పెట్రోల్ సెంచరీ కొట్టేసిందిగా.. జేబు గుల్ల కాకుండా తిరగాలంటే ఈ కారే బెస్ట్ అంటోన్న జనం

దేశంలో పెట్రోల్ ధరలు ఆకాశాన్నంటుతున్నాయి. దీంతో కంప్రెస్డ్ నేచురల్ గ్యాస్ (సిఎన్‌జీ) వాహనాలకు డిమాండ్ బాగా పెరిగింది. భారతదేశపు అతిపెద్ద వాహన తయారీదారు అయిన మారుతి సుజుకి డీజిల్ ఇంజిన్ల ఉత్పత్తిని నిలిపివేయడంతో ఏర్పడిన ఖాళీని సిఎన్‌జీ వాహనాలతో భర్తీ చేస్తోంది.

ఇతర ప్రముఖ కంపెనీలైన హ్యుండాయ్, టాటా కూడా సిఎన్‌జీ కార్లను విడుదల చేస్తున్నప్పటికీ, మారుతి అందిస్తున్నన్ని మోడల్స్ మిగతా కంపెనీల వద్ద లేవు. దీని కారణంగానే దేశంలో అత్యధిక సిఎన్‌జీ కార్లను విక్రయిస్తున్న కంపెనీగా మారుతి నిలిచింది. కంపెనీ పోర్ట్‌ఫోలియోలో మొత్తం 17 మోడల్స్ ఉండగా, వాటిలో డజనుకు పైగా కార్లు ఫ్యాక్టరీ ఫిట్టెడ్ సిఎన్‌జీ కిట్‌తో వస్తున్నాయి.

పర్యావరణ అనుకూలమైన ప్రత్యామ్నాయం కావడంతో పాటు..సిఎన్‌జీ కార్ల మైలేజ్ ప్రజలను విశేషంగా ఆకర్షిస్తోంది. పవర్ అవుట్‌పుట్ కొంచెం తక్కువగా ఉన్నా పర్వాలేదు కానీ మైలేజ్ మాత్రం బాగా ఉండాలని భారతీయులు కోరుకుంటున్నారు. 2025 ఆర్థిక సంవత్సరం ముగిసే సమయానికి సిఎన్‌జీ కార్లు భారీగా అమ్ముడయ్యాయి.

2025 ఆర్థిక సంవత్సరంలో మారుతి సుజుకి దేశీయ మార్కెట్లో మొత్తం 1,795,259 ప్యాసింజర్ వాహనాలను విక్రయించింది. ఇందులో దాదాపు 6.20 లక్షల యూనిట్లు సిఎన్‌జీ కార్లు కావడం విశేషం. దీనిని బట్టి చూస్తే, మారుతి గత ఆర్థిక సంవత్సరంలో విక్రయించిన ప్రతి మూడు కార్లలో ఒకటి సిఎన్‌జీ వాహనమే. అంతకు ముందు సంవత్సరంతో పోలిస్తే మారుతి సుజుకి సిఎన్‌జీ వాహనాల అమ్మకాల్లో 28శాతం వృద్ధిని సాధించింది.

కంపెనీ తమ సిఎన్‌జీ పోర్ట్‌ఫోలియోను 13 వాహనాలకు పెంచడం కలిసొచ్చింది. జిమ్నీ, ఇగ్నిస్, ఇన్విక్టో మినహా దాదాపు అన్ని మారుతి సుజుకి కార్లు ఫ్యాక్టరీ ఫిట్టెడ్ సిఎన్‌జీ కిట్‌తో లభిస్తున్నాయి. ఇంత పెద్ద మోడల్ శ్రేణి, వాటిలో చాలా వాటికి ఉన్న బలమైన డిమాండ్ మారుతిని సిఎన్‌జీ విభాగంలో ఆధిపత్యం చెలాయించేలా చేసింది.

2024 చివరి నాటికి సిఎన్‌జీ విభాగంలో మారుతి సుజుకి మార్కెట్ వాటా 71.60శాతంగా ఉంది. 16.13శాతం మార్కెట్ వాటాతో టాటా మోటార్స్ మారుతి తర్వాత రెండో స్థానంలో ఉంది. హ్యుండాయ్ 10.04శాతం మార్కెట్ వాటాతో మూడో స్థానంలో నిలిచింది. మారుతితో ఉన్న భాగస్వామ్యం సిఎన్‌జీ విభాగంలో టయోటాకు కూడా లాభదాయకంగా ఉంది. 2.21శాతం మార్కెట్ వాటాతో టయోటా కూడా సిఎన్‌జీ విభాగంలో తన ఉనికిని చాటుతోంది.

