చీపుగా సెకండ్ హ్యాండ్ కారా వద్దే వద్దు అంటున్న కొత్త కస్టమర్లు.. వాళ్ల డిమాండ్స్ ఏంటో తెలుసా ?

తక్కువ ధర, త్వరగా డెలివరీ అని ఒకప్పుడు సెకండ్ హ్యాండ్ కార్ల మార్కెట్ భారతదేశ ఆటో సెక్టార్‌లో ఒక సంచలనం సృష్టించింది. కానీ తాజా సర్వే ప్రకారం.. ఆ నమ్మకం ఇప్పుడు సన్నగిల్లుతోంది. పార్క్‌+ రీసెర్చ్ ల్యాబ్స్ నివేదిక ప్రకారం, కొత్త కారు కొనేవారిలో ప్రతి 10 మందిలో 8 మంది ఇప్పుడు సెకండ్ హ్యాండ్ కార్ల వైపు చూడడం లేదు. అసలు ఏం మారింది? వివరంగా తెలుసుకుందాం.

భారతదేశం అంతటా 9000 మందికి పైగా కొత్త కారు కొనుగోలుదారులతో మాట్లాడినప్పుడు కొన్ని ఆశ్చర్యకరమైన విషయాలు బయటపడ్డాయి. 77 శాతం మంది సెకండ్ హ్యాండ్ కారుకు బదులుగా కొత్త కారునే కొన్నారు. 81 శాతం మంది సెకండ్ హ్యాండ్ కార్ల ధరలు అనవసరంగా పెరిగాయని భావిస్తున్నారు. 65 శాతం మంది సెకండ్ హ్యాండ్ కారు కొనాలని ఆలోచించి, తర్వాత వెనక్కి తగ్గారు. దీనికి కారణం స్నేహితుల చెడు అనుభవాలు, ఆన్‌లైన్ నెగటివ్ రివ్యూలు.

73 శాతం మంది పెద్ద పెద్ద డిజిటల్ కార్ కంపెనీల కంటే లోకల్ డీలర్లను ఎక్కువగా నమ్మలేకపోతున్నామని భావించారు. ఆశ్చర్యంగా ఉన్నా, గణాంకాలు చెబుతున్నదేమిటంటే డిజిటల్ ప్లాట్‌ఫామ్‌లపై నమ్మకం తగ్గిపోయింది. పార్క్‌+ ప్రకారం 53 శాతం మంది లోకల్ డీలర్‌తో మానవ సంబంధం ఎక్కువగా ఉందని భావించారు. 31 శాతం మంది లోకల్ డీలర్‌తో బేరం ఆడవచ్చని అన్నారు. పెద్ద కంపెనీలు ఎక్కువ వాగ్దానాలు, తక్కువ డెలివరీ ఇస్తున్నాయని ఆరోపణలు వచ్చాయి.

సర్వేలో వచ్చిన సమాధానాలు ఈ రంగంలోని లోపాలను బయటపెట్టాయి. 43 శాతం మందికి చట్టపరమైన చిక్కుల గురించి ఆందోళన ఉంది. 22 శాతం మందికి ఆర్‌సీ ట్రాన్స్‌ఫర్లో ఆలస్యం జరిగింది. 11 శాతం మందిని ఆన్‌లైన్ రివ్యూలు భయపెట్టాయి.

డెలాయిట్ ప్రకారం, 90శాతం సెకండ్ హ్యాండ్ కార్ల డీల్స్ రూ.10 లక్షల లోపే జరుగుతాయి. అయినప్పటికీ, 81శాతం మందికి పాత కార్ల ధరలు కొత్త కార్లలాగే లేదా అంతకంటే ఎక్కువ ఉన్నాయని అనిపిస్తుంది. అంతేకాకుండా, ఇప్పుడు కొత్త కార్లపై లభించే ఫైనాన్స్ ఆప్షన్లు, మెరుగైన ఆఫ్టర్-సేల్స్ సర్వీస్ ప్రజలను కొత్త వాహనాలు కొనుగోలు చేసేలా ప్రోత్సహిస్తున్నాయి.

కస్టమర్ల నుండి నేరుగా వచ్చిన డిమాండ్లు ఏంటంటే.. మరింత పారదర్శకత ఉండాలి. ఆర్‌సీ ట్రాన్స్‌ఫర్ ప్రక్రియను సులభతరం, వేగవంతం చేయాలి. సెకండ్ హ్యాండ్ కార్ల ధరల విషయంలో రెగ్యులేషన్ తీసుకురావాలి.

పార్క్‌+ రీసెర్చ్ ల్యాబ్స్ ఈ సర్వే ఆటో సెక్టార్‌లో పెద్ద ఆలోచన అవసరమని సూచిస్తుందని తెలిపింది. సెకండ్ హ్యాండ్ మార్కెట్‌ను తిరిగి గాడిలో పెట్టాలంటే, కేవలం ఆకర్షణీయమైన ప్రకటనలు కాదు, ఎటువంటి ఇబ్బందులు లేని, రిలయబుల్ సిస్టమ్ నిర్మించాల్సి ఉంటుంది.

డ్రైవ్‌స్పార్క్ అభిప్రాయం: సెకండ్ హ్యాండ్ కార్ల మార్కెట్‌లో నమ్మకం తగ్గడం ఆందోళన కలిగించే విషయం. పారదర్శకత, సరైన ధరలు, సులభమైన డాక్యుమెంటేషన్ ప్రక్రియలు లేకపోతే కస్టమర్లు దూరం కావడం సహజం. ఈ సమస్యలను పరిష్కరిస్తేనే, సెకండ్ హ్యాండ్ మార్కెట్ మళ్లీ వృద్ధి చెందుతుంది. లేకపోతే కొత్త కార్ల వైపే అందరూ మొగ్గు చూపుతారు.