ఈ కారులో రక్షణే లేదు! 0-స్టార్ సేఫ్టీ రేటింగ్.. క్రాష్ టెస్ట్‌లో అసలు నిజం బయటపడింది

లాటిన్ అమెరికన్ ఆటోమొబైల్ మార్కెట్‌లో ఇటీవల సిట్రోయెన్ (Citroen) బ్రాండ్ తీవ్ర చర్చనీయాంశంగా మారింది. కారణం బ్రెజిల్‌లో ఉత్పత్తి చేయబడిన సిట్రోయెన్ బసాల్ట్ (Citroen Basalt) మోడల్‌కి లాటిన్ NCAP (Latin New Car Assessment Programme) నుండి సున్నా (0) స్టార్ సేఫ్టీ రేటింగ్ రావడం. ఈ రేటింగ్ ప్రకటనతో ఆటోమొబైల్ రంగం మొత్తంలోనే కాకుండా, వినియోగదారుల్లో కూడా ఆశ్చర్యం, ఆందోళన నెలకొంది. సిట్రోయెన్ బసాల్ట్‌కి లాటిన్ NCAP నిర్వహించిన క్రాష్ టెస్టుల్లో, ప్రమాదం సంభవించిన సందర్భంలో ప్రయాణికులకు తగిన భద్రత లభించడం లేదని తేలింది. డ్రైవర్, ముందు సీటులో కూర్చున్న ప్రయాణికుల తల, ఛాతీ, కాళ్ల భాగాలకు ప్రమాద సమయంలో తీవ్రమైన గాయాలు వచ్చే అవకాశం ఉన్నట్టు పరీక్షల్లో నిర్ధారించారు.

సిట్రోయెన్‌కి ఇది తక్కువ స్థాయి రేటింగ్ మాత్రమే కాదు, పెద్ద దెబ్బ అని చెప్పాలి. ఎందుకంటే ఇదే పరిస్థితి గతంలో సిట్రోయెన్ C3 ఎయిర్‌క్రాస్ మోడల్‌తో కూడా జరిగింది. ఆ కారు కూడా 2024లో లాటిన్ NCAP టెస్టుల్లో 0 స్టార్ సేఫ్టీ రేటింగ్ పొందింది. రెండు మోడళ్లకు ఈ రీతిగా దారుణ ఫలితాలు రావడం, లాటిన్ అమెరికన్ మార్కెట్‌లో సిట్రోయెన్ భద్రతాపరమైన నాణ్యతను వినియోగదారులు తిరిగి ఆలోచించేలా చేసింది.

లాటిన్ అమెరికా మార్కెట్‌లోని కస్టమర్లు ఇప్పటివరకు సిట్రోయెన్ కార్లను స్టైలిష్ డిజైన్, తక్కువ ధర, ఇంధన సామర్థ్యం వంటి అంశాలకే ఎక్కువగా ప్రాధాన్యం ఇచ్చారు. అయితే ఇప్పుడు భద్రత అంశం ప్రధానంగా చర్చనీయాంశమవుతోంది. ప్రపంచవ్యాప్తంగా ఆటోమొబైల్ తయారీదారులు తమ మోడళ్లను అధిక సేఫ్టీ ప్రమాణాలతో రూపొందిస్తుంటే, సిట్రోయెన్ వంటి పేరుగాంచిన బ్రాండ్ నుండి ఇలాంటి ఫలితాలు రావడం ఆందోళన కలిగిస్తోంది.

ఇక్కడ గమనించాల్సిన అత్యంత ముఖ్యమైన అంశం ఏమిటంటే, సిట్రోయెన్‌కు చెందిన స్టెల్లాంటిస్ గ్రూప్ భారతీయ, యూరోపియన్ మార్కెట్లలో మాత్రం భద్రతాపరంగా అత్యంత బలమైన కార్లను అందిస్తోంది. అదే కంపెనీ లాటిన్ అమెరికన్ మార్కెట్‌లో మాత్రం భిన్నమైన ప్రమాణాలను అనుసరిస్తోందనేది ఇప్పుడు బహిర్గతమవుతోంది. ఈ 0-స్టార్ రేటింగ్ ఫలితంతో, సిట్రోయెన్ భద్రతా ప్రమాణాలను పరిశీలించాల్సిన సమయం ఆసన్నమైనదని చెప్పవచ్చు.

ఉదాహరణకు, భారతదేశంలో అందుబాటులో ఉన్న సిట్రోయెన్ బసాల్ట్ మోడల్‌కి కంపెనీ ఆరు ఎయిర్‌బ్యాగ్‌లు, ఎలక్ట్రానిక్ స్టెబిలిటీ కంట్రోల్, రియర్ పార్కింగ్ సెన్సార్స్, సీట్‌బెల్ట్ రిమైండర్ వంటి అధునాతన సేఫ్టీ ఫీచర్లను అందించింది. అందుకే భారత్ NCAP నిర్వహించిన క్రాష్ టెస్టుల్లో ఈ కారుకు 4-స్టార్ సేఫ్టీ రేటింగ్ లభించింది, ఇది భారతీయ మార్కెట్‌లో వినియోగదారులకు విశ్వాసాన్ని కలిగించే అంశం.

సిట్రోయెన్ బసాల్ట్ లాటిన్ NCAP సేఫ్టీ రేటింగ్‌లో పెద్దల రక్షణలో కేవలం 39.37%, పిల్లల రక్షణలో 58.35%, పాదచారుల రక్షణలో 53.38%, భద్రతా సహాయ వ్యవస్థలో 34.88% మాత్రమే స్కోర్ చేసింది. ఈ స్కోర్లు కలిపి మొత్తం ఫలితాన్ని సున్నా(0) స్టార్ రేటింగ్‌గా మార్చేశాయి. అంటే ప్రమాదం సంభవించినప్పుడు ప్రయాణికులు, ముఖ్యంగా డ్రైవర్, ముందు సీటులో కూర్చున్న వారు తీవ్రమైన గాయాలపాలయ్యే అవకాశం ఉందని లాటిన్ NCAP స్పష్టంగా పేర్కొంది.

సిట్రోయెన్ బసాల్ట్ సేఫ్టీ రేటింగ్ తక్కువగా రావడానికి ప్రధాన కారణాల్లో ఒకటి దాని భద్రతా ఫీచర్లలో ఉన్న లోపాలు. సైడ్ హెడ్(కర్టెన్) ఎయిర్‌బ్యాగ్‌లు వంటి కీలకమైన భద్రతా ప్రమాణాలు లేవు. ఇందులో అటానమస్ ఎమర్జెన్సీ బ్రేకింగ్ లేదా లేన్ కీప్ అసిస్ట్ వంటి అధునాతన డ్రైవర్ సహాయ వ్యవస్థలు (ADAS) కూడా లేవు. అందుకే ఇది లాటిన్ NCAP(Latin New Car Assessment Programme)లో 0 స్టారే రేటింగ్ పొందింది.