మారుతి సిఎన్‌జీ కార్ల మైలేజ్ చాలా అద్భుతంగా ఉంది. సెలెరియో సిఎన్‌జీ వేరియంట్ కిలోగ్రాముకు 34.43 కిలోమీటర్ల మైలేజీని అందిస్తుంది. అందుకే బడ్జెట్ గురించి ఆలోచించే, మంచి మైలేజ్ కోరుకునే వారు మారుతి సిఎన్‌జీ కార్లను కొంటున్నారు. టాటా మోటార్స్ తమ సిఎన్‌జీ కార్ల అమ్మకాల గణాంకాలను వెల్లడించనప్పటికీ, 2024 ఆర్థిక సంవత్సరంతో పోలిస్తే సిఎన్‌జీ వాహనాల అమ్మకాల్లో 35శాతం వృద్ధిని నమోదు చేసినట్లు కంపెనీ తెలిపింది.

సిఎన్‌జీ మార్కెట్‌లోని విజయంతో పాటు, 2025 ఆర్థిక సంవత్సరంలో మారుతి సుజుకి 20,672 యూనిట్ల స్ట్రాంగ్ హైబ్రిడ్ వాహనాలను కూడా విక్రయించింది. ఇది 2025 ఆర్థిక సంవత్సరపు మొత్తం అమ్మకాల్లో 2.4శాతం. 2024 ఆర్థిక సంవత్సరంతో పోలిస్తే ఇది 27శాతం వార్షిక పెరుగుదల. గ్రాండ్ విటారా, ఇన్విక్టో స్ట్రాంగ్ హైబ్రిడ్ పవర్‌ట్రెయిన్‌లను అందిస్తున్న రెండు మారుతి మోడల్స్.

మొత్తం సిఎన్‌జీ అమ్మకాల్లో టాటా మోటార్స్ రెండో స్థానంలో ఉంది. బూట్ స్పేస్ సమస్యను పరిష్కరించే డ్యూయల్ సిలిండర్ సిఎన్‌జీ టెక్నాలజీ టాటా సిఎన్‌జీ వాహనాల ప్రధాన ఆకర్షణ. ఇప్పుడు ప్రత్యర్థి అయిన హ్యుండాయ్ కూడా టాటాను అనుసరించి ఈ సాంకేతికతను తీసుకువచ్చింది. ఎక్స్‌టర్, గ్రాండ్ i10 నియోస్ మోడళ్లలో హై-సిఎన్‌జీ డ్యూయో అనే పేరుతో డ్యూయల్ సిలిండర్ టెక్నాలజీని ప్రవేశపెట్టింది.

సిఎన్‌జీ కార్లతో పాటు ఆటోమేటిక్ ట్రాన్స్‌మిషన్ ఆప్షన్‌ను అందిస్తున్న ఏకైక కంపెనీ కూడా టాటానే. టాటా టియాగో, టిగోర్ మాత్రమే సిఎన్‌జీ-ఆటోమేటిక్ కాంబినేషన్‌లో లభించే కార్లు. ఆటోమేటిక్ ట్రాన్స్‌మిషన్, అధిక మైలేజ్ కారణంగా చాలా మంది వినియోగదారులు ఈ కార్లను ఇష్టపడుతున్నారు. ఈ ఆవిష్కరణ టాటాను మార్కెట్‌లోని ఇతర పోటీదారుల నుండి ప్రత్యేకంగా నిలబెడుతోంది.

డ్రైవ్‌స్పార్క్‌ తెలుగు వెబ్‌సైట్ ఆటోమొబైల్‌కి సంబంధించిన తాజా వార్తలను అందిస్తుంది. వివిధ సోషల్ మీడియాల ద్వారా సరికొత్త వార్తలను ఎప్పటికప్పుడు యూజర్లకు చేరవేస్తుంది. తాజా కార్ల వార్తలు, బైక్ వార్తలు, టెస్ట్ డ్రైవ్ రివ్యూల వీడియోల కోసం మా Facebook, Instagram, YouTube పేజీలతో కనెక్ట్ అవ్వండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు. ధన్యవాదాలు.