కొన్నేళ్లలో రోడ్ల మీద అన్నీ ఈ కార్లే ఉంటాయి.. నెక్స్ 3 ఎలక్ట్రిక్ కార్ కాన్సెప్ట్ రిలీజ్ చేసిన హీరో

ఇండియాలో టూ వీలర్లకు తిరుగులేని అగ్రగామిగా ఉన్న హీరో మోటోకార్ప్ (Hero MotoCorp) ఇప్పుడు సరికొత్త మొబిలిటీ సెగ్మెంట్‌లో అడుగుపెట్టడానికి సిద్ధమవుతోంది. ఇటీవల ఇటలీలో జరిగిన EICMA 2025 అంతర్జాతీయ మోటార్ షోలో హీరో తమ ఎలక్ట్రిక్ సబ్-బ్రాండ్ అయిన విడా (VIDA) కింద పలు సెన్సేషన్ కాన్సెప్ట్‌లను ప్రదర్శించింది.

వీటిలో ముఖ్యమైనది నెక్స్ 3 (NEX 3) అనే కొత్త మైక్రో ఎలక్ట్రిక్ ఫోర్-వీలర్ కాన్సెప్ట్. ఒకప్పుడు టాటా నానో (Tata Nano) అందించిన చౌకైన, కాంపాక్ట్ రవాణా పరిష్కారాన్ని గుర్తుచేస్తూ, భవిష్యత్తులో ఈ నెక్స్ 3 కారు వస్తే, అది టెక్నాలజీలో టాటా నానో ఎలక్ట్రిక్‌కు గట్టి పోటీ ఇస్తుందని మార్కెట్ నిపుణులు అంచనా వేస్తున్నారు.

హీరో మోటోకార్ప్ (Hero MotoCorp) సంస్థ EICMA 2025 ఎగ్జిబిషన్‌లో తమ సరికొత్త మైక్రో ఎలక్ట్రిక్ 4-వీలర్ వెహికల్ నెక్స్ 3ని పరిచయం చేసింది. ఈ కంపెనీ తమ విడా అనే సబ్-బ్రాండ్ కింద వస్తున్న నోవస్(Novus) సిరీస్‌లో భాగంగా దీనిని విడుదల చేసింది.

నెక్స్ 3 హీరో కాంపాక్ట్ ఎలక్ట్రిక్ వెహికల్ సెగ్మెంట్లో ఒక ముఖ్యమైన ముందడుగు వేసింది. ప్రత్యేకంగా చెప్పాలంటే ఇది కార్లను తయారు చేయాలనే హీరో మోటోకార్ప్ ఆశను ప్రతిబింబిస్తుంది. ఒకప్పుడు టాటా నానో (Tata Nano) అందించిన సౌకర్యాల మాదిరిగా, భవిష్యత్ నగర ప్రయాణాలకు ఇది ఒక అద్భుతమైన పరిష్కారం అవుతుందని భావిస్తున్నారు.

నెక్స్ 3 వాహనంలో ఇద్దరు ప్రయాణికులు ఒకరి వెనుక ఒకరు కూర్చునే విధంగా సీటింగ్ ఏర్పాటు ఉంది. ఇది నాలుగు చక్రాలతో నడుస్తుంది. అన్ని వాతావరణాలకు అనుకూలమైన ఒక ప్రత్యేకమైన ఎలక్ట్రిక్ వాహనంగా రూపొందించబడిన ఈ నెక్స్ 3 చిన్న స్థలంలో పూర్తి భద్రతను అందించే వాహనంగా విడుదల అవుతుందని ఆశిస్తున్నారు. ఇది సిటీ, గ్రామీణ ప్రయాణాలకు అనుకూలమైన వాహనంగా మారుతుంది.

EICMA 2025 వేదికగా హీరో మోటోకార్ప్ సీఈవో పవన్ ముంజాల్ మాట్లాడుతూ..నోవస్ (Novus) ఫిలాసఫీ అనేది కేవలం ఒక పేరు కాదు. ఇది విప్లవాత్మక ఆవిష్కరణ ప్రతీక. ప్రపంచం భవిష్యత్తులో రవాణా పరంగా ఎలా పనిచేస్తుందో ఇది పునరాలోచించబోతోంది. అందరినీ కలుపుకొనిపోయే మొబిలిటీ సొల్యూషన్స్‌ను రూపొందించడమే మా లక్ష్యం" అని స్పష్టం చేశారు.

ఈ బృహత్తర విజన్‌ను సాకారం చేయడానికి హీరో మోటోకార్ప్ ఎలక్ట్రిక్ సబ్-బ్రాండ్ అయిన విడా(VIDA) ఇప్పటికే విస్తృతమైన రీసెర్చ్ అండ్ డెవలప్మెంట్ కార్యకలాపాలలో నిమగ్నమై ఉంది. భవిష్యత్తులో నోవస్ ప్లాట్‌ఫారమ్ పేరుతో అనేక విభిన్నమైన ఎలక్ట్రిక్ వాహన ఉత్పత్తులను పరిచయం చేయాలని విడా లక్ష్యంగా పెట్టుకుంది. ఈ శ్రేణిలో నెక్స్ 3 కాన్సెప్ట్ ఆధారంగా రూపుదిద్దుకోబోయే ఎలక్ట్రిక్ మినీ-కార్ లేదా కాంపాక్ట్ పర్సనల్ మొబిలిటీ వెహికల్ కీలకమైనది.

నెక్స్ 3 కాన్సెప్ట్‌తో పాటు హీరో మోటోకార్ప్ 2025 EICMA వేదికపై మరో రెండు ఆసక్తికరమైన కాన్సెప్ట్ మొబిలిటీ సొల్యూషన్స్‌ను కూడా ప్రదర్శించింది. నెక్స్ 1 (NEX 1) ఒక అల్ట్రా-కాంపాక్ట్, పర్సనల్ మొబిలిటీ డివైజ్ కాన్సెప్ట్. ఇది మిమ్మల్ని మోయడానికి బదులుగా మీతో పాటు నడిచే విధంగా రూపొందించారు. ఇది వ్యక్తిగత మైక్రో-మొబిలిటీలో వినూత్నమైన ఆలోచనను అందిస్తుంది.

నెక్స్ 2 (NEX 2) ఒక చిన్న, సెల్ఫ్-బ్యాలెన్సింగ్, నాన్-టిల్టింగ్ ఎలక్ట్రిక్ త్రీ-వీలర్ కాన్సెప్ట్. ఇది మోటార్‌సైకిల్ డైనమిక్ రైడింగ్ అనుభవాన్ని సిటీ వినియోగానికి అవసరమైన త్రీ-వీలర్ స్టెబిలిటీని కలగలిపి, అర్బన్ కమ్యూటింగ్ కోసం ఒక వినూత్న పరిష్కారాన్ని సూచిస్తుంది.

అడ్వాన్సుడ్ వెహికల్ పాటు, హీరో విడా విభాగం EICMA 2025 ఎగ్జిబిషన్‌లో రెండు కొత్త ఎలక్ట్రిక్ మోటార్‌సైకిల్ కాన్సెప్ట్‌లను కూడా ప్రదర్శించింది. విడా కాన్సెప్ట్ ఉబెక్స్ భవిష్యత్ అర్బన్ రైడింగ్, లాస్ట్-మైల్ డెలివరీ సొల్యూషన్స్‌ను దృష్టిలో ఉంచుకొని రూపొందించబడింది. విడా ప్రాజెక్ట్ VXZ అమెరికాకు చెందిన ప్రముఖ ఎలక్ట్రిక్ మోటార్‌సైకిల్ తయారీ సంస్థ జీరో మోటార్‌సైకిల్స్‎తో వ్యూహాత్మక సహకారంతో రూపొందించబడింది.

అంతేకాకుండా హీరో విడా VX2 అనే సిటీకి అనువైన ఎలక్ట్రిక్ స్కూటర్‌ను కూడా ఎగ్జిబిషన్‌లో ప్రదర్శించింది. ఇది యూరోపియన్ మార్కెట్‌లో హీరో విడా బ్రాండ్ అధికారిక ప్రవేశాన్ని సూచిస్తుంది. అంతర్జాతీయ ఈవీ మార్కెట్లో తమ ఉనికిని విస్తరించుకునేందుకు హీరో చేస్తున్న ప్రయత్నాలను ఇది తెలియజేస్తుంది.

చివరగా, విడా డర్ట్.ఇ సిరీస్‌లో ఆకట్టుకునే ఆఫ్-రోడ్ ఎలక్ట్రిక్ బైక్‌లు కూడా ప్రదర్శించారు. ఇందులో 4 నుంచి 10 సంవత్సరాల పిల్లల కోసం రూపొందించబడిన డర్ట్.ఇ కే3, అధిక పనితీరు కలిగిన డర్ట్.ఇ MX7 రేసింగ్ కాన్సెప్ట్ ఉన్నాయి. ఇది ఆఫ్‌రోడ్ ఎలక్ట్రిక్ బైకింగ్‌లో విస్తృత శ్రేణి వినియోగదారులను లక్ష్యంగా చేసుకుంది.

డ్రైవ్‌స్పార్క్ అభిప్రాయం: విడా నోవస్ ఎలక్ట్రిక్ వాహనాల ద్వారా హీరో మోటోకార్ప్ తెలివైన, సమగ్రమైన ప్రయాణాన్ని తిరిగి నిర్వచించడంలో నిమగ్నమై ఉంది. భారతదేశంలో నంబర్ వన్ 2-వీలర్ సంస్థగా ఉన్న హీరో మోటోకార్ప్ నుంచి ఇటువంటి వినూత్నమైన ఆలోచనలు, భవిష్యత్-ఆధారిత ఉత్పత్తులు రావడం ఆశ్చర్యకరం కాదు. భవిష్యత్ మొబిలిటీ సొల్యూషన్స్‌లో తమ నాయకత్వాన్ని చాటుకునే ప్రయత్నంలో ఉంది.