట్‌ప్లే స్టూడియో టచ్‌స్క్రీన్ ఇన్ఫోటైన్‌మెంట్ సిస్టమ్ ఉంది. దీని ద్వారా నావిగేషన్, క్లౌడ్-బేస్డ్ సర్వీసులు పొందవచ్చు. సేఫ్టీకి ప్రాధాన్యత ఇస్తూ డ్యూయల్ ఫ్రంట్ ఎయిర్‌బ్యాగ్‌లు, EBDతో కూడిన ABS, రివర్స్ పార్కింగ్ సెన్సార్లు వంటి ఫీచర్లు ఉన్నాయి.

ఇంకా, AMT వేరియంట్లలో హిల్-హోల్డ్ అసిస్ట్, నాలుగు స్పీకర్లు, స్టీరింగ్ వీల్‌పై మౌంటెడ్ కంట్రోల్స్ కూడా ఉన్నాయి. ఇంజిన్ విషయానికి వస్తే, ఇందులో రెండు రకాల ఆప్షన్లు ఉన్నాయి. ఒకటి 1.0-లీటర్ మూడు-సిలిండర్ పెట్రోల్ ఇంజిన్. ఇది డ్యుయల్‌జెట్ డ్యూయల్ వీవీటీ టెక్నాలజీతో వస్తుంది. దీని మైలేజ్ లీటరుకు 25.19 కిలోమీటర్లు. CNG వేరియంట్‌లో అయితే కిలోకు 34.05 కిలోమీటర్లు మైలేజ్ లభిస్తుంది.

రెండోది 1.2-లీటర్ నాలుగు-సిలిండర్ పెట్రోల్ ఇంజిన్. ఈ కే-సిరీస్ ఇంజిన్ లీటరుకు 24.43 కిలోమీటర్లు మైలేజ్ అందిస్తుంది. వాగన్ఆర్ ఇంత పెద్ద విజయం సాధించడానికి అనేక కారణాలు ఉన్నాయి. దీని ప్రారంభ ఎక్స్-షోరూమ్ ధర రూ.5.79 లక్షలు. మధ్యతరగతి కుటుంబాలకు అందుబాటులో ఉండే ధరలో ఈ కారు లభిస్తుంది. అధిక మైలేజ్ కారణంగా ఇది రోజువారీ ప్రయాణాలకు చాలా అనుకూలంగా ఉంటుంది.

టాల్ బాయ్ డిజైన్ కారణంగా ఇందులో తగినంత హెడ్‌రూమ్, లెగ్‌రూమ్ ఉంటుంది. మారుతి సుజుకి కార్లకు సర్వీస్, విడి భాగాలు సులభంగా అందుబాటులో ఉంటాయి, ఖర్చు కూడా తక్కువగా ఉంటుంది. సిటీ ప్రయాణాలకు, పార్కింగ్ చేయడానికి ఇది చాలా అనుకూలంగా ఉంటుంది. ఈ అన్ని కారణాల వల్ల, వాగన్ఆర్ భారతదేశంతో పాటు ప్రపంచవ్యాప్తంగా కోటి యూనిట్ల అమ్మకాల మైలురాయిని దాటి మారుతి సుజుకికి ఒక గర్వకారణంగా నిలిచింది.