ఏసీ సెట్టింగ్స్‌తో పని లేకుండా, ఆటోమేటిక్ క్లైమేట్ కంట్రోల్ ఫీచర్‌తో వస్తున్న కార్లు ఇవే

కొత్త కారు కొనడానికి వెళ్లేవారు ఇప్పుడు ఫీచర్లు, సేఫ్టీకి ఎక్కువ ప్రాధాన్యత ఇస్తున్నారు. ఒకప్పుడు ఏసీ లేకుండా కూడా కార్లు వచ్చేవారు. కానీ ఇప్పుడు ప్రతి కారులో ఏసీ ఒక ప్రామాణిక ఫీచర్ అయిపోయింది. ఎందుకంటే, ఏసీ మన దైనందిన జీవితంలో ఒక భాగం అయిపోయింది. అవసరానికి అనుగుణంగా కారు లోపలి భాగాన్ని చల్లబరచడానికి లేదా వేడి చేయడానికి ఎయిర్ కండిషనర్లు ఉపయోగపడతాయి.

అయితే, కార్లలోని ఏసీలలో ఆటోమేటిక్ క్లైమేట్ కంట్రోల్ అనే ఒక కొత్త సిస్టమ్ వచ్చింది. దీని వల్ల మీరు ఏసీ సెట్టింగ్స్ గురించి తరచూ ఆలోచించాల్సిన అవసరం ఉండదు. నేటి ఆధునిక కార్లలో క్లైమేట్ కంట్రోల్ అనేది ఒక ముఖ్యమైన ఫీచర్. ఇది కారు లోపల ఉష్ణోగ్రతను ఆటోమేటిక్‎గా కంట్రోల్ చేస్తుంది. మొదట్లో కార్లలో మాన్యువల్ కంట్రోల్స్ ఉండేవి, కానీ ఇప్పుడు ఇది ఆటోమేటిక్‌గా మారింది. అయితే, ఈ ఫీచర్ చాలా కార్లలో టాప్ వేరియంట్లలో మాత్రమే అందుబాటులో ఉంటుంది.

కారు బయట ఉన్న ఉష్ణోగ్రతను సెన్సార్లు గుర్తించి, క్లైమేట్ కంట్రోల్ సాఫ్ట్‌వేర్ క్యాబిన్‌లోని ఉష్ణోగ్రతను ఆటోమేటిక్‌గా సర్దుబాటు చేస్తుంది. బయటి వాతావరణం, తేమను బట్టి ఆన్-బోర్డ్ సెన్సార్లు క్యాబిన్‌లోకి వచ్చే వేడి, చల్లని గాలిని కంట్రోల్ చేస్తాయి. ఆటోమేటిక్ క్లైమేట్ కంట్రోల్, డ్యూయల్-జోన్ క్లైమేట్ కంట్రోల్ అని రెండు రకాలుగా ఈ ఆటోమేటిక్ ఏసీ కంట్రోల్ వ్యవస్థలు అందుబాటులో ఉన్నాయి.

డ్యూయల్-జోన్ క్లైమేట్ కంట్రోల్ సాధారణంగా కొంచెం ఖరీదైన కార్లలో లభిస్తుంది. డ్యూయల్-జోన్ సిస్టమ్ ఉన్న కారులో డ్రైవర్‌కు ఒక ఉష్ణోగ్రతను, పక్కన కూర్చున్న వ్యక్తికి మరొక ఉష్ణోగ్రతను సెట్ చేసుకునే అవకాశం ఉంటుంది. రూ.10 లక్షల లోపు ధరలో డ్యూయల్-జోన్ ఆటోమేటిక్ క్లైమేట్ కంట్రోల్ ఉన్న కార్లు ఇప్పుడు మార్కెట్‌లో ఉన్నాయి. అవి ఏంటో ఇప్పుడు తెలుసుకుందాం.

1. మహీంద్రా XUV 3XO : మహీంద్రా పాపులర్ ఎస్‌యూవీ అయిన XUV300 ఫేస్‌లిఫ్ట్ వెర్షన్ మహీంద్రా XUV 3XO. టాటా మోటార్స్‌లో పనిచేసిన ప్రముఖ కార్ డిజైనర్ ప్రతాప్ బోస్ మహీంద్రాకు మారిన తర్వాత డిజైన్ చేసిన మొదటి మోడల్ ఇది. ఇందులో ఆటోమేటిక్ క్లైమేట్ కంట్రోల్ ఫీచర్ ఉంది. ఈ కారు ఎక్స్-షోరూమ్ ధర రూ.7.99 లక్షల నుండి ప్రారంభమవుతుంది. డిజైన్‌ పరంగా, ఫీచర్ల పరంగా ఇది అద్భుతమైన కారుగా నిలిచింది.

2. హ్యుందాయ్ వెన్యూ : దక్షిణ కొరియా ఆటోమొబైల్ దిగ్గజం హ్యుందాయ్ కాంపాక్ట్ ఎస్‌యూవీ అయిన వెన్యూలో డ్యూయల్-జోన్ క్లైమేట్ కంట్రోల్ ఫీచర్ ఉంది. ఈ మోడల్ ధర రూ.7.94 లక్షల నుండి ప్రారంభమవుతుంది. ప్రస్తుతం, హ్యుందాయ్ వెన్యూ రెండవ తరం మోడల్ పనులు జరుగుతున్నాయి. రాబోయే మోడల్‌లో కూడా ఇలాంటి ఫీచర్లు ఉంటాయని అంచనా వేస్తున్నారు. వెన్యూ తన స్టైలిష్ డిజైన్, విశాలమైన క్యాబిన్‌తో కస్టమర్లను ఆకట్టుకుంటోంది.

3. హ్యుందాయ్ ఎక్స్‌టర్ : టాటా పంచ్‌కు గట్టి పోటీ ఇవ్వడానికి హ్యుందాయ్ మైక్రో ఎస్‌యూవీ సెగ్మెంట్‌లో విడుదల చేసిన మోడల్ ఎక్స్‌టర్. దీని మిడ్-వేరియంట్ SX నుండి ఆటోమేటిక్ క్లైమేట్ కంట్రోల్ ఫీచర్ అందుబాటులో ఉంది. ఎక్స్‌టర్ SX మోడల్ ఎక్స్-షోరూమ్ ధర రూ.9.70 లక్షలు. ఇది మంచి సిటీ కారు మాత్రమే కాదు, మంచి మైలేజీని కూడా ఇస్తుంది. దీని మంచి బాడీ, అడ్వాన్సుడ్ ఫీచర్లు దీనిని ఒక బెస్ట్ ఆప్షన్‎గా నిలిపాయి.
ఈ జాబితాలో టాటా పంచ్, రెనాల్ట్ కైగర్ వంటి మోడళ్లను కూడా చేర్చవచ్చు. కానీ పైన చెప్పిన కార్లు సైజు పరంగా, ఫీచర్ల పరంగా చాలా ఉత్తమమైనవి. కుటుంబ అవసరాలకు ఇవి చాలా మంచివి. విశాలమైన స్పేస్, అద్భుతమైన ఆటోమేటిక్ ఏసీ సిస్టమ్ ఉన్న కార్లు కావాలనుకునే వారికి XUV 3XO, వెన్యూ, ఎక్స్‌టర్ మంచి ఎంపికలు.