రూ.2.70 లక్షల ధర తగ్గిన కారును 2 నెలలుగా ఎవరూ కొనలేదు! కారణం ఏంటో తెలుసా?

భారత ఆటోమొబైల్ రంగంలో కొత్త బ్రాండ్లు అడుగుపెడుతున్నా, పాత బ్రాండ్లు పోటీని తట్టుకుని నిలబడుతున్నా, ప్రతి కంపెనీకి మార్కెట్‌లో నిలదొక్కుకోవడం సవాల్‌గానే ఉంటుంది. ఆ క్రమంలో ఫ్రాన్స్‌కు చెందిన ప్రముఖ వాహన తయారీదారు సిట్రోయెన్ (Citroën) కూడా కొన్ని సంవత్సరాలుగా భారత మార్కెట్‌లో తన వాహనాలను అందిస్తోంది. స్టైలిష్ డిజైన్, యూరోపియన్ ఫీల్, ప్రీమియం లుక్ అనే ట్యాగ్‌లైన్‌తో ఈ కంపెనీకి అభిమానులు ఏర్పడ్డారు. అయితే, ఆగస్టు నెల ముగిసిన వెంటనే వెలుగులోకి వచ్చిన తాజా సేల్స్ రిపోర్ట్ మాత్రం అందరినీ ఒక్కసారిగా ఆశ్చర్యపరిచేలా చేసింది. సిట్రోయెన్ తన అత్యంత ప్రాచుర్యం పొందిన ప్రీమియం SUV C5 ఎయిర్‌క్రాస్‌ (C5 aircross)కు సంబంధించిన సేల్స్ వివరాలను ప్రకటించింది.

ఈ కారు సాధారణంగా కంపెనీకి ఇమేజ్ బిల్డర్‌గా, ప్రీమియం మార్కెట్‌లో తమ ఉనికిని చూపించే మోడల్‌గా గుర్తించబడింది. కానీ షాకింగ్ అంశమేమిటంటే, గత రెండు నెలలుగా ఒకరైనా ఈ కారు కొనుగోలు చేయలేదని సిట్రోయెన్ అధికారిక గణాంకాలు చెబుతున్నాయి. 60 రోజుల్లో ఈ ప్రీమియం SUV ఒక్క యూనిట్ కూడా అమ్ముడవలేదన్నమాట. ఇది కేవలం ఆటోమొబైల్ రంగానికి మాత్రమే కాకుండా వినియోగదారులకూ ఆశ్చర్యం కలిగించే విషయం.

ఇంత స్టైలిష్‌గా కనిపించే, అంతర్జాతీయ మార్కెట్లలో మంచి పేరున్న SUV భారత మార్కెట్‌లో ఇలా అమ్మకాలేమీ నమోదు కాకపోవడం నిజంగా షాక్ కలిగించే విషయం. కంపెనీ కూడా ఈ ఫలితంపై విస్మయానికి గురైందని సమాచారం. దీనికి కారణాలు అనేకం ఉన్నాయనడంలో సందేహం లేదు. అధిక ధర, పెరుగుతున్న పోటీ, మారుతున్న వినియోగదారుల అభిరుచులు, మార్కెటింగ్ లోపాలు, ఇవన్నీ కలిసొచ్చి C5 ఎయిర్‌క్రాస్ భవిష్యత్తును కష్టాల్లోకి నెట్టాయి.

ఇదిలా ఉంటే, భారత ఆటోమొబైల్ రంగంలో ఇటీవల అమల్లోకి వచ్చిన GST పన్ను తగ్గింపు వాహన ధరలపై గణనీయమైన ప్రభావం చూపుతోంది. ఇప్పటికే అనేక వాహన తయారీదారులు తమ కొత్త ధరల జాబితాను విడుదల చేశారు. ఈ క్రమంలో ఫ్రాన్స్‌కు చెందిన ఆటోమొబైల్ కంపెనీ సిట్రోయెన్ కూడా భారత మార్కెట్‌లో తన మోడళ్లకు కొత్త ధరలను ప్రకటించింది. ప్రత్యేకంగా, కంపెనీ తన సి5 ఎయిర్‌క్రాస్ ధరను తగ్గించింది.

ఇప్పటివరకు ఈ మోడల్‌ను రూ.39.99 లక్షల(ఎక్స్-షోరూమ్) ధరకు విక్రయిస్తుండగా, GST తగ్గింపు అనంతరం ఇప్పుడు దీన్ని రూ.37.32 లక్షల ధరకు అందించనున్నారు. అంటే గత ధరతో పోలిస్తే దాదాపు రూ.2.70 లక్షల మేర ఆదా అవుతుంది. శాతం వారీగా చూస్తే, ఈ తగ్గింపు 6.68 శాతం కు సమానం. ప్రీమియం సెగ్మెంట్‌లో ఉన్న ఈ SUVకి ఇంత పెద్ద ధర తగ్గింపు రావడం వినియోగదారుల దృష్టిని ఆకర్షించే అవకాశముంది.

ఇప్పటివరకు అమ్మకాలలో పెద్దగా రాణించని ఈ మోడల్, కొత్త ధరలతో కొంతవరకు మార్కెట్లో పోటీ పడే అవకాశం ఉందని నిపుణులు అంచనా వేస్తున్నారు. మొత్తం మీద, సిట్రోయెన్ C5 ఎయిర్‌క్రాస్ ధర తగ్గింపు భారత మార్కెట్‌లో కంపెనీకి మళ్లీ ఊపిరి పోసే ప్రయత్నంగా కనిపిస్తోంది. ఇంజిన్ విషయానికొస్తే, ఇది ప్రీమియం సెగ్మెంట్ SUVలకు సరిపోయేలా బలమైన పనితీరును అందిస్తుంది.

ఇందులో 2.0 లీటర్, 4-సిలిండర్ DW10FC డీజిల్ ఇంజిన్ ఉంది. ఈ ఇంజిన్ గరిష్టంగా 177 PS పవర్ను, అలాగే 400 Nm టార్క్ను ఉత్పత్తి చేస్తుంది. అంటే హైవే డ్రైవింగ్ అయినా, సిటీ ట్రాఫిక్ అయినా డ్రైవర్‌కు తగినంత శక్తి ఎప్పుడూ లభిస్తుందని చెప్పొచ్చు. ఇక గేర్‌బాక్స్ విషయానికి వస్తే, సిట్రోయెన్ ఇందులో 8-స్పీడ్ టార్క్ కన్వర్టర్ ఆటోమేటిక్ ట్రాన్స్‌మిషన్ను అందించింది. లీటరుకు 17.5 కి.మీ మైలేజీని అందిస్తుంది.