ఈవీలను నమ్మలేం.. భవిష్యత్ అంతా హైబ్రిడ్ వాహనాలదే.. వైరల్ అవుతున్న టయోటా చైర్మన్ వ్యాఖ్యలు

టయోటా అంటే ఏంటో చిన్న పిల్లలకు కూడా తెలుసు. ఇన్నోవా ఒక్కదానితోనే భారతదేశంలో టయోటా సంపాదించిన పేరును ఇప్పటి వరకు ఏ బ్రాండ్ కూడా అధిగమించలేకపోయింది. పోటీకి వచ్చినవారంతా మధ్యలోనే చేతులెత్తేశారు. ఇప్పుడు హైబ్రిడ్ టెక్నాలజీతో కార్లను తీసుకొచ్చిన తర్వాత టయోటాకు తిరుగు లేకుండా పోయింది. ఇప్పటి వరకు 27మిలియన్ల హైబ్రిడ్ కార్లను విక్రయించినట్లు టయోటా చెబుతోంది.

ఎలక్ట్రిక్ వాహనాలను నమ్మలేం.. భవిష్యత్ అంతా హైబ్రిడ్ వాహనాలదే అంటూ టయోటా చైర్మన్ అకియో టయోడా (Akio Toyoda) చేసిన వ్యాఖ్యలు ఇప్పుడు వైరల్‌గా మారాయి. ఈవీల కంటే హైబ్రిడ్ మోడళ్లు పర్యావరణానికి ఎక్కువ ఫ్రెండ్లీ అని ఆయన అంటున్నారు. ఈ వ్యాఖ్యలు ఎందుకు వైరల్ అయ్యాయి? హైబ్రిడ్ కార్లలో ఉన్న ప్రయోజనాలేంటి? వివరంగా తెలుసుకుందాం.

ఎలక్ట్రిక్ కార్లు తక్కువ కార్బన్ ఉద్గారాలను విడుదల చేస్తాయి. పర్యావరణానికి ఫ్రెండ్లీగా ఉంటాయి. అయితే, లిమిటెడ్ రేంజ్ ఉన్నవారు ఛార్జింగ్ స్టేషన్ల చుట్టూ తమ ట్రిప్‌లను జాగ్రత్తగా ప్లాన్ చేసుకోవాలి. పెట్రోల్ లేదా డీజిల్ కార్లతో పోలిస్తే ఛార్జ్ చేయడానికి, మెయింటెనెన్స్‎కు ఎక్కువ ఖర్చు కాదు. కానీ, పెట్రోల్ లేదా డీజిల్ నింపడానికి పట్టే సమయం కంటే ఎక్కువ ఛార్జింగ్‎కు టైం తీసుకోవడమే ప్రధాన సమస్య.

హైబ్రిడ్ కార్లలో సాధారణ పెట్రోల్ పంపులలో ఇంధనం నింపుకోవచ్చు. దేశంలోని మూలమూలనా పంపులు ఉన్నందున టెన్షన్ అక్కర్లేదు. స్ట్రాంగ్ లేదా ప్లగ్-ఇన్ హైబ్రిడ్ కార్లలో రీజనరేటివ్ బ్రేకింగ్ ద్వారా బ్యాటరీ ఛార్జ్ అవుతుంది. ఇది కాకుండా ఒక ఎక్స్‌టర్నల్ ఛార్జర్ సాయంతో కూడా ఛార్జ్ చేయవచ్చు.

భవిష్యత్తులో హైబ్రిడ్ వాహనాలు మరింత అనుకూలంగా ఉంటాయని టయోడా అంటున్నారు. ఎందుకంటే, సెల్ఫ్-ఛార్జింగ్ హైబ్రిడ్‌లు పర్యావరణానికి స్నేహపూర్వకమైన డ్రైవింగ్ సిస్టమ్ అని వాహనాలు నిరూపిస్తున్నాయి. ఈ రోజుల్లో టయోటా దాదాపు అన్ని టయోటా మోడల్ లైన్‌లలో హైబ్రిడ్ వేరియంట్‌ను అందిస్తోంది.

టయోటా అర్బన్ క్రూయిజర్ హైరైడర్, మారుతి గ్రాండ్ విటారా ప్రస్తుతం భారతదేశంలో లభించే అత్యంత తక్కువ ధర కలిగిన స్ట్రాంగ్ హైబ్రిడ్ కార్లు. అప్పుడప్పుడు లాంగ్ డ్రైవ్‌లు చేసే వ్యక్తి అయితే, ఒక హైబ్రిడ్ కారు సరైన ఆప్షన్ అవుతుంది. 500 కిలోమీటర్లకు పైగా రేంజ్ ఇచ్చే ఈవీలకు ప్రస్తుతం భారతదేశంలో ధర చాలా ఎక్కువ. బైక్ మైలేజ్ ఇచ్చే హైబ్రిడ్ కార్లను దానికంటే తక్కువ ధరకే కొనుగోలు చేయవచ్చు.

అవసరానికి తగ్గట్టుగా టయోటా ఇన్నోవా హైక్రాస్ ఉత్పత్తి సామర్థ్యాన్ని సర్దుబాటు చేస్తోంది. అధిక డిమాండ్ కారణంగా ఈ సంవత్సరం ప్రారంభంలో టాప్-స్పెక్ ZX, ZX(O) వేరియంట్‌ల బుకింగ్‌ను కంపెనీ తాత్కాలికంగా నిలిపివేసింది. అయితే, ఈ వేరియంట్‌ల బుకింగ్ ఆగస్టులో మళ్లీ ప్రారంభించనుంది. ఇన్నోవా హైక్రాస్ పెట్రోల్ హైబ్రిడ్ డిమాండ్ చాలా ఎక్కువగా ఉంది.

రెండవ వరుస బెంచ్ సీటుతో వచ్చే హైక్రాస్ హైబ్రిడ్ VX 8సీటర్ మోడల్‌కు 7సీటర్ మోడల్ కంటే ఎక్కువ డిమాండ్ ఉంది. అందుకే ఈ మోడళ్లకు కొన్ని డీలర్‌షిప్‌లు దాదాపు నాలుగు నెలల బుకింగ్ పీరియడ్‌ను కేటాయిస్తున్నాయి. హైక్రాస్ VX 7సీటర్ వెయిటింగ్ పీరియడ్ దాదాపు మూడు నెలలు. ZX(O) తో సహా టాప్ ఎండ్ ఇన్నోవా హైక్రాస్ ZXసిరీస్ డిమాండ్ బట్టి చాలా చోట్ల 6 నెలల్లోపు డెలివరీ చేయవచ్చు.

డ్రైవ్‌స్పార్క్ అభిప్రాయం: టయోటా చైర్మన్ అకియో టొయోడా వ్యాఖ్యలు ప్రస్తుత మార్కెట్ ట్రెండ్‌ను ప్రతిబింబిస్తున్నాయి. ఈవీలు భవిష్యత్తు అయినా, వాటికి ఇంకా చాలా సవాళ్లు ఉన్నాయి. హైబ్రిడ్ వాహనాలు ప్రస్తుతం మరింత పర్యావరణ అనుకూలమైన ప్రత్యామ్నాయంగా నిరూపించుకుంటున్నాయి. ఇంధన సామర్థ్యం, ఛార్జింగ్ సౌలభ్యం, తక్కువ మెయింటెనెన్స్ ఖర్చులతో హైబ్రిడ్ కార్లు వినియోగదారులకు బెస్ట్ ఆప్షన్ అవుతున్నాయి.