మారుతి ప్లాట్‌ఫామ్‌పై టయోటా కొత్త ఎలక్ట్రిక్ కారు..  అర్బన్ క్రూయిజర్ ఈవీ వచ్చేస్తోంది

జపాన్ వాహన తయారీ సంస్థలైన సుజుకి, టయోటా మధ్య జరుగుతున్న కార్ ఎక్స్చేంజ్ గురించి వాహన ప్రియులకు తెలుసు. భారత మార్కెట్‌లో సుజుకి, టయోటా ఒకే ప్లాట్‌ఫామ్‌పై తయారైన వాహనాలను వేర్వేరు పేర్లతో విక్రయిస్తున్నాయి. ఉదాహరణకు, మారుతి మోడల్స్ అయిన ఎర్టిగా, ఫ్రాంక్స్, బాలెనో లను టయోటా వరుసగా రూమియాన్, టైజర్, గ్లాంజా అనే పేర్లతో రీబ్యాడ్జ్ చేసి అమ్ముతోంది.

మరోవైపు, టయోటా సొంత మోడల్ అయిన ఇన్నోవా హైక్రాస్ ను మారుతి ఇన్విక్టో పేరుతో తమ షోరూమ్‌ల ద్వారా అమ్ముతోంది. రెండు కంపెనీలు కలిసి అభివృద్ధి చేసిన మిడ్‌సైజ్ ఎస్‌యూవీలు మారుతి గ్రాండ్ విటారా, టయోటా హైరైడర్ పేర్లతో అమ్ముడవుతున్నాయి.

ఇప్పుడు ఈ జాబితాలోకి ఒక కొత్త వాహనం రాబోతోంది. టయోటా అర్బన్ క్రూయిజర్ ఈవీ మోడల్ ఇప్పుడు 2025 గైకిండో ఇండోనేషియా ఇంటర్నేషనల్ ఆటో షో లో అడుగుపెట్టింది. మారుతి సుజుకి మొదటి ఎలక్ట్రిక్ వెహికల్(ఈవీ) అయిన ఇవిటారా లేదా ఈఎస్‌క్యూడో తర్వాత ఇది భారత మార్కెట్‌లోకి వస్తుందని నివేదికలు చెబుతున్నాయి. మారుతి ఈవీ ప్లాట్‌ఫామ్‌నే అర్బన్ క్రూయిజర్ ఈవీకి కూడా ఆధారంగా వాడతారు.

మారుతి మోడల్‌కు ఇప్పటివరకు ఇవిటారా అనే పేరు వస్తుందని అనుకున్నారు. కానీ, ఇటీవల ఈఎస్‌క్యూడో అనే బ్యాడ్జింగ్‌తో ఎలక్ట్రిక్ ఎస్‌యూవీ టెస్టింగ్ జరుగుతుండగా కెమెరా కంటికి చిక్కింది. కాబట్టి పేరు మారే అవకాశం ఉందని వార్తలు వస్తున్నాయి. అయితే, అధికారికంగా ఖరారు కాలేదు కాబట్టి ఈ మారుతి మోడల్‌ను ఇవిటారా అనే అనుకుంటున్నారు.

టయోటా అర్బన్ క్రూయిజర్ ఈవీకి 4,285 మి.మీ. పొడవు, 1,800 మి.మీ. వెడల్పు, 1,640 మి.మీ. ఎత్తు ఉన్నాయి. దీని వీల్‌బేస్ 2,700 మి.మీ. ఉంది. ఇవిటారాతో పోలిస్తే, టయోటా అర్బన్ క్రూయిజర్ ఈవీ ముందు భాగంలో కొన్ని డిజైన్ మార్పులు ఉన్నాయి. అర్బన్ క్రూయిజర్ ఈవీ మరింత లేటెస్ట్ లుక్‎లో కనిపిస్తుంది. హమ్మర్‌హెడ్ స్టైల్ గ్రిల్ ముందు భాగంలో దీనికి ప్రధాన ఆకర్షణ.

ఎల్‌ఈడీ హెడ్‌లైట్లు, ఎల్‌ఈడీ డేటైం రన్నింగ్ లైట్లు ఇవిటారా నుండి వేరుగా చేస్తాయి. అర్బన్ క్రూయిజర్ ఈవీలో పిక్సెల్-స్టైల్ టర్న్ ఇండికేటర్లు ఉన్నాయి. మరింత షార్ప్ హెడ్‌లైట్ డిజైన్ టయోటా మోడల్‌కు అట్రాక్టివ్ లుక్ ఇస్తుంది. అర్బన్ క్రూయిజర్ ఈవీకి ఒక ఎయిర్‌డ్యామ్, లేటెస్ట్ బోనెట్ డిజైన్ ఉన్నాయి. మారుతి ఇవిటారాకు సైడ్, బ్యాక్ డిజైన్లు టయోటా అర్బన్ క్రూయిజర్ ఈవీకి కూడా లభిస్తున్నాయి.

కారు రంగుతో సరిపోలే డోర్ హ్యాండిల్స్, మందపాటి బాడీ క్లాడింగ్, వీల్ ఆర్చెస్ చుట్టూ క్లాడింగ్, డోర్ మౌల్డింగ్‌లు, బ్లాక్ కలర్ పిల్లర్లు, టర్న్ సిగ్నల్స్‌తో కూడిన అద్దాలు, C-పిల్లర్‌పై అమర్చిన వెనుక డోర్ హ్యాండిల్స్ వంటివి మెయిన్ స్పెషాలిటీస్. ఇవిటారాలో లాగే ఛార్జింగ్ పోర్ట్ ఎడమ వైపు ముందు ఫెండర్ పైన ఉంది.

డిజైన్ ఒకేలా ఉన్నప్పటికీ, అర్బన్ క్రూయిజర్ ఈవీలోని ఏరో వీల్ కవర్లు మరింత ఆకర్షణీయమైన డ్యూయల్-టోన్ ఫినిషింగ్‌ను కలిగి ఉన్నాయి. వెనుక భాగంలో టెయిల్ లైట్లలో చిన్న మార్పులు చేశారు. షార్క్ ఫిన్ యాంటెన్నా, రూఫ్ పైన అమర్చిన స్పాయిలర్, వంగిన విండ్‌షీల్డ్, వెనుక వైపర్, స్ట్రాంగ్ బంపర్ డిజైన్ వెనుక భాగంలో ప్రధాన ఆకర్షణలు.

టయోటా అర్బన్ క్రూయిజర్ ఈవీ లోపలి భాగం ఎక్కువగా మారుతి సుజుకి ఇవిటారాను పోలి ఉంటుంది. డాష్‌బోర్డ్, డోర్ ట్రిమ్స్, అప్‌హోల్‌స్టరీలలో బ్రౌన్ కలర్ ఎక్కువగా వాడారు. 10.25 అంగుళాల మల్టీ-ఇన్ఫర్మేషన్ డిస్‌ప్లే, వైర్‌లెస్ కనెక్టివిటీతో కూడిన 10.1 అంగుళాల ఇన్ఫోటైన్‌మెంట్ సిస్టమ్ ప్రధాన ఫీచర్లు. దీనితో పాటు, షిఫ్ట్-బై-వైర్, వివిధ కలర్ లైటింగ్‌తో కూడిన లైటింగ్, ఫిక్స్‌డ్ గ్లాస్ రూఫ్, వైర్‌లెస్ ఛార్జర్ వంటివి కూడా ఉన్నాయి.

అర్బన్ క్రూయిజర్ ఈవీ మారుతి 49 కిలో వాట్స్, 61 కిలోవాట్స్ బ్యాటరీ ప్యాక్ ఆప్షన్‌లతో పాటు, FWD వేరియంట్‌లలో అందుబాటులో ఉంటుంది. 49కిలో వాట్స్ బ్యాటరీ ప్యాక్ 144 పీఎస్ పవర్, 189 ఎన్ఎమ్ పీక్ టార్క్‌ను అందిస్తుంది, కాగా 61 కిలో వాట్స్ బ్యాటరీ ప్యాక్ 174 పీఎస్ పవర్, 189 ఎన్ఎమ్ టార్క్‌ను ఇస్తుంది.

AWD వేరియంట్‌లో అదనంగా 65 పీఎస్ వెనుక-యాక్సిల్ మోటార్ ఉంటుంది. దీని మొత్తం అవుట్‌పుట్ 184 పీఎస్ పవర్, 300 ఎన్ఎమ్ టార్క్‌ను అందిస్తుంది. ఈ వాహనం రేంజ్ వివరాలను కంపెనీ ఇంకా అధికారికంగా ప్రకటించలేదు. అయితే, చిన్న 49 కిలో వాట్స్ బ్యాటరీ ప్యాక్ ఉన్న సింగిల్ మోటార్ FWD 300 కి.మీ. రేంజ్ ఇవ్వవచ్చని అంచనా.

61 కిలోవాట్స్ సింగిల్ మోటార్ FWD వేరియంట్‌లకు 400 కి.మీ., 61 కిలోవాట్స్ బ్యాటరీతో కూడిన డ్యూయల్-మోటార్ AWD వెర్షన్‌లకు 350 కి.మీ. రేంజ్ లభించవచ్చని భావిస్తున్నారు. ఈ ఈవీ 150 కిలోవాట్ల వరకు ఫాస్ట్ ఛార్జింగ్‌కు సపోర్ట్ చేస్తుంది. హ్యుందాయ్ క్రెటా ఎలక్ట్రిక్, టాటా కర్వ్ ఈవీ, ఎంజీ ZS ఈవీ లు దీనికి ప్రధాన పోటీదారులు.

డ్రైవ్‌స్పార్క్ అభిప్రాయం: సుజుకి-టయోటా భాగస్వామ్యం భారత మార్కెట్‌లో ఎలక్ట్రిక్ వాహనాల విభాగాన్ని మరింత విస్తరించడానికి సహాయపడుతుంది. అర్బన్ క్రూయిజర్ ఈవీ డిజైన్, ఫీచర్ల పరంగా ఆకర్షణీయంగా ఉంది. పోటీని తట్టుకుని ఇది ఎంతవరకు విజయవంతమవుతుందో వేచి చూడాలి.