గుడ్ న్యూస్.. మారుతి నుంచి టాటా వరకు భారీగా తగ్గనున్న కార్ల ధరలు.. ఏ మోడల్ ఎంత తగ్గుతుందంటే ?

భారతదేశంలో మళ్ళీ చిన్న కార్లకు గిరాకీ పెరిగే అవకాశం కనిపిస్తోంది. ఎందుకంటే, కేంద్ర ప్రభుత్వం తీసుకురాబోయే కొత్త జీఎస్టీ సంస్కరణల కారణంగా చిన్న కార్లు కొనడం చాలా చౌకగా మారనుంది. ప్రస్తుతం చిన్న కార్లపై ఉన్న అధిక పన్ను భారాన్ని తగ్గించాలని ప్రభుత్వం యోచిస్తున్నట్లు సమాచారం.

ఈ మార్పులు అమలులోకి వస్తే, గత కొన్ని సంవత్సరాలుగా ధరలు విపరీతంగా పెరిగిపోయిన ఎంట్రీ లెవల్ కార్లు మళ్ళీ సామాన్య ప్రజలకు అందుబాటులోకి వస్తాయి. ఇటీవల కాలంలో చిన్న కార్ల అమ్మకాలు గణనీయంగా తగ్గాయి. దీని ప్రభావం మారుతి సుజుకి, హ్యుందాయ్, టాటా మోటార్స్ వంటి కంపెనీలపై పడింది.

విశ్వసనీయ వర్గాల సమాచారం ప్రకారం.. కొత్త జీఎస్టీ విధానంలో చిన్న కార్లను 18% పన్ను శ్లాబ్‌లో చేర్చాలని ప్రతిపాదించారు. ప్రస్తుతం ఈ కార్లపై 28% జీఎస్టీ, 1% సెస్ విధించబడుతోంది. ఇది పన్ను భారాన్ని గణనీయంగా తగ్గిస్తుంది. ఇక్కడ చిన్న కార్లు అంటే 4 మీటర్ల వరకు పొడవు, 1200సీసీ కంటే తక్కువ ఇంజిన్ సామర్థ్యం ఉన్న కార్లు.

అయితే, పెద్ద కార్లు, ఎస్‌యూవీలపైన 40% ప్రత్యేక పన్ను విధించబడుతుంది. ప్రస్తుతం వాటిపై 43-50% పన్ను (జీఎస్టీ + సెస్) ఉంది. ఎలక్ట్రిక్ వాహనాలపై మాత్రం ఎలాంటి మార్పు ఉండదు, వాటిపై యథావిధిగా 5% జీఎస్టీ కొనసాగుతుంది.

ప్రధాని నరేంద్ర మోడీ తన స్వాతంత్ర్య దినోత్సవ ప్రసంగంలో ఈ సంస్కరణల గురించి ప్రస్తావించారు. "మేము తదుపరి తరం జీఎస్టీ సంస్కరణలను తీసుకువస్తున్నాం, దీనివల్ల దేశవ్యాప్తంగా పన్ను భారం తగ్గుతుంది. ఇది దీపావళికి ముందు దేశ ప్రజలకు ఒక బహుమతి అవుతుంది" అని ఆయన అన్నారు.

కొత్త ప్రతిపాదన ప్రకారం, రెండు పన్ను శ్లాబ్‌లు మాత్రమే ఉంటాయి. 5%, 18%. అలాగే, 12%, 28% శ్లాబ్‌లు తొలగిస్తారు. కొన్ని వస్తువులపై 40% ప్రత్యేక పన్ను రేటు విధించాలని సూచించారు. నిత్యావసర వస్తువులపై 5% జీఎస్టీ ఉంటుంది. మధ్యతరగతి వినియోగ వస్తువులు, పారిశ్రామిక ఉత్పత్తులపై 18% పన్ను ఉంటుంది. పెద్ద టీవీలు, డిష్‌వాషర్ల వంటి వైట్ గూడ్స్ కూడా 28% నుండి 18% శ్లాబ్‌లోకి మారే అవకాశం ఉంది.

మార్కెట్ నిపుణుల అంచనా ప్రకారం.. జీఎస్టీలో 11% తగ్గింపు వస్తే, చిన్న కార్ల ఎక్స్-షోరూమ్ ధరలు సుమారు 12-12.5% వరకు తగ్గుతాయి. దీనివల్ల ప్రతి కారుపై రూ.20,000-రూ.25,000 వరకు ప్రత్యక్షంగా ఆదా అవుతుంది. ఈ ధరల తగ్గింపు చిన్న, మొదటిసారి కారు కొనుగోలు చేసేవారికి ఒక పెద్ద ఊరట.

ఈ ప్రయోజనం కేవలం హ్యాచ్‌బ్యాక్‌లకే కాకుండా, హ్యుందాయ్ ఎక్స్‌టర్, టాటా పంచ్ వంటి చిన్న ఎస్‌యూవీలకు కూడా లభించే అవకాశం ఉంది. ఢిల్లీ-ఎన్‌సీఆర్ ప్రాంతంలోని ఒక పెద్ద ఆటోమొబైల్ డీలర్ ప్రకారం, ప్రస్తుతం చిన్న కార్లపై మొత్తం పన్ను (జీఎస్టీ + రిజిస్ట్రేషన్ + ఇన్సూరెన్స్) 41-42% వరకు ఉంది.

గత ఆర్థిక సంవత్సరం 2025లో కాంపాక్ట్ కార్లు, హ్యాచ్‌బ్యాక్‌ల అమ్మకాలు 13% తగ్గి సుమారు 10 లక్షల యూనిట్లకు పడిపోయాయి. మరోవైపు, ఎస్‌యూవీల అమ్మకాలు 10.2% పెరిగి 23.5 లక్షల యూనిట్లకు చేరాయి. మొత్తం ప్యాసింజర్ వాహనాల మార్కెట్‌లో చిన్న కార్ల వాటా వరుసగా ఐదో సంవత్సరమూ తగ్గి 23.4%కి చేరుకుంది.

ప్రస్తుత ఆర్థిక సంవత్సరం మొదటి నాలుగు నెలల్లో ఇది మరింత తగ్గి 21%కి పడిపోయింది. గత 5-6 సంవత్సరాలలో భద్రతా ప్రమాణాలు, ఉద్గార నియమాల కారణంగా చిన్న కార్ల ధరలు 30-40% వరకు పెరిగాయి. మారుతి సుజుకి మార్కెటింగ్, సేల్స్ హెడ్ పార్థో బెనర్జీ మాట్లాడుతూ ఎంట్రీ-లెవల్ కస్టమర్‌లు అధిక ధరల వల్ల కారు కొనలేకపోతున్నారని చెప్పారు.

గత కొన్ని కాలంగా తక్కువ ధరల కార్లు విక్రయించే మారుతి సుజుకి, టాటా మోటార్స్, హ్యుందాయ్ వంటి కంపెనీల అమ్మకాలు తగ్గుతున్నాయి. గత నెల జూలైలో మారుతి వార్షిక వృద్ధి కేవలం 0.2% మాత్రమే ఉంది. హ్యుందాయ్ అమ్మకాలు 10.3%, టాటా అమ్మకాలు 11.6% తగ్గాయి. ఈ మూడు కంపెనీలు 1200సీసీ ఇంజిన్ సామర్థ్యం వరకు ఉన్న అనేక కార్లను విక్రయిస్తాయి.

ఎస్‌యూవీలకు పెరుగుతున్న డిమాండ్ మహీంద్రా వంటి కంపెనీలకు ప్రయోజనం చేకూర్చింది. ఒకవేళ చిన్న కార్ల ధరలు తగ్గితే, హ్యాచ్‌బ్యాక్ కార్ల అమ్మకాలు మళ్ళీ పెరుగుతాయి.

మారుతి పోర్ట్‌ఫోలియోలో 1200సీసీ కంటే తక్కువ ఇంజిన్ ఉన్న కార్లలో స్విఫ్ట్, ఫ్రాంక్స్, డిజైర్, బాలెనో, వ్యాగన్ ఆర్, ఇగ్నిస్, ఆల్టో కే10, ఈకో, సెలెరియో వంటి మోడల్స్ ఉన్నాయి. హ్యుందాయ్ ఐ20, ఐ10, ఎక్స్‌టర్, ఆరా వంటి మోడల్స్‌ను విక్రయిస్తుంది. టాటా పంచ్, టియాగో వంటి మోడల్స్‌ను విక్రయిస్తుంది.