ఇప్పుడు డబుల్ పవర్, ఎక్కువ కలర్స్..రీ ఎంట్రీ ఇచ్చిన లెజెండరీ బైక్..చూస్తే వెంటనే కొనేయాలనిపిస్తుంది

భారతీయ మార్కెట్‌లోని ఐకానిక్ పెర్ఫార్మెన్స్ బైక్‌లలో బజాజ్ పల్సర్ 220F (Bajaj Pulsar 220F) ఒకటి. ది లెజెండ్, థ్రిల్ మెషిన్ అనే ముద్దుపేర్లతో పిలవబడే ఈ మోటార్‌సైకిల్.. పెర్ఫార్మెన్స్, స్పోర్టీ స్టైలింగ్, రోజువారీ వినియోగానికి సరైన బ్యాలెన్సును అందిస్తుంది. ప్రీమియం సెగ్మెంట్‌లోకి వెళ్లకుండానే మెరుగైన బైక్‌ను కోరుకునే వారికి ఇది మొదటి ఎంపిక.

బజాజ్ ఆటో (Bajaj Auto) 2022 ఏప్రిల్‌లో పల్సర్ 220F ఉత్పత్తిని ఆపివేసినప్పటికీ మార్కెట్‌లో దీనికి ఉన్న విపరీతమైన డిమాండ్‌, ప్రజాదరణ కారణంగా 2023 ఫిబ్రవరిలో BS VI ఫేజ్ 2 కాలుష్య నియంత్రణ ప్రమాణాలకు అనుగుణంగా దీన్ని తిరిగి లాంచ్ చేసింది. ఇప్పుడు బజాజ్ ఈ ప్రజాదరణ పొందిన మోడల్‌ను మరింత అప్‌డేట్ చేసింది.

ఇందులో రెండు కొత్త రంగులు, ఆకర్షణీయమైన గ్రాఫిక్స్‌ను చేర్చింది. ఈ కొత్త మోడల్‌ను డిసెంబర్ 19, 20 తేదీల్లో జరగబోయే ఇండియా బైక్ వీక్ (India Bike Week) ఈవెంట్‌లో ప్రదర్శించనున్నారు. ఈ వేదికపైనే దీని తుది ధరను కూడా ప్రకటించే అవకాశం ఉంది.

కొత్త బజాజ్ పల్సర్ 220F లో చేసిన అతి ముఖ్యమైన అప్‌డేట్ డ్యూయల్-ఛానల్ ABS (యాంటీ-లాక్ బ్రేకింగ్ సిస్టమ్)ను చేర్చడం. ఇంతకుముందు ఈ బైక్‌లో ముందు చక్రానికి మాత్రమే సింగిల్-ఛానల్ ABS ఉండేది. ఇప్పుడు డ్యూయల్-ఛానల్ ABS చేర్చడం వలన.. అధిక వేగంతో లేదా తడి రోడ్లపై ప్రయాణించేటప్పుడు చక్రాలు లాక్ అవ్వకుండా నిరోధించి, రైడర్‌కు మరింత సేఫ్టీ, నమ్మకాన్ని ఇస్తుంది.

బైక్ డీలర్‌షిప్‌లకు చేరుకున్న ఫోటోలు ఇంటర్నెట్‌లో వైరల్ అవుతున్నాయి. బైక్ మొత్తం డిజైన్‌లో పెద్దగా మార్పు లేకపోయినా, కొత్త పెయింట్ స్కీమ్, స్ట్రైప్స్ కారణంగా పల్సర్ 220F మరింత స్పోర్టీగా కనిపిస్తోంది. రిమ్ స్ట్రైప్స్, కొత్త గ్రాఫిక్స్, కార్బన్ ఫైబర్ థీమ్‌లో సైడ్ ప్యానెల్స్/ఫెయిరింగ్‌లు ఈ అప్‌డేట్‌లో ఉన్నాయి.

బైక్ ప్రాథమిక రంగు ఇప్పటికీ సిగ్నేచర్ బ్లాక్ (Signature Black)గానే ఉంది. సెమీ-ఫెయిర్డ్ ఫ్రంట్ ఎండ్, పెద్ద ఏరోడైనమిక్ వైజర్, ప్రొజెక్టర్ హాలోజెన్ హెడ్‌ల్యాంప్‌లు, స్ప్లిట్ సీట్లు, 17-అంగుళాల అల్లాయ్ వీల్స్ వంటి ఫీచర్లు పాత మోడల్ మాదిరిగానే కొనసాగుతున్నాయి.

పల్సర్ 220F తన శక్తివంతమైన, సుపరిచితమైన 220 cc, ఎయిర్-ఆయిల్ కూల్డ్ సింగిల్ సిలిండర్ ఇంజిన్‌తో సేవలను కొనసాగిస్తుంది. ఈ ఇంజిన్ 20.6 bhp శక్తిని, 18.55 Nm పీక్ టార్క్‌ను ఉత్పత్తి చేస్తుంది. ఇది 5-స్పీడ్ గేర్‌బాక్స్‌తో జత చేయబడి వస్తుంది. ఈ ఇంజిన్ నగరంలో ట్రాఫిక్‌లో, హైవేలపై లాంగ్ రైడ్‌లకు కూడా సరైన పనితీరును అందిస్తుంది.

సైకిల్ పార్ట్స్‌లో ముందువైపు టెలిస్కోపిక్ సస్పెన్షన్, వెనుకవైపు 5-స్టెప్ అడ్జస్టబుల్ ట్విన్ సస్పెన్షన్ ఉంటాయి. బ్రేకింగ్ కోసం డ్యూయల్ ఛానల్ ABSతో కూడిన 280 mm ముందు, 230 mm వెనుక డిస్క్ బ్రేక్‌లు ఉంటాయి. వెడల్పాటి ట్యూబ్‌లెస్ టైర్లపై ఈ మోటార్‌సైకిల్ నడుస్తుంది. ఈ అప్‌డేట్‌తో బజాజ్ పల్సర్ 220F.. బజాజ్ కవసాకి (Bajaj Kawasaki) నుంచి పల్సర్ శకం మొదలైనప్పటి నుంచి ఉన్న తన లెగసీని మరింత బలోపేతం చేసుకోనుంది